Ghazal

"meri ungli ki anguThi mein lagi patthar ki aankh aur darichon mein simaT aai mohalle-bhar ki aankh main to pagli thi mujhe to thaa hi rangon kaa junun qasr mein us shakhs ke chundhyaai thi aksar ki aankh is shab-e-khud-aagahi mein aaine bolaa kiye jaise pathraane lagi khud mere hi andar ki aankh ham use apne liye mahdud samjhe the magar ab khulaa is chaand par 'arse se thi ghar ghar ki aankh saadgi mein ham 'humairaa' jaane kyaa kyaa kah gae kis qadar aahistagi se hans paDi patthar ki aankh"

"hangaamon kaa saaya suuni aankh mein hai kaisaa badan hai aur kaisi poshaak mein hai goyaai taalu se chipki baiThi hai aur sannaaTaa aavaazon ki taak mein hai yaad bujhe to saari 'imaarat Dhah na jaae pichhlaa ek ik lamha meri saakh mein hai ek samundar hai jo aankhein detaa hai tah mein jaane ki himmat pairaak mein hai koi shanaasaa chehra koi miThi baat chingaari hai aur abhi tak raakh mein hai shaakhon par anhoni patjhaD aai hai phuul ki khushbuon kaa manzar khaak mein hai main us ki har baat 'humairaa' likh paaun aisaa lafz kahaan mere idraak mein hai"

"jaagti aankhon se kaisaa saaniha dekhaa gayaa baadalon kaa ghol kuchh qatre lahu barsaa gayaa jis ne apni raushni de kar kharidi tirgi log kahte hain safar par maut ke zinda gayaa us ki khaatir dushmani kis kis ki tu ne mol li chaand aakhir-kaar tere husn kaa gahnaa gayaa jab kabhi 'aurat ki aazaadi kaa uTThaa ghalghala vaqt 'aurat ko nai hi beDiyaan pahnaa gayaa jald us ki khatm ho jaaegi saari aab-o-taab jo adab tahzib apni bhuul kar likkhaa gayaa main ne tujh par aankh munde kar liyaa thaa e'timaad shisha ye TuuTaa to har-su kirchiyaan bikhraa gayaa jo adaakaari ke fan mein baa-kamaal-o-taaq thaa sab se baDh kar is zamaane mein vahi chaahaa gayaa kitni raa'naai thi kitnaa husn thaa us yaad mein rafta rafta zehn jis ko muntashir kartaa gayaa jis ne apni had se baDh kar kiin 'humairaa' khvaahishein baarhaa vo puuraa dariyaa pi ke bhi pyaasaa gayaa"

"vo ek shakhs jo miltaa thaa doston ki tarah badal ke rah gayaa rangin mausamon ki tarah thaa intizaar mujhe jis kaa itni muddat se vo mere saamne aayaa to dushmanon ki tarah bahaar aai ki tu aayaa hai ye 'ilm nahin mahak uThi hai fazaa tere gesuon ki tarah simaT ke rah gai meri bhi shakhsiyat jis mein vo aisaa chhaane lagaa mujh pe vus'aton ki tarah jo teraa naam kisi ne liyaa sharaarat se uDaa ke le gayaa sukh-chain aanchalon ki tarah 'humairaa' itnaa bhi paagal jahaan mein koi na ho kisi kaa dard lage jis ko raahaton ki tarah"

"dhuup jali to basti ki basti taarik hui andhe ghar ke logon ki binaai Thiik hui meri 'imaarat jhuTi buniyaadon pe qaaem thi phir kyon mere malbe se sach ki tahrik hui jo tahrirein main ne tujh se chhup kar likkhi thiin un ki numaaish mere hi ghar ke nazdik hui kamre mein raushan sannaaTon kaa vo 'aalam thaa kiran jharoke se andar aa kar baarik hui kuchh to 'humairaa' aangan mein thi sondhe-pan ki baas aur kuchh ab ki rut mein phulvaari bhi Thiik hui"

"utar aate hain 'alaamaat ke baadal mujh mein koi chuntaa hai kai rang ke chaaval mujh mein ek hamle se to bach jaaungi lekin aage khvaahishon ke kai daste hain haraaval mujh mein phir mire des ke bachchon ki khabar laayaa koi phir khule hain kai andaaz ke maqtal mujh mein roz ug aate hain andeshe nae peDon ke baDh rahaa hai mire inkaar kaa jangal mujh mein itne khush-naam buzurgon mein baDhaa hai miraa qad kaise utregi 'humairaa' koi daldal mujh mein"

"gar us se rabt miraa sirf ikhtilaafi thaa to us kaa radd-e-amal qaabil-e-muaafi thaa mohabbaton mein mafaadaat kaun yaad rakhe so ham ko apne liye ek naam kaafi thaa charaagh jab bhi jalaayaa koi to gul na kiyaa ye raushni ki rivaayaat ke munaafi thaa use khayaal thaa meri shikasta-paai kaa ye jaannaa bhi to us zakhm ki talaafi thaa 'humairaa' umr guzaari to e'tibaar aayaa ki is makaan kaa saamaan sab izaafi thaa"

"dil ki tasbih ke bikhre hue daane maange ham ne guzre hue anmol zamaane maange aap maail-ba-karam hon ye kahaan is kaa nasib dil to bas aap se kuchh khvaab suhaane maange aah vo jis ko sakhaavat ki nahin hai taufiq us se ik shakhs vafaaon ke khazaane maange mujh pe pahli si nazar Daal ki meraa daaman tere gulshan se vahi phuul puraane maange main vo naakaam ki thoDi si hansi ko tarsun dil vo majbur ki rone ke bahaane maange"

"havaa ki tez-gaamiyon kaa inkishaaf kyaa karein jo dosh par liye ho us ke bar-khilaaf kyaa karein yaqin aur gumaan ki jang se gurez thaa nahin jo faisla kiyaa hai us se inhiraaf kyaa karein vo dusron ki aankh kaa ghubaar to liye rahe to apne gard gard aaine ko saaf kyaa karein jo manzilein dikhaai thiin vo mumkinaat mein se thiin par apni himmaton ki barf mein shigaaf kyaa karein 'humairaa' e'timaad kaa pahaaD Dher ho gayaa aur ab bhi sochte hain un se ikhtilaaf kyaa karein"

"go nazar nazar bikhre pattharon ke chehre hain vaadiyon ke haathon mein raaston ke chehre hain kaisaa be-yaqin paikar mujh mein aa ke utraa hai sab uDe uDe us ki khushbuon ke chehre hain khvaahishein to kirnein hain jal bujhin to jaan de dein mere dil ki muTThi mein jugnuon ke chehre hain main ki 'aks se le kar aankh tak akeli huun aainon mein phir kaisi mahfilon ke chehre hain baat ki samaa'at kaa e’tibaar kaise ho doston ke lahjon mein tohmaton ke chehre hain chhoTi chhoTi baaton mein chhoTe chhoTe rishton mein kis qadar qayaamat ki uljhanon ke chehre hain dil ke dasht kaa manzar aur kaDe safar ki dhuup har qadam 'humairaa' ab hiddaton ke chehre hain"

"kai khush-naam khush-andaam chehre bujh gae hain gulaabi sardiyon mein sabz paude bujh gae hain hamaari aankh mehr-o-maah par rahne lagi hai hamaare gird kitne hi ujaale bujh gae hain nataaej se unhein vaaqif kiyaa hai sab ne phir bhi na uDne ki ijaazat se parinde bujh gae hain kahaan niklaa hai koi jahl ke andhe kuein se kitaabon ke buland-aahang daa've bujh gae hain 'humairaa' koi bhi vaapas nahin aayaa abhi tak gharon mein muntazir maaon ke lahje bujh gae hain"

"jab se is divaar mein rauzan hue jhaankne vaalon ke ghar raushan hue aahaTein baDhti gaiin dahliz par zard darvaazon ke pairaahan hue us ki baaton se dilon ke zer-o-bam ek lamhe ke liye dhaDkan hue mere khvaab aur us ke haathon ki sutur ek hi to aag kaa indhan hue tum se mil kar saare lamhon ke 'azaab jaise pahli raat ki dulhan hue"

"main masihaa na sahi kuchh bhi tiraa gham dekhun tere honTon pe hansi aankh mein shabnam dekhun kab talak tazkira-e-shahr-e-vafaa sunti rahun kab talak duur se is shahr ke mausam dekhun tu mire khvaab mire daaera-e-shab se na chhin yuun bhi main apne sitaare baDe maddham dekhun jis ke nashtar se bhaDakti hai mire gham ki lau kitni vahshat se usi haath mein marham dekhun teri vaadi mein to bikhre hain 'humairaa' nauhe us ke gul-paash jazire mein bhi maatam dekhun"

"har aahaT par baahar jhaanke mehmaanon ke dekhe khvaab bhari haveli ki laDki aur an-jaanon ke dekhe khvaab basti kaa har shakhs nae mausam ki zid par baiThaa hai darvaaze par diye jalaa kar tufaanon ke dekhe khvaab qaus-e-quzah ke rang churaa kar chaand sitaare Duub gae saaraa manzar TuuTe phuTe armaanon ke dekhe khvaab taaq pe sannaaTaa baiThaa hai divaaron pe uljhan hai band makaan mein kaise koi daalaanon ke dekhe khvaab gunge bahre andhe ghar mein apne aap se khauf aae raat ki raani ki khushbu bhi viraanon ke dekhe khvaab"

"khul ke vaazeh bhi na hone paai thiin parchhaaiyaan mujh ko zakhmi kar gaiin kuchh aansuon ki kirchiyaan jab se us ki guftugu mafhum se 'aari hui us ki nazmein paa rahi hain daad mein hamdardiyaan meri nazron mein bahut mashkuk hai us kaa vujud raah jis ki dekhti hain shahr-bhar ki laDkiyaan mujh ko us ke TuTte lahje mein do chizein milin chand lamhon kaa sukun aur 'umr ki tanhaaiyaan us ko baahar ki fazaa mein raushni kaise mile jis ko us ke ghar kaa suraj de gayaa taarikiyaan kis ko in safhaat mein paikar nazar aae miraa kaun DhunDe zindagi ki Diary mein talkhiyaan aaj bhi maanus si un khushbuon ki yaad mein meri palkon par utar aati hain kuchh hairaaniyaan subh ki kirnein uDiin sab ke dariche vaa hue duur vaadi mein kahin bajne lagin shahnaaiyaan sab ko sath-e-aab par khilte kanval achchhe lagein kis ne dekhi hain 'humairaa' jhiil ki gahraaiyaan"

"sar-e-divaar ye e'laan lagaayaa jaae abr ke saae se suraj ko bachaayaa jaae TuuT hi jaae fazaaon mein khamoshi kaa hisaar varna phir maut kaa ehsaas dilaayaa jaae jin sadaaon ke bhaTakne se havaa zinda thi khvaab-raston se unhein DhunD ke laayaa jaae shab ke taarik parindon ki khabar-giri ko dhuup mein baiTh ke logon ko bulaayaa jaae aaj phir pyaas ke Tilon se bagule uTThein aaj phir abr kaa imkaan dikhaayaa jaae baaDh aane se makaanon ke bharam TuuTe hain naam kis kaa sar-e-dahliz lagaayaa jaae baad ke zakhm to bhar jaaeinge dhire dhire pahle maazi ke hisaabon ko chukaayaa jaae"

"fasil shahr ki itni buland o sakht hui ki kul sipaah mazaamin-e-taaj-o-takht hui bujhaa charaagh thi main haasidon ki aankhon mein duaa ke shahr mein aai to sabz bakht hui vo lamha jab mire bachche ne maan pukaaraa mujhe main ek shaakh se kitnaa ghanaa darakht hui kisi ne sabz jazire pe mujh ko rok liyaa safar ke azm ki naav bhi lakht lakht hui taalluqaat 'humairaa' kabida hone mein nigaah-e-dost ki aavaaz bhi karakht hui"

"ye tere qurb se kyaa martaba milaa hai mujhe har ek shakhs mohabbat se dekhtaa hai mujhe vo jo koi bhi thaa tujh se bahut mushaabah thaa jabhi to dard kaa ehsaas ho rahaa hai mujhe tumhaare shahr ke logon ki main zarurat huun yahi khayaal to jaane se roktaa hai mujhe vo ek nazm jo mansub us ke zulm se thi sunaa hai us se vo badnaam kar rahaa hai mujhe qadam uThe hain nai raah par to 'azm ye hai baDhun ki parcham-e-ehsaas thaamnaa hai mujhe ye she'r kahne kaa mauqa' nahin 'humairaa' magar abhi abhi koi ilhaam saa huaa hai mujhe"

"dil ko darun-e-khvaab kaa mausam bojhal rakhtaa hai ik anjaane khauf se vaaqif har pal rakhtaa hai vo jo ba-zaahir har zarra hai tez havaaon mein apne hone kaa ehsaas mukammal rakhtaa hai tark-e-taalluq ne meri bhi soch ko badlaa nahin vo bhi shikaayat apne saath musalsal rakhtaa hai registaan kaa paudaa huun main aur bahut sairaab apnaa ruup ravayya mujh par baadal rakhtaa hai kankar pheink rahe hain ye andaaza karne ko Thahraa paani kitni 'humairaa' halchal rakhtaa hai"

"divaarein khaamosh hain saaya bol rahaa hai us se meraa chhup ke milne kaa rishta hai binaai be-manzar ho to chubhne lagegi mausam kaa ehsaas to rangon se hotaa hai lafzon ki aankhein un ko DhunDaa karti hain jin honTon se baat kaa rishta Tuut gayaa hai apne har izhaar ki khushbu vaapas le kar main ne tujhe teraa apnaa-pan lauTaayaa hai lamhon kaa khuddaar hiran chaahat ki khaatir khuli fazaa ki vus'at pichhe chhoD chukaa hai ek nae aaghaaz ki dhun mein koi musaafir khud apne hi ghar kaa rasta bhuul gayaa hai jaani-pahchaani aankhon mein gumnaami hai shohrat kaa jaadu sar chaDh kar bol rahaa hai"

"vo rang rang dhuup thi ki raat raat khvaab hai ye main huun raushni mein yaa koi nayaa saraab hai mire qarib zindagi kaa qatl-e-'aam hai vahi aur aasmaan par vahi tulu'-e-aaftaab hai hare-bhare vujud Tahniyon pe naam likh chuke bahaar kyaariyon mein ab khuli hui kitaab hai main aise khvaab se panaah maangti rahi sadaa ki jis ke baad ratjagon kaa be-karaan 'azaab hai bujhi hui hansi jale hue gharon ke khaal-o-khad kisi nae savaal kaa koi nayaa javaab hai tamaam shahr 'aks 'aks sar-burida ho gayaa ye aainon kaa ek ek fard se hisaab hai koi to sabz pal 'humairaa' apne aap ko mile kai dinon se fursaton kaa zaaiqa kharaab hai"

"is qadar ghaur se us shakhs ko dekhaa na karo vo bhare ghar kaa hai 'aadi use tanhaa na karo shor mein dab ke na rah jaae tumhaari aavaaz shahr mein khaao agar zakhm to chikhaa na karo gar vo 'aadi na rahaa dhuup na sah paaegaa chand lamhon kaa kisi shakhs pe saaya na karo doston ne jo diye hain tumhein palkon ke liye aise moti sar-e-mahfil to luTaayaa na karo zard chehre pe jo ghaaze kaa gulaabi-pan hai bhigi aankhon se tum is rang ko rusvaa na karo sukhe patton ki sadaaon se karo samjhauta vaqt se pahle bahaaron ki tamanna na karo maand paD jaae 'humairaa' na damak chehron ki pichhle khvaabon ko sar-e-bazm sunaayaa na karo"

"log to ik manzar hain takht-nashinon ki khaatir farsh bichhaayaa jaataa hai qaalinon ki khaatir kitni be-tartibi phaili kyaa kuchh TuuT gayaa saje-sajaae ghar the unhi makinon ki khaatir Thahar gae hain ain safar mein bin soche-samjhe ham-safari ke kuchh be-naam qarinon ki khaatir jal bujhte hain log kisi ko faiz pahunchne par gir jaate hain kuchh be-maani zinon ki khaatir ham aur tum jo badal gae to itni hairat kyaa aks badalte rahte hain aainon ki khaatir unche daam lage hain humairaa kore jazbon ke saudaa buraa nahin hai chand mashinon ki khaatir"

"in lafzon mein khud ko DhunDungi main bhi apni anaa kaa manzar dekhungi main bhi koi mire baare mein na kuchh bhi jaan sake ab aisaa lahja apnaaungi main bhi aankhon se chun kar sab TuTe-phuTe khvaab patthar ki khvaahish ban jaaungi main bhi main khud apni soch ki mujrim Thahri huun ab ye adaalat khud hi jhelungi main bhi kis kis rang mein ilhaamaat utarte hain kis kis ki rudaadein likkhungi main bhi tasviron ke maddham rang bataate hain apne ko pahchaan na paaungi main bhi dukh mein 'humairaa' apni hifaazat karne ko pichhle sabhi aaseb bulaaungi main bhi"