Ghazal

"matla ghazal kaa ghair zaruri kyaa kyuun kab kaa hissa hai zindagi chokleT cake hai thoDaa thoDaa sab kaa hissa hai ab jo bar mein tanhaa piitaa huun coffē ke naam pe zahr us ki talkh si shirini mein us ke lab kaa hissa hai lok kahaaniyon mein maa-baad-e-jadid ki pesh-aamad jaise fiction ki re-cell value mein mazhab kaa hissa hai ke-pi-ke afghanistan hai aur balochistan iraan sindh hai chiin mein aur pyaaraa punjab arab kaa hissa hai sohni yaa sohne se pahle haq hai ghaDe par paani kaa kab se ghaDi mein jab aur tab se zyaada ab kaa hissa hai maanaa hijr ki raat hai ye par kitni khushi ki baat hai ye gham ki rim-rim-jhim ki hamdam bazm-e-tarab kaa hissa hai cab chalaane vaale daaji tab chalaane vaalaa saaji vo jo adab kaa hissa the to ye bhi adab kaa hissa hai tai huaa nazm hi mustaqbil hai paan-sau bil hai bhai pyaaro aankh na maaro ghazal hamaare hasab-nasab kaa hissa hai ik din jab buDhe painter ke paas sharaab ke paise nahin the chhat par ye ghanghor ghaTaa tab se is pub kaa hissa hai sex jo pahle saakhtiyaati roz-o-shab kaa hissa thi ab maabaad-e-saakhtiyaati roz-o-shab kaa hissa hai qaafiya bahr radif vaghaira jaise harif zarif vaghaira in ko ThanDaa soDa pilaao bhaai ye kab kaa qissa hai"

"is se phulon vaale bhi aajiz aa gae hain teri khaatir jo guldasta DhunD rahaa hai dil ko dhakke khaate nikaale jaate dekh ke saahil apnaa pakkaa dariyaa DhunD rahaa hai tasma khulaa jaise aazaad talaazma ho vaah ek pahan ke dusraa juutaa DhunD rahaa hai us ke flat se baahar koi duur kaa dost paas ke bus stop kaa rasta DhunD rahaa hai bas kar de ab, kab se matla DhunD rahaa hai kyaa koi tisraa chauthaa misraa DhunD rahaa hai ma kiye bint-e-mochi ko chauthaa saal hai tab se vo job aur karmu rishta DhunD rahaa hai har masnui pankhaa jhuTaa make-up kar ke zaat ki shahr-panaah mein rakhna DhunD rahaa hai lamp jalaate aur bujhaa ke phir se jalaate yaa vo mujhe gum kartaa hai yaa DhunD rahaa hai party Thap mehmaan-e-khususi shaair-e-aazam patli gali mein paan kaa khokhaa DhunD rahaa hai yaaro baiThe nahrein khodo baatein chhoDo main use DhunD luun mujhe jo tanhaa DhunD rahaa hai ik laDki apne liye laDki DhunD rahi hai ik laDkaa apne liye laDkaa DhunD rahaa hai mobile par app lagaao kaam chalaao kaun puraane shahar kaa naqsha DhunD rahaa hai roze rakhvaao khulvaao jannat paao banda to do vaqt kaa khaanaa DhunD rahaa hai meri iklauti T-shirt pe qabza jamaae achchhaa rōmmate apnaa kachchhaa DhunD rahaa hai khil-khilaa ke load-shedding se faiz uThaa ke yusuf-jaani tujhe ye andhaa DhunD rahaa hai gadle paani se dhulte station par kis ko garmaa-garm si chaae kaa piyaala DhunD rahaa hai siine par do qabron kai taaviz bandhe hain bach kar, dhup! mujhe ik saaya DhunD rahaa hai u-e-t mein chhuTTiyaan hone vaali hain dost kaun saa hostel kis kaa kamra DhunD rahaa hai"

"dekh na is tarah guzaar arsa-e-chashm se mujhe fursat-e-did ho na ho mohlat-e-khvaab de mujhe bas-ki guzishtani hai vaqt bas-ki shikastani hai dil khvaab koi dikhaa ki jo yaad na aa sake mujhe khaam hi rakh ke pukhtagi shakl hai ik shikast ki aatish-e-vasl ki jagah khaak-e-firaaq de mujhe haan ai ghubaar-e-aashnaa main bhi thaa ham-safar tiraa pi gaiin manzilein tujhe khaa gae raaste mujhe der se ro nahin sakaa duur huun so nahin sakaa gham jo rulaa sake mujhe sam jo sulaa sake mujhe"

"yahaan se chaaron taraf raaste nikalte hain Thahar Thahar ke ham is khvaab se nikalte hain kisi kisi ko hai tahzib-e-dasht-aaraai kai to khaak uDaate hue nikalte hain yahaan rivaaj hai zinda jalaa diye jaaein vo log jin ke gharon se diye nikalte hain ajiib dasht hai dil bhi jahaan se jaate hue vo khush hain jaise kisi baagh se nikalte hain ye log so rahe honge jabhi to aaj talak zaruf-e-khaak se khvaabon bhare nikalte hain sitaare dekh ke khush huun ki roz meri tarah jo kho gae hain unhein DhunDne nikalte hain"

"ab masaafat mein to aaraam nahin aa saktaa ye sitaara bhi mire kaam nahin aa saktaa ye miri saltanat-e-khvaab hai aabaad raho is ke andar koi bahraam nahin aa saktaa jaane khilte hue phulon ko khabar hai ki nahin baagh mein koi siyah-faam nahin aa saktaa har havaa-khvaah ye kahtaa thaa ki mahfuz huun main bujhne vaalon mein miraa naam nahin aa saktaa main jinhein yaad huun ab tak yahi kahte honge shaahzaada kabhi naakaam nahin aa saktaa Dar hi lagtaa hai ki raste mein na rah jaaun kahin kahlavaa dijiye mein shaam nahin aa saktaa"

"bhaai khudaa ke bande jaanein dil ko jaise raam kiyaa apni badhaai ho duniyaa par chaar chhe din jo kaam kiyaa ek nishaani si saahil par saari kahaani chhoD gai Dubti naav par us aakhiri mauj ne kyaa inaam kiyaa pyaare dushman jivan jogi aakhir tum bhi dekh hi loge khud ko khair se kahte sunoge ham ne mazaaq jo aam kiyaa naam pataa be-shak mat likkho pahunchegaa tum bas khat likkho aur is had tak gumnaami mein paidaa kis ne naam kiyaa khushiyaan gham jab hans ro baiThe aakhir ko sab chup ho baiThe bujhtaa alaav unghte taare ham ne khuub kalaam kiyaa kuchh mauzun naa-mauzun kartaa yaa yuun kartaa to kyon kartaa lekin khaali batri ne bharvaan banduq kaa kaam kiyaa"

"mire qarib hi mahtaab dekh saktaa thaa gae dinon mein ye taalaab dekh saktaa thaa ik aise vaqt mein sab peD main ne naql kiye jahaan pe main inhein shaadaab dekh saktaa thaa ziyaada der usi naav mein Thaharne se main apne-aap ko gharqaab dekh saktaa thaa koi bhi dil mein zaraa jam ke khaak uDaataa to hazaar gauhar-e-naayaab dekh saktaa thaa kahaaniyon ne miri aadatein bigaaD di thiin main sirf sach ko zafar-yaab dekh saktaa thaa magar vo shahr kahaani mein rah gayaa hai dost! jahaan main rah ke tire khvaab dekh saktaa thaa"

"dhuum gum-gashta khazaanon ki machaataa phire kaun in zamaanon mein jo the hi nahin jaataa phire kaun baagh mein un se mulaaqaat kaa imkaan bhi hai sirf phulon ke liye lauT ke aataa phire kaun siikh rakkhe hain parindon ne sab ashjaar ke giit aaj-kal muuD hi aisaa hai ki gaataa phire kaun main to kahtaa huun yahin ghaar mein rah lo jab tak vaqt puchho hi nahin shahr basaataa phire kaun bhes badle hue ik shakhs ki khaatir hai ye sab ham faqiron ke bhalaa naaz uThaataa phire kaun khvaab yaani ye shab-o-roz jise chaahiye hon aa ke le jaae ab aavaaz lagaataa phire kaun ikhtilaafaat saron mein hain gharon se baDh kar phir uThaani jo hai divaar giraataa phire kaun"

"gul-e-sukhan se andheron mein taab-kaari kar nae sitaare khilaa khvaab-shaar jaari kar bas ab faqir ki duniyaa mein aur dakhl na de tiri bisaat hai dil bhar so shahr-yaari kar main kaarobaar-e-jahaan ko sameT kar aayaa bas itni der to dil ki nigaah-daari kar yahin kahin kisi lamhe mein dil bhi hai larzaan tavajjoh saare zamaanon pe baari baari kar vahi na ho ki ye sab log saans lene lagein amir-e-shahr koi aur khauf taari kar ye qaht-e-nur to 'baabar' khabar nahin kab jaae so dil ke arsa-e-khaali mein khvaab-yaari kar"

"bahut din ho gae dariyaa ki jaanib aa nahin paae parindo khair se to ho ki par phailaa nahin paae gai guzri sahar shaamein magar viraana-e-jaan mein khile kuchh phuul aise jo kabhi murjhaa nahin paae janaab ab zer-e-aab aaraam se dekhein achhute khvaab jo in maTmaili aankhon se to haq manvaa nahin paae barasti hai kabhi aag aur kabhi paani umaDtaa hai magar ye haath hain jo aasmaan tak jaa nahin paae ab is dil hi ko lo aaraam kyon is ko nahin aataa yahi to baat hai jo ham tumhein samjhaa nahin paae"

"dil mein hai ittifaaq se dasht bhi ghar ke saath saath is mein qayaam bhi karein aap safar ke saath saath dard kaa dil kaa shaam kaa bazm kaa mai kaa jaam kaa rang badal badal gayaa ek nazar ke saath saath khvaab uDaa diye gae peD giraa diye gae donon bhulaa diye gae ek khabar ke saath saath shaakh se is kitaab tak khaak se le ke khvaab tak jaaegaa dil kahaan talak us gul-e-tar ke saath saath is ko ghazal samajh ke hi sarsari dekhiye sahi ye miraa haal-e-dil bhi hai arz-e-hunar ke saath saath"

"dil ke ghuTne ko ishaaraa samjho dahr ye apnaa khasaaraa samjho ye bhi mumkin hai ki tum duur ke log is alaav ko sitaara samjho ye bhi ik mauj hai miTTi ki sahi vaqt kam hai to kinaaraa samjho par nahin hote khayaalon ke to phir kaise uDte hain ghubaaraa samjho kise maalum khazaana mil jaae koi naqsha to dobaara samjho khet rul jaaeinge paagal-pan mein jang kaisi mujhe haaraa samjho"

"karte phirte hain ghazaalaan tiraa charchaa saahab ham bhi nikle hain tujhe dekhne sahraa saahab ye kuchh aasaar hain ik khvaab-shuda basti ke yahin bahtaa thaa vo dil naam kaa dariyaa saahab thaa yahi haal hamaaraa bhi magar jaagte hain kyaa 'ajab khvaab sunaayaa hai dobaara saahab sahl mat jaan ki tujh rukh pe khudaa hote hue dil huaa jaataa hai gard-e-rah-e-duniyaa saahab ham na kahte the ki us ko nazar-andaaz na kar aaina TuuT gayaa dekh liyaa naa saahab yuun hi din Duub rahaa ho to khayaal aataa hai yuun hi duniyaa se guzar jaate hain kyaa kyaa saahab aabshaaron ki jagah dil mein kisi ke shab-o-roz khaak uDti ho to vo khaak likhegaa saahab sach kahaa aap ki duniyaa mein hamaaraa kyaa kaam ham to bas yunhi chale aae the achchhaa saahab tum to kyaa ishq-e-balaa-khez ke aage baahar miir saahab hain baDi chiiz na mirzaa saahab"

"insaani darinde aur is aasaani se mar jaaein ye sochne baiThein to pareshaani se mar jaaein vo jin ko mayassar thi har ik chiz-e-digar bhi mumkin hai suhulat ki faraavaani se mar jaaein kashti pe the kashti ko jalaate hue hazraat ab aag se bach jaaein bhale paani se mar jaaein aaine kaa ye kaun saa session hai hamein kyaa divaar ko takte hue hairaani se mar jaaein 'baabar' koi jazbaati kronon se ye puchhe kis khaate mein ham aap ki naadaani se mar jaaein ai dost mukammal nazar-andaaz hi kar dekh aisaa na ho ham niim nigahbaani se mar jaaein bach jaaein to aakhir kise kyaa farq paDegaa dushman na sahi dost pashemaani se mar jaaein aankhon mein utarte hue itraaein sitaare suraj hon to jal kar tiri peshaani se mar jaaein raanjhe ko to phir hiir ki tasvir bahut hai ji kartaa thaa lag kar usi marjaani se mar jaaein"

"dekhaa nahin chaand ne palaT kar ham so gae khvaab se lipaT kar ab dil mein vo sab kahaan hai dekho baghdaad kahaaniyon se haT kar shaayad ye shajar vahi ho jis par dekho to zaraa varaq ulaT kar ik khauf-zada saa shakhs ghar tak pahunchaa kai raaston mein baT kar kaaghaz pe vo nazm khil uThi hai ug aayaa hai phir darakht kaT kar 'baabar' ye parind thak gae the baiThe hain jo khaak par simaT kar"

"yunhi aati nahin havaa mujh mein abhi raushan hai ik diyaa mujh mein vo mujhe dekh kar khamosh rahaa aur ik shor mach gayaa mujh mein donon aadam ke muntaqim beTe aur huaa un kaa saamnaa mujh mein main madine ko lauT aayaa huun yaani jaari hai karbalaa mujh mein raushni aane vaale khvaab ki hai din to kab kaa guzar chukaa mujh mein is andhere mein jab koi bhi na thaa mujh se gum ho gayaa khudaa mujh mein"

"kitaab zor se pheinki khudaa kaa shukr kiyaa ki kafka ki jagah cockroach maaraa gayaa kisi ne daaDhi baDhaai kisi ne munchh ok zaraa kisi ne baDhaai jo soch maaraa gayaa tumhaari muratein noTon pe chhap gaiin kutto to jaD pahaaD ki dariyaa kaa loch maaraa gayaa"

"firaaq-o-vasl to yak-dam thiin 'aarzi rasmein hamein gunaah ne baandhaa huaa hai aapas mein khushi thi itni tiri rail chhuT jaane ki main books rakh ke uThaataa rahaa tiri qasmein miri to khair thi kambakht titliyon ko bhi maza hi aur milaa surkh phulon ke ras mein nazar jo khvaab saa chehra koi sirhaane paDaa use bhi chaaT gayaa main kitaab ki chas mein vo baagh laazmi hogaa ye peD bhi hogaa par aise phuul to khilte nahin hain undulas mein sahar ki pahli kiran ne qafas mein par maare to khuun dauD gayaa pattharon ki nas-nas mein usi ke pichhe hai duniyaa kaa sab se daulat-mand jo husn ik dafa dekhaa thaa gashti circus mein vo paise ginti hai tanti hai chalti banti hai main sochtaa huun ki kyaa kuchh nahin mire bas mein abhi schōl ki ghanTi nahin baji 'baabar' main jhuk ke baandh rahaa huun matin ke tasme"

"aur vahshat hai iraada meraa haq hai sahraa pe ziyaada meraa to yahi kuchh hai vo duniyaa yaani ek matruk iraada meraa raat ne dil ki taraf haath baDhaae ye sitaaraa bhi hai aadhaa meraa aabju main to chalaa jaldi hai ik samundar se hai vaada meraa dhuul uDti hai to yaad aataa hai kuchh miltaa-jultaa thaa libaada meraa"

"jiiti raho kahaaniyo milte hain yaar ek din ek hazaar ek raat ek hazaar ek din vaaqa'i jaise gum-shuda shakhs palaT ke aa gayaa mujh se basar nahin huaa ek hi baar ek din khaak mein kam numud ki aag 'adam vajud ki umr-e-khayaam ek shab umr-e-khumaar ek din manzil-e-jaan tak ek din pahunchegaa jo dar asl hai raah mein baiTh jaaegaa gard-o-ghubaar ek din vo jise DhunDti phiri tum ne chhapaai Diary yaad hai yaar ek baar yaad hai yaar ek din aankh bachaa ke le gayaa haath baDhaa ke le gayaa raat ke paar ek khvaab khvaab ke paar ek din jhuTi haqiqaton se duur sachchi kahaaniyaan zarur jitein to vaapas aa sakein shaahsavaar ek din gaanv se gaanv Daakiye logon ke khat paDhaa kiye miir aman huaa kiye baagh-o-bahaar ek din ban ke bikhar to jaaungaa rau ke sanvar to jaaungaa khvaab-nagar to jaaungaa aakhiri baar ek din baaqi zamaane chhoD de faani fasaane chhoD de meri tarah se meri jaan khud pe guzaar ek din yaar ko gaaD kar sabhi gaaDiyon ki taraf baDhe kaTtaa na thaa tire baghair yaaron ke yaar ek din duniyaa se ek din vo shakhs dil ki taraf phir aaegaa shahr mein lauT aaegi phir se bahaar ek din qasbe ki aurtein jane bachchon sane bane Thane rail jahaan nahin ruki khokhraapaar ek din"

"vo gul vo khvaab-shaar bhi nahin rahaa so dil ye khaaksaar bhi nahin rahaa ye dil to us ke naam kaa paDaav hai jahaan vo ek baar bhi nahin rahaa paDaa hai khud se vaasta aur is ke baad kisi kaa e'tibaar bhi nahin rahaa ye ranj apni asl shakl mein hai dost ki main ise sanvaar bhi nahin rahaa ye vaqt bhi guzar nahin rahaa hai aur main khud ise guzaar bhi nahin rahaa"

"dariyaa vo kahaan rahaa hai jo thaa ye shahr kaa aakhiri qissa-go thaa jo khaak si dil mein uD rahi hai yaan koi ghazaal ho na ho thaa ab se ye hamaaraa ghar nahin khair pahle bhi na thaa khayaal to thaa saabit nahin kar sakoge tum log kyaa meraa vajud thaa chalo thaa donon ghaDiyon par hijr kaa vaqt honaa nahin chaahiye thaa so thaa is khvaab mein kyaa nahin dar-asl bas kah to diyaa naa khvaab jo thaa"

"tiri gali se guzarne ko sar jhukaae hue faqir hujra-e-haft-aasmaan uThaae hue koi darakht saraae ki jis mein jaa baiThein parinde apni pareshaaniyaan bhulaae hue mire savaal vahi TuT-phuT ki zad mein javaab un ke vahi hain bane-banaae hue hamein jo dekhte the jin ko dekhte the ham vo khvaab khaak hue aur vo log saae hue shikaariyon se mire ehtijaaj mein 'baabar' darakht aaj bhi shaamil the haath uThaae hue"

"so duniyaa mein jiinaa basnaa dil ko marne mat denaa yaar kiraae-daar ko ghar par qabza karne mat denaa job zaruri hoti hai saahab majburi hoti hai job ke ghanchakkar mein paD kar khvaab bikharne mat denaa aisi lahrein aisi bahrein kab qismat se milti hain achchhe maanjhi ab nayyaa ko paar utarne mat denaa ek dafa kaa zikr hai donon ik lahore mein yakjaa the ek dafa kaa zikr hai us ko kabhi mukarne mat denaa maal pe rash kaafi hogaa bas ek do kash kaafi hogaa ab kisi car ko kisi savaar ko sar se guzarne mat denaa murda naare lagaane vaale zinda gosht jalaa sakte hain is be-ant hujum ko khud se ziyaada Darne mat denaa"