Ghazal

"zindagi jab tire aasaar nazar aaeinge ham tire shahr ke us paar nazar aaeinge meri aankhon kaa kinaara jo tumhein kaafi ho mere baazu tumhein patvaar nazar aaeinge kahin khud ko nazar aae bhi tire baad to ham saans lete hue be-kaar nazar aaeinge log DhunDeinge hamein DhunDne vaalon ki tarah ham pas-e-chashm-e-nam-e-yaar nazar aaeinge aashiqi aise qabile mein riaayat kaisi paani bharte hue sardaar nazar aaeinge koi malhaar na sujhegaa tire baad hamein baanjh dharti ke zamin-daar nazar aaeinge dil ke parde pe agar ek nazar Daalein to kuchh pareshaan se kirdaar nazar aaeinge"

"na dalilein na hi abaabilein sabr ke ghunT hain vahi pi lein kaisi be-khvaab hain sabhi aankhein jis tarah khushk-o-be-amaan jhilein maat khaa jaaein zabt se apne aur insaaniyat pe baazi lein ek insaan kaa lahu kar ke us pe shaitaan ki gavaahi lein kuuch kar jaaein aise kuche se saath naakaamiyon ki punji lein jahl mein sahl hai unhein shaayad us pe ik dusre se thapki lein bas nahin chal rahaa farishton kaa varna palTi hui ye dharti lein jin ke shajre mein bas jahaalat hai un se naslon ki rahnumaai lein raakh suraj hi ki nikalti hai jab kisi raat ki talaashi lein ye siyaahi hai is liye shaayad taaki akhbaar apni surkhi lein kitne hi girye ham pe vaajib hain par suhulat nahin ki ruuhi lein sirf paidaa hon us zamaane mein aur phir 'umr bhar tasalli lein sakht naadim huun apne bachchon se yahi maahaul hai agar ji lein"

"mare dosh par tiri laash re o maaashre teraa marg fikr-e-maaash re o maaashre main janm janm kaa faqir huun to amiir huun mujhe raas meraa qimaash re o maaashre kai uljhanon kaa javaaz huun koi raaz huun mujhe mujh pe rahne de faash re o maaashre kai aasmaanon se duur huun main ghurur huun mujhe kab hai teri talaash re o maaashre koi barf-zaad vajud huun main jumud huun mujhe dhuup se na taraash re o maaashre miraa zakhm zakhm dikhaa diyaa mujhe kyaa diyaa faqat aansuon kaa faraash re o maaashre ai khudaa-e-dil ai khudaa-e-dil ai khudaa-e-dil o maaashre o maaashre o maaashre"

"ruuh ko meri tavajjoh chaahiye zakhm se gahri tavajjoh chaahiye ghar ki haalat dekh kar lagtaa nahin ab ise koi tavajjoh chaahiye jam gai hai kaai si dahliz par tere qadmon ki tavajjoh chaahiye pahle mujh ko chaahiye thaa tu magar ab faqat teri tavajjoh chaahiye ek chashm-e-tar kahin gum ho gai ai miri miTTi tavajjoh chaahiye Dubte suraj ke ye alfaaz the ghup andhere ki tavajjoh chaahiye be-khayaali tu kahaan hai aaj-kal tujh ko bhi thoDi tavajjoh chaahiye kar rahe hain aap divaana jise us ko pahle hi tavajjoh chaahiye"

"raste kitnaa thak jaate hain phir bhi manzil tak jaate hain patton ko aaraam nahin hai kaan havaa ke pak jaate hain lamhon ko aasaan na lenaa lamhe sadiyaan faq jaate hain ek taraf se tum aate ho chaaron or dhaDak jaate hain ek moattar yaad ke jhonke taaza lams chhiDak jaate hain qadmon ki aadat hai yunhi su-e-yaar sarak jaate hain jaane do logon ki baatein kuchh bhi aa kar bak jaate hain rasta gar bhi shart nahin hai raste aap bhaTak jaate hain aankhein chaukhaT ho jaati hain mausam be-dastak jaate hain"

"buri zaminon ke faaslon ko miTaate rahnaa main lauT aaungaa mujh ko vaapas bulaate rahnaa ye gard-baadon kaa masala hai ki mashghala hai havaa ke daaman pe daaere se banaate rahnaa tiri talab ke alaava apnaa koi nahin hai qarib aa kar bhi kuchh na kuchh duur jaate rahnaa tumhaari aankhein to zindagi se bhari hui hain hamaare jaison kaa hausla bhi baDhaate rahnaa vo nazm jis ko paDhaa nahin thaa jiyaa thaa ham ne koi bhi rut ho bahaar aai sunaate rahnaa visaal kyaa hai supurdagi kaa kamaal kyaa hai baDhaa-chaDhaa kar saheliyon ko bataate rahnaa nazar bhi rakhnaa mohalle vaalon ki zindagi par kabutaron ko bhi daana-vaana khilaate rahnaa bichhaDnaa chaaho to apne dil ki nafi na karnaa yahi bahut hai jahaan raho muskuraate rahnaa ye peD vo hain jo aasmaanon ko saaya deinge jo ho sake to duaa ke paude lagaate rahnaa hamaari duniyaa mein hairaton ki bahut kami hai ye aag andar se bujh rahi hai jalaate rahnaa"

"ab to aate honge kab ke bheje hain main ne tum ko lene raste bheje hain apni taraf se teraa vaqt bachaayaa hai teri taraf se khud ko dilaase bheje hain us ki lughat mein tanhaai kaa lafz bhi hai jis ne har ik shai ke joDe bheje hain qaasid ki jaan-bakhshi par mamnun huun main khat mein us ne khat ke purze bheje hain kaise kam ho sakte hain jo gham tu ne maap aur taul ke andaaze se bheje hain sarhad paar kisi par jab bhi pyaar aayaa ham-saayon ko yunhi tohfe bheje hain taariki ham khinch ke laae hain ghar tak Dubte suraj ko bas tinke bheje hain amn ki khaatir itnaa hi kar saktaa thaa main ne jang mein apne beTe bheje hain"

"logon ke murshad ek taraf aur zehn mein shaayad ek taraf lekin kahne ko zinda hain marnaa sau fisad ek taraf aavaazein qaid nahin hotin had ho yaa sarhad ek taraf tum aao to ho saktaa hai jiine kaa maqsad ek taraf ab tak jau bhi tahrir huaa tere naam ke abjad ek taraf duniyaa mein sab kuchh faani hai tere khaal-o-khad ek taraf ham Thahre hue raston se hain ye rukhsat-o-aamad ek taraf naqshe kaaghaz ke TukDe hain siine mein sarhad ek taraf insaan khataa kaa putlaa hai albatta murtad ek taraf bas naam rahe gaa allaah kaa baaqi shadd-o-mad ek taraf"

"ai khudaa-e-junun khudaa-haafiz bandagi ke fusun khudaa-haafiz jin labon se tumhein diyaa bosa kaise un se kahun khudaa-haafiz zaahiran ek lams thaa us kaa zakhm-haa-e-darun khudaa-haafiz chashm-e-nam ki havaa mubaarak ho ai mire dil ke khuun khudaa-haafiz teraa jaanaa ajiib lagtaa thaa ab himaayat mein huun khudaa-haafiz haalat-e-raqs mein hai Thahraav iztiraab-o-sukun khudaa-haafiz tum mujhe sun ke an-suni karnaa laakh kahtaa rahun khudaa-haafiz main mohabbat ki aankh se niklaa aakhiri ashk huun khudaa-haafiz"