Ghazal

"shikast-e-ruh se pahle sahar nahin hoti tamaam umr shab-e-gham basar nahin hoti hujum-e-yaas ke maare hue kidhar jaaein har ek raah tiri rahguzar nahin hoti ba-har-maqaam vo rahte hain baa-khabar ham se aur is tarah ki hamein bhi khabar nahin hoti kabhi asar ba-lihaaz-e-duaa nahin rahtaa kabhi duaa hi ba-qadr-e-asar nahin hoti ye inqilaab-e-zamaana ki dam-ba-dam paidaa ye zindagi ki idhar se udhar nahin hoti tulu-e-subh ki ummid ne hamein 'ishrat' vo raat di jo kisi se basar nahin hoti"

"tiri mahfil tire kuche kaa pataa yaad nahin phir bhi jiite hain ki marne ki adaa yaad nahin main to chhoD aaya thaa ik bhiiD sar-e-raah-e-vafaa kaun kis moD se kab lauT gayaa yaad nahin aaj dil par tapish-e-asr-e-ravaan taari hai aaj us shokh ki aanchal ki havaa yaad nahin lazzat-e-zakhm-e-jigar talkhi-e-sahbaa-e-junun ab koi chiiz tire gham ke sivaa yaad nahin zehn be-aab chaTaanon ki tarah jaltaa hai tiri zulfein tiri zulfon ki ghaTaa yaad nahin aap ne khud ko bataayaa thaa masih-e-dauraan aap ko bhi mire zakhmon ki davaa yaad nahin thi jab ik dhuum hadis-e-lab-o-gesu 'ishrat' vo zamaane vo fazaaein ba-khudaa yaad nahin"

"zindagi dard ke sivaa kyaa hai ji mire yaar sochtaa kyaa hai hosh ki intihaa to hai vahshat aur vahshat ki intihaa kyaa hai rakh miri pyaas par nazar saaqi tu miraa zarf dekhtaa kyaa hai main sitam ko khulus kahtaa huun ye ghalat hai to phir bajaa kyaa hai apni koi khataa nahin 'ishrat' aur is se baDi khataa kyaa hai"

"tiri nafrat ko tiraa pyaar samajhtaa huun main dhuup ko saaya-e-divaar samajhtaa huun main saadgi dekh miri soch-samajh kar zaalim apni taqdir ko bedaar samajhtaa huun main baaz auqaat to is darja bahak jaataa huun doston ko bhi vafaadaar samajhtaa huun main meri taaid ko taaid samajhne vaale tere har lafz ko talvaar samajhtaa huun main mujh ko maalum hai anjaam-e-sadaaqat 'ishrat' khud ko har lamha sar-e-daar samajhtaa huun main"

"na main ne maut ko samjhaa na zindagaani ko kis aaine mein utaarun tiri javaani ko baDi shadid tamanna hai zindagaani ki kabhi qarib se dekhaa hai zindagaani ko bahut dinon se koi haadisa nahin guzraa taras rahaa hai qalam der se ravaani ko jigar ke daagh kisi ghaaT par nahin dhoe bahut sanbhaal ke rakkhaa tiri nishaani ko falak ke zulm zamaane ke haadse 'ishrat' nikal paDe hain mire ghar ki paasbaani ko"

"kaun se ghaaT chaDhe kis ki duaa le koi zindagi pyaas nahin hai ki bujhaa le koi jaagtaa huun ki is Iflaas-zada basti mein kis ko maalum mire khvaab churaa le koi dasht-e-haalaat mein yaadon se ham-aaghoshi-e-dil jaise ik eid tire saath manaa le koi apne gajre miri saanson mein piro de varna phuul ke saath chaman bhi na uDaa le koi khul gae qaafila-e-yaas ke parcham 'ishrat' har guzargaah-e-tamannaa ko sajaa le koi"

"ye kyaa maqaam tiri rahguzar mein aae hain koi bhi ghair nahin aur sab paraae hain hayaat jin ke tasavvur se jagmagaa uTThe vo taabnaak andhere kahaan samaae hain ye jurm hai to koi be-sabab nahin kartaa paDi hai choT jigar par to muskuraae hain ham aur dil ki tabaahi pe ghaur farmaaein ye haadse to kai baar pesh aae hain paDi hai jab bhi zarurat subut-e-yazdaan ki mire kivaaD zamaane ne khaTkhaTaae hain vo inqalaab na jaane kab aaegaa 'ishrat' jis inqalaab ki hasrat mein jug bitaae hain"

"talkhi-e-jabr-e-musalsal se bhare hain ham log laao koi bhi kasauTi ki khare hain ham log dekhte sab hain magar koi nahin Takraataa dahr mein surat-e-kohsaar dhare hain ham log vo mah-o-mehr taraashe the hamin ne ik din in dinon jin ke ujaalon se pare hain ham log vaadi-e-shauq mein kaanTe to nahin Takraae haan koi phuul uDaa hai to Dare hain ham log aaj bhi tesha-e-ayyaam ki zad par 'ishrat' kaasa-e-qais ki maanind dhare hain ham log"

"maah-paaron mein rahe zohra-jamaalon mein rahe ham bahar-haal tire chaahne vaalon mein rahe mere dam tak to farozaan rahi qindil-e-vafaa kyaa mire baad bhi insaan ujaalon mein rahe maabad-e-shab mein tapaae hue gulnaar badan muddaton aag ki maanind khayaalon mein rahe aur kis se khalish-e-dil kaa fasaana kahte jab ki ham khud bhi tumhein pujne vaalon mein rahe ham ne paayaa hai har ik Thos haqiqat se khiraaj vo shahanshaah nahin ham jo misaalon mein rahe vaadi-e-gul se churaae hue lamhe 'ishrat' Tiis ban ban ke miri ruuh ke chhaalon mein rahe"

"dil-e-raahat-talab bezaar bhi hai ye divaana zaraa hushiyaar bhi hai hamaari baat ki taaid kar ke hamaari baat se inkaar bhi hai lagaa kar dil ki baazi sochte hain agar jiite to apni haar bhi hai tabiat hi nahin maujud varna chaman mein phuul bhi hai khaar bhi hai tumhein is baat par hairat to hogi ki mujh ko zindagi se pyaar bhi hai bahut aasaan hai tark-e-mohabbat magar 'ishrat' zaraa dushvaar bhi hai"

"khizaan mile ki hamein mausam-e-bahaar mile yahaan vo dil hi nahin hai jise qaraar mile tamaam umr ibaadat ki nazr kar Daalun bas ek baar tabiat pe ikhtiyaar mile hamin ko tark-e-talab raas aa gai varna tire karam ke ishaare to be-shumaar mile sadaa rahe hain muqaddar ke ikhtiyaar mein ham kabhi hamein bhi muqaddar pe ikhtiyaar mile tamaam log samajhte the tum na aaoge tamaam log magar mahv-e-intizaar mile rahe kisi ki nigaahon mein ghair hi 'ishrat' ham ek baar mile yaa hazaar baar mile"

"chaak-daaman na hue chaak-garebaan hue ham tire baad bahar-haal pareshaan hue baarhaa ki hai talab daad-e-vafaa ham ne bhi dosto ham bhi kai baar pashemaan hue jise dekho vo faqiron ko jhiDak detaa hai ahl-e-duniyaa na hue aap ke darbaan hue ham-nashin qaht-e-muraavat ki tabaahi mat puchh shahr ke shahr mire saamne viraan hue maut likkhi hi nahin thi to kahaan se martaa muft 'ishrat' mire ahbaab pareshaan hue"

"bhalaa dil ki tabaahi par koi naashaad hotaa hai are ye ghar to aksar TuuT kar aabaad hotaa hai jise kuchh log kahte hain sukun-e-zindagi yaaro khudaa maalum vo jauhar kidhar ijaad hotaa hai vo yuun khaamosh baiThe hain vo yuun khaamosh baiThe hain ki bas irshaad hotaa hai ki bas irshaad hotaa hai chaman mein ho rahi hain mukhtalif sargoshiyaan kal se khudaa maalum kis kaa aashiyaan barbaad hotaa hai agar mahfil salaamat hai to 'ishrat' ham bhi dekheinge hamaare baad kaun aamaada-e-fariyaad hotaa hai"

"Thukraa ke sab ko teri tamanna kare koi tu bhi na mil sake to bataa kyaa kare koi itnaa muhaal bhi to nahin hai ilaaj-e-gham ik baar maut ki bhi tamanna kare koi shaayad nikaal duun main tiri yaad zehn se pahle tiraa javaab to paidaa kare koi nisbat nahin kisi ko kisi se kisi tarah phir bhi kisi ko ghair na samjhaa kare koi muddat se luT rahaa huun isi intizaar mein shaayad mire khulus kaa charchaa kare koi 'ishrat' mire khulus kaa anjaam dekh kar ab kis se dosti ki tamanna kare koi"