Ghazal

"junun shauq yaqin zaabte se aai hai uDaan mujh mein mire hausle se aai hai mujhe bhi to kabhi bainassutur mein rakhtaa phir aaj ek sadaa haashiye se aai hai bhulaanaa jab kabhi chaahaa hai main ne maazi ko nikal ke yaad tiri haafize se aai hai jise khayaal kaa markaz kabhi banaayaa thaa sunahri dhuup usi daaere se aai hai yaqin kar lo to aaeinge sab nazar apne tumhaare dil mein kaji vaahime se aai hai kiyaa hai main ne khud apnaa muhaasba aksar tamiz mujh mein isi tajrabe se aai hai jo main ne soch kaa badlaa hai zaaviya 'naayaab' har ek chiiz nazar qaaede se aai hai"

"ik justuju sadaa hi se zehn-e-bashar mein hai jab se mili zamin musalsal safar mein hai har-chand mere saath udaasi safar mein hai raushan charaagh-e-shauq magar chashm-e-tar mein hai mallaah kah rahaa hai ki saahil hai bas qarib lekin mujhe pata hai ki kashti bhanvar mein hai tum se kabhi jo bol na paayaa main ek baat ban kar khalish vo aaj bhi mere jigar mein hai barbaadiyon ki zad pe faqat shaakh-e-gul nahin gulshan tamaam nargha-e-barq-o-sharar mein hai jab se main un ke halqa-e-baiat mein aa gayaa 'naayaab' ek raushni fikr-o-nazar mein hai"

"main jab bhi koi manzar dekhtaa huun zaraa auron se haT kar dekhtaa huun kabhi main dekhtaa huun us ki rahmat kabhi main apni chaadar dekhtaa huun nazar kaa zaaviya badlaa hai jab se main kuuze mein samundar dekhtaa huun kabhi mere liye the phuul jin mein ab un haathon mein patthar dekhtaa huun sabhi hain mubtalaa-e-khud-farebi ajab duniyaa kaa manzar dekhtaa huun nahin badlaav ke aasaar kuchh bhi abhi haalaat abtar dekhtaa huun muqaddar mein likhi viraaniyon mein zaraa saa rang bhar kar dekhtaa huun nazar aataa hai madfan khvaahishon kaa kabhi jab apne andar dekhtaa huun sunaa hai aag hai us kaa saraapaa chalo baahon mein bhar kar dekhtaa huun basirat mujh mein hai 'naayaab' aisi main har qatre mein gauhar dekhtaa huun"

"harf se taasir lafzon se maani le gayaa jaate jaate vo miri jaadu-bayaani le gayaa us se thiin mansub jo yaadein suhaani le gayaa chhin kar mujh se sabhi apni nishaani le gayaa shaah-raah-e-zist par mujh ko akelaa chhoD kar jaane vaalaa mujh se lutf-e-zindagaani le gayaa mez par nanhaa saa ik kaaghaz kaa TukDaa chhoD kar zindagi ki har khushi vo naa-gahaani le gayaa ham udhar masruf the aur vaqt kaa sail-e-ravaan kyaa pataa kab chhin kar ham se javaani le gayaa muddaton se saakit-o-jaamid hai ye naayaab dil kaun is dariyaa ki maujon ki ravaani le gayaa"

"main ne koshish ki bahut lekin kahaan yakjaa huaa safha-e-hasti kaa shiraaza rahaa bikhraa huaa zehn ki khiDki khuli dil kaa daricha vaa huaa tab jahaan ke dard se rishta miraa gahraa huaa kyaa patta kab kaun us ki zad pe aa jaae kahaan vaqt ki raftaar se har shakhs hai sahmaa huaa kis ki yaad aai moattar ho rahe hain zehn-o-dil kis ki khushbu se hai saaraa pairahan mahkaa huaa peD ke niche shikaari jaal phailaae hue aur parinda shaakh par baiThaa Daraa sahmaa huaa do-qadam bhi ab tumhaare saath chalnaa thaa muhaal raah tum ne khud alag kar li chalo achchhaa huaa zindagi har zaaviye se dekhtaa huun main tujhe hai miri fikr-o-nazar kaa daaera phailaa huaa chhap gai paani mein apni chhab dikhaa kar jal-pari aaj phir 'naayaab' mere saath ik dhoka huaa"

"khud apne aap se ruThaa huaa huun samajhte hain vo main un se khafaa huun haqaaeq se churaa kar aankh apni main kin saayon ke pichhe bhaagtaa huun koi to raasta hogaa bataanaa tire dil tak pahunchnaa chaahtaa huun ba-zaahir hai hansi honTon pe mere magar andar se main TuuTaa huaa huun jahaan khud ko muqaffal kar rakhaa thaa main us kamre ki chaabi kho chukaa huun ye kis ne mujh ko bas mein kar liyaa hai ishaaron par main kis ke chal rahaa huun agarche haal hai taarik meraa sitaara aane vaale vaqt kaa huun tapaa huun aatish-e-dauraan mein 'naayaab' to ab jaa kar kahin kundan banaa huun"

"is tarah kho gayaa huun main apne vajud main ab khud ko DhunDtaa huun main apne vajud mein aadat si paD gai hai jo tanqis ki mujhe kiiDe nikaaltaa huun main apne vajud mein kuchh is tarah se Dhaae hain haalaat ne sitam gum ho ke rah gayaa huun main apne vajud mein tum to mire vajud kaa hissa na the kabhi kyon tum ko DhunDhtaa huun main apne vajud mein qaaem hai mujh mein mere takhayyul ki saltanat be-taaj baadshaa huun main apne vajud mein mujh par mire vajud kaa har naqs hai ayaan khud ek aaina huun main apne vajud mein 'naayaab' inqilaab-e-zamaana ki hai dalil badlaav dekhtaa huun main apne vajud mein"

"ab agar aur chup rahungaa main phir ye tai he ki phaT paDungaa main ek aisaa bhi vaqt aaegaa tum sunoge faqat kahungaa main naaz uThaaungaa naaz uThaane tak tere aage nahin bichhungaa main dekhnaa teri rahbari ke baghair apni manzil talaash lungaa main tum ko jaanaa hai shauq se jaao ab khushaamad nahin karungaa main jab kabhi tujh se saamnaa hogaa ajnabi ki tarah milungaa main kyaa sabab hai miri khamoshi kaa shor thamne do phir kahungaa main aaina rakh ke saamne 'naayaab' paagalon ki tarah hansungaa main"

"kyuun zulm Dhaa rahaa huun main apne vajud par kichaD uchhaaltaa huun main apne vajud par inkaar kar ke khud hi main apne vajud kaa ghussa utaartaa huun main apne vajud par kyaa chaahtaa huun khud se mujhe khud nahin pataa aur taan chhoDtaa huun main apne vajud par Dar hai koi churaa na le mujh se kabhi mujhe pahre lagaa rahaa huun main apne vajud par kar ke khud apne saare subuton ko mustarad ungli uThaa rahaa huun main apne vajud par 'naayaab' mujh se faiz uThaataa hai har koi kab daagh-e-bad-numaa huun main apne vajud par"

"achchhaa huun yaa buraa huun mujhe kuchh nahin pataa nazron mein tere kyaa huun mujhe kuchh nahin pataa kyaa tujh mein DhunDhtaa huun mujhe kuchh nahin pataa main teraa ho gayaa huun mujhe kuchh nahin pataa aagaah huun main manzil-e-maqsud se magar kis samt jaa rahaa huun mujhe kuchh nahin pataa aavaaz de rahaa hai mujhe kaun baar baar kis ke liye rukaa huun mujhe kuchh nahin pataa itnaa mujhe pataa hai tumhein huun aziiz main lekin tumhaaraa kyaa huun mujhe kuchh nahin pataa dimak ki tarah chaaT rahaa hai jo kaun hai kis gham mein ghul rahaa huun mujhe kuchh nahin pataa main khuub jaantaa huun ye manzil nahin miri aa kar kahaan rukaa huun mujhe kuchh nahin pataa rahtaa huun kis khayaal mein 'naayaab' in dinon kyaa kyaa main sochtaa huun mujhe kuchh nahin pataa"

"meri nazar mein us ki tab-o-taab aur hai kahte hain jis ko gauhar-e-naayaab aur hai sarshaar jis se ruuh ho vo giit hai judaa jo taar dil kaa chheDe vo mizraab aur hai maqsud jo mujhe hai ye taabir vo nahin jo dekhti hai aankh miri khvaab aur hai khulte hain jis se logon pe asraar-e-be-khudi meri kitaab-e-zist kaa vo baab aur hai hai zehn zindagi ke masaail se muntashir aur dil kisi ke ishq mein betaab aur hai apni jagah pe donon hi khush-rang hain magar taaus aur chiiz hai surkhaab aur hai ye vaar bhi hadaf se kahin duur jaa giraa tarkash mein tiir kyaa koi 'naayaab' aur hai"

"baais-e-aasudgi hai hashr-saamaani mujhe raas aati hai baDi mushkil se aasaani mujhe dekh kar teri inaayat aur tiraa lutf-o-karam khal rahi hai yaar apni tang-daamaani mujhe kar rahaa hai zehn mein gardish koi dhundlaa saa aks lag rahi hai us ki surat jaani pahchaani mujhe sochne kaa zaaviya main ne badal Daalaa hai dost ab pareshaani nahin lagti pareshaani mujhe saunp di us ne mujhe apne badan ki saltanat mil gai ho muflisi mein jaise sultaani mujhe luqma-e-girdaab hone hi ko thaa main aur phir dafatan aai nazar ik mauj-e-imkaani mujhe aaj phir khulne lagi hai mujh pe ramz-e-kaaenaat aaj phir hone lagi hai khud pe hairaani mujhe sochtaa huun uulaa misraa jab kabhi 'naayaab' main khud ko likhvaataa hai baDh kar misra-e-saani mujhe"

"har khataa us ki hamesha darguzar karti hui faaslon ko dil ki chaahat mukhtasar karti hui zehn-o-dil ki raushni ko tez-tar karti hui guftugu sidhe tiri dil par asar karti hui mere jazbon ke fusun mein qaid vo hotaa huaa us ke lahje ki khanak mujh par asar karti hui zindagi ki tez-gaami aur daulat ki havas aane vaale kal se ham ko be-khabar karti hui hausla detaa huaa saa mujh ko meraa e'timaad be-yaqini dil mein paidaa Dar pe Dar karti hui bholaa-pan aur saadgi par us ki main miTtaa huaa ek surat mohni si dil mein ghar karti hui kis ko ye maalum ai 'naayaab' nisbat kis ki hai mere har naqsh-e-qadam ko mo'atabar karti hui"

"mushkil mein Daaltaa huun main apne vajud ko aasaan banaa rahaa huun main apne vajud ko takmil chaahtaa huun main apne vajud ki har rukh se dekhtaa huun main apne vajud ko donon ke darmiyaan kahin kuchh hai mushtarak so tujh mein DhunDhtaa huun main apne vajud ko kar de na vaar mujh pe miraa main ye soch kar khud se bachaa rahaa huun main apne vajud ko apne vajud se nahin main mutmain abhi har lamha maanjhtaa huun main apne vajud ko ranj-o-alam ki bhaTTi mein 'naayaab' Daal kar kundan banaa rahaa huun main apne vajud ko"

"bayaan-e-haal mufassal nahin huaa ab tak jo masala thaa vahi hal nahin huaa ab tak nahin rahaa kabhi main is ki dastaras se duur miri nazar se vo ojhal nahin huaa ab tak bichhaD ke tujh se ye lagtaa thaa TuuT jaaungaa khudaa kaa shukr hai paagal nahin huaa ab tak jalaae rakkhaa hai main ne bhi ik charaagh-e-umid tumhaaraa dar bhi muqaffal nahin huaa ab tak mujhe taraash rahaa hai ye kaun barson se miraa vajud mukammal nahin huaa ab tak daraaz dast-e-tamannaa nahin kiyaa main ne karam tumhaaraa musalsal nahin huaa ab tak baras kuchh aur miri jaan TuuT ke mujh par ye khitta jism kaa jal-thal nahin huaa ab tak na aayaa baaz vo 'naayaab' apni fitrat se vafaa kaa shahr bhi jangal nahin huaa ab tak"

"ye kaun jalva-fagan hai miri nigaahon mein qadam qadam pe barastaa hai nuur raahon mein bharosa had se sivaa thaa mujhe kabhi jis par mire khilaaf hai shaamil vahi gavaahon mein supurdagi kaa ye aalam bhi kyaa qayaamat hai simaT ke yuun teraa aa jaanaa meri baahon mein tiri panaah mein rah kar bhi jo nahin mahfuz miraa shumaar hai aise hi be-panaahon mein kab aasmaan kaa phahTtaa hai dil ye dekhnaa hai badal rahi hain miri siskiyaan karaahon mein main kaise pesh karun daavaa paarsaai kaa main ek umr mulavvis rahaa gunaahon mein banaa hai jab se vo 'naayaab' ham-safar meraa bichhe hue hain masarrat ke phuul raahon mein"

"tamaasha apnaa sar-e-rah-guzar banaayaa jaae jo raahzan hai use raahbar banaayaa jaae saliqa ye bhi to hai sar uThaa ke jiine kaa jo ham mein aib hain in ko hunar banaayaa jaae tamaam umr isi kaam mein rahe masruf har ek dil mein mohabbat kaa dar banaayaa jaae khushi kaa kyaa hai hamesha fareb deti hai to apne gham ko hi ab mo'atabar banaayaa jaae jahaan na paD sake saaya bhi koi nafrat kaa mohabbaton kaa ik aisaa nagar banaayaa jaae abhi nuqush numaayaan nahin hue hain mire taraash kar mujhe baar-e-digar banaayaa jaae koi nahin abhi tayyaar saath chalne ko so apne saae ko hi ham-safar banaayaa jaae sab apni zaat mein gum hain ye soch kar 'naayaab' paraae dard ko kyuun dard-e-sar banaayaa jaae"

"apne hisaar-e-zaat mein uljhaa huaa huun main yaani ki kaaenaat mein uljhaa huaa huun main qaabu mein aaj dil nahin kyaa ho gayaa mujhe phir aaj khvaahishaat mein uljhaa huaa huun main jaise ki hone vaali hai anhoni phir koi har-pal tavahhumaat mein uljhaa huaa huun main kuchh apnaa farz pyaar tiraa fikr-e-rozgaar kitne hi vaardaat mein uljhaa huaa huun main fursat kahaan banaaun maraasim nae nae pichhle taalluqaat mein uljhaa huaa huun main sab hain asir-e-ranj-o-alam is jahaan mein tanhaa kahaan hayaat mein uljhaa huaa huun main 'naayaab' jab nahin hai vafaaon kaa us ko paas phir kyuun takallufaat mein uljhaa huaa huun main"

"kahaa hai main ne ye kab maahtaab mil jaae mujhe to bas miri aankhon kaa khvaab mil jaae main is gali se yahi soch kar guzartaa huun kitaab-e-zist kaa gum-gashta baab mil jaae sabhi gunaah main hans kar qubul kar lungaa faqih-e-shahr kaa tujh ko khitaab mil jaae mile faqat mire hisse ki raushni mujh ko talab kahaan hai koi aaftaab mil jaae ba-qadr-e-zarf hi garche savaal hai meraa ajab nahin ki mujhe be-hisaab mil jaae main bahr-e-fikr mein huun gharq is liye 'naayaab' guhar mujhe bhi koi zer-e-aab mil jaae"

"miri balaa se zamaana khilaaf ho jaae main chaahtaa huun tiraa zehn saaf ho jaae ye abr-paara nahin dost ashk-e-girya hai ye pattharon pe gire to shigaaf ho jaae agar hai shauq baDon se mukaalme kaa tujhe durust pahle tiraa shiin qaaf ho jaae rahe khayaal ki aae na ehtiraam mein farq agar kisi se tiraa ikhtilaaf ho jaae charaagh ham ne mohabbat ke kar diye raushan havaa kaa khauf kise hai khilaaf ho jaae ab is tarah jo mujhe rad karoge mumkin hai tumhaari zid mein miraa e'tiraaf ho jaae"