Ghazal

"aisaa bhi kyaa huaa hai mire ghar ke saamne har koi aa khaDaa hai mire ghar ke saamne ye kaun shakhs hai jo dukhon se ladhi hui gaaDi lagaa gayaa hai mire ghar ke saamne ik to mujhe bhi pine-pilaane kaa shauq hai us par ye mai-kada hai mire ghar ke saamne kyaa soch kar main niklun Tahalne ba-vaqt-e-shaam jangal bahut ghanaa hai mire ghar ke saamne mere nasib mein hi nahin dekhnaa use yuun to vo rah rahaa hai mire ghar ke saamne fursat mile to ek mulaaqaat kijiye mahfuz ik jagah hai mire ghar ke saamne khairaat de to di hai tujhe ai bhikaariyo ab kis liye rukaa hai mire ghar ke saamne 'jaaved' chal ke dekh kahin khud tu hi nahin ye jo maraa paDaa hai mire ghar ke saamne"

"ye jo ghurbat kaa maaraa lag rahaa hai mohabbat mein bhi haaraa lag rahaa hai na-jaane aasmaan par kyaa hai raushan zamin se to sitaaraa lag rahaa hai haqiqat mein hamaaraa kuchh nahin par hamein sab kuchh hamaaraa lag rahaa hai miyaan ye aankh tai karti hai ham ko koi kab kitnaa pyaaraa lag rahaa hai kabhi fursat mein yaad aaeinge tum ko abhi to dil tumhaaraa lag rahaa hai"

"karun jo koshish to tujh diye ko jalaa hi lungaa mujhe yaqin hai main tujh ko apnaa banaa hi lungaa jahaan zamaane ki talkhiyon ko main jheltaa huun vahaan main tere bhi chaar nakhre uThaa hi lungaa ye meri apni hi Dhiil hai yaa khafaa hai tu bhi main jab manaane pe aa gayaa to manaa hi lungaa main maantaa huun ki main musavvir nahin huun koi tumhaari aankhein to yaar lekin banaa hi lungaa mire kiye par tamaam gaanv ke log khush the mujhe yaqin hai main sab gharon se duaa hi lungaa charaagh saare ke saare be-shak na bach sake par main apne hisse kaa ik diyaa to bachaa hi lungaa mujhe biThaane ki tujh ko koi na fikr hogi main aa gayaa huun to phir jagah bhi banaa hi lungaa"

"taghayyuraati kamaal hone mein din lageinge hamein dobaara bahaal hone mein din lageinge ham itni jaldi kabhi kisi par khule nahin hain tumhein hamaaraa malaal hone mein din lageinge abhi abhi to judaa hue ho abhi kahaan ye hamaare baare savaal hone mein din lageinge hamaari aankhein to ratjagon ne kured Daalin tumhaari aankhon ko laal hone mein din lageinge ye jism behis hai yaar lekin maraa nahin hai suno abhi intiqaal hone mein din lageinge"

"gulaab samjhaa huaa thaa jin ko vo khaar nikle hamaare dushman hamaare apne hi yaar nikle kabhi kabhi dard dil mein nikle to yuun lage hai ki jaise mere badan se kuchh aar-paar nikle vo log jo khud ko zabt kaa rab bataa rahe the paDi jo mushkil to ek jhaTke ki maar nikle main haq pe huun jaan kar bhi koi nahin mire saath mukhaalifat mein miri magar be-shumaar nikle usi ke dil par asar nahin ho sakaa vagarna hamaari aankhon se ashk to baar baar nikle hamaari qismat mein Dubnaa likh diyaa gayaa thaa vagarna jo log saath the vo to paar nikle main chaahtaa huun tu mujh pe bilkul na jaae beTaa main chaahtaa huun ki tu ibaadat-guzaar nikle zabaan nahin saath de saki meraa 'mehdi' varna miri to koshish yahi thi dil kaa ghubaar nikle"

"kyaa karun ai khudaa nahin jaataa dil se vo bevafaa nahin jaataa ek lamha sukun bhi de de dard har pal sahaa nahin jaataa maalika tujh se ek shikva hai vaise mujh se kiyaa nahin jaataa masala ye hai us ke gaanv ko dusraa raasta nahin jaataa aa bhi jaae havaa kaa jhonkaa gar sab diye to bujhaa nahin jaataa ho sake to palaT ke aa jaao ab akele rahaa nahin jaataa yaad rakhnaa ye jo mohabbat hai is safar mein rukaa nahin jaataa"

"kitnaa main aur chal ke dikhaaun mire khudaa dukhne lage hain ab mire paanv mire khudaa har pal ki dhuup mere badan ko jalaa na de likh de mire nasib mein chhaanv mire khudaa phir kyaa mujhe parinde banaa leinge apnaa dost ghar mein agar main peD lagaaun mire khudaa har shakhs apne aap mein gum ho ke rah gayaa aise mein ab main kis ko bulaaun mire khudaa soe nahin ye log to murda hain sab ke sab in ko bataa main kaise jagaaun mire khudaa tujh ko ye naagavaar guzarnaa hai varna main shikva karun tamaashaa lagaaun mire khudaa koshish yahi hai meri jahaan bhi andheraa ho pahlaa diyaa vahaan main jalaaun mire khudaa"

"ik bevafaa ki yaad se laDte hue mare ham aise bad-nasib sanbhalte hue mare nikli hai jaise jaan hamaari khudaa kare aise na koi aur taDapte hue mare parvardigaar ham ko mohabbat nahin mili ham log us ghizaa ko taraste hue mare ham ko hamaari maut kaa dukh is liye bhi hai ham log ehtiyaat se chalte hue mare teri hi zid thi dostaa tere liye koi taa-umr teraa raasta takte hue mare ham saans saans dard ki aaghosh mein rahe ham saans saans dard se marte hue mare is vaaste hi qimatein rakkhi hain barqaraar ham jaante the ham jahaan saste hue mare"

"ye dil khaamosh kuchh aise huaa hai mujhe lagtaa hai jaise mar chalaa hai khudaayaa khair mere lashkaron ki diyaa jaltaa huaa bujhne lagaa hai main sach kaa saath detaa huun hamesha mire jitnaa kahaan koi buraa hai miri jaan main to phir bhi aadmi huun yahaan logon ko rab se masala hai kahaa to kuchh nahin hai main ne aisaa jo tu mujh se khafaa hone lagaa hai tire bin ji nahin lagtaa hai meraa mohabbat ye nahin to aur kyaa hai tabaahi phailti hi jaa rahi hai khudaavandaa ye sab kyaa ho rahaa hai"

"ulajhte rahte hain jaane kyon baar-baar mujh se yahaan pe kuchh log hain jo jalte hain yaar mujh se main ek din khul ke bol baiThaa thaa aakhirat par bigaD gae us ke baad sab duniyaa-daar mujh se ajiib dukh hai main aaj us mein khaTak rahaa huun jo aankh dekhi nahin gai ashk-baar mujh se palaT ke aa jaa ki baat bas mein nahin rahi ab sanbhal nahin paa rahaa dil-e-be-qaraar mujh se ye sab tufail-e-gham-e-shab-e-hijr hai miri jaan jo sher hone lagaa hai ab shaandaar mujh se huaa kuchh aise ki main buDhaape ko aan pahunchaa phir is se aage huaa nahin intizaar mujh se kisi ki baaton mein aa gayaa hai vo shakhs 'mehdi' vagarna chaahat to thi use be-shumaar mujh se"

"charaagh kaa qad baDhaane vaalon ki khair yaa rab havaa ko dushman banaane vaalon ki khair yaa rab musaafiron ko jo dhuup mein chhaanv de rahe hain ye peD-paude lagaane vaalon ki khair yaa rab ham is se pahle to sirf nafrat ko jaante the hamein mohabbat sikhaane vaalon ki khair yaa rab main Dar rahaa huun ki bhaav roTi kaa baDh gayaa hai ye zahr sastaa hai khaane vaalon ki khair yaa rab ye khud hi mujh ko bulandiyon par biThaa rahe hain ki mujh ko nichaa dikhaane vaalon ki khair yaa rab main sadqe jaaun ki kitni shirin zabaan hai urdu charaagh-e-urdu jalaane vaalon ki khair yaa rab ham aise shaair unhin ke dam par uchhal rahe hain sukhan ki bazmein sajaane vaalon ki khair yaa rab"