Ghazal

"ik gosha-e-dil mein jo kisi ke hain makin ham ye zoam hai goyaa ki hain vaali-e-zamin ham jaari hai dilon kaa to vahi rabt-e-nihaani har-chand kahin aur hain vo aur kahin ham kyaa hai ye makaan kyaa ye dayaar aur ye jahaan kyaa ye auj hai apnaa ki jahaan vo hain vahin ham ye moajaza-e-ishq hai ik zinda haqiqat aate hain nazar aaj jahaan bhar mein hamin ham vaan apni rasaai na sahi dar to hai us kaa hote nahin aghyaar se yuun chin-ba-jabin ham har ik mein nazar aati hain kuchh us ki adaaein ulfat na kisi aur se kar baiThe kahin ham jo chaahe kahe iizaa de yaa kuchh kare tazlil dar chhoD ke us kaa nahin jaa sakte kahin ham parvaana-e-jannat hamein dilvaate hain kyuun aap kah to diyaa sau baar ki jaaeinge nahin ham nazzaara-e-aalam hai bas ik khvaab-e-pareshaan bedaar hue gar nazar aaeinge hamin ham duniyaa mein hai nairangi-e-taqdir tamaashaa the aabla-paa kal to hain ab takht-nashin ham uff ik dil-e-'rahbar' pe hasinon ki ye takraar lalchaaein hamin ham ise paa jaaein hamin ham"

"adu-e-din-o-imaan dushman-e-amn-o-amaan nikle tire paikaan baDe jaabir baDe naa-mehrbaan nikle adaaon ne lubhaayaa di nigaah-e-naaz ne daavat magar alfaaz dil-shikani mein meri kaamraan nikle mukar lo ishq se lekin sar-e-mahshar na kahnaa kuchh vahaan par kaun jaane koi apnaa raaz-daan nikle tumhaari bazm hai rutbe mein jannat se bhi baalaa-tar yahaan piiri mein aae ham magar ho kar javaan nikle baDaa charchaa hai koh-e-tur kaa vaadi-e-aiman kaa bahut aghlab hai vo dar-parda meri daastaan nikle bayaabaan mein chaman mein dasht mein yaa koh-e-viraan mein khudaa jaane kahaan pahunche jo su-e-aashiyaan nikle hamaari maut bhi ik mauj hai dariyaa-e-hasti ki bas ik ghota lagaanaa hai yahaan Duube vahaan nikle mo'attar kar gai bu-e-vafaa maahaul-e-aalam ko mire har qatra-e-khun se hazaaron gulsitaan nikle chhupe hain saat pardon mein ye sab kahne ki baatein hain unhein meri nigaahon ne jahaan DhunDaa vahaan nikle ye vaqt-e-naz' kaisaa kaisi takmil-e-hayaat ai dil ummidein kab huiin puuri abhi armaan kahaan nikle khudaa kaa shukr be-daam-o-diram the mai-kade mein ham magar pir-e-mughaan apne puraane mehrbaan nikle haqiqat ko jo dekhaa ik nai duniyaa nazar aai sitam goyaa karam thaa dushman-e-jaan paasbaan nikle mohabbat mein luTe lekin bahut achchhe rahe 'rahbar' gumaan thaa jin pe rahzan kaa vo mir-e-kaarvaan nikle"

"aaj mahfil mein nae sar se sanvar aaeinge un ko maa'lum hai kuchh ahl-e-nazar aaeinge ru-ba-ru yaar ke gar baar-e-digar jaaeinge kar ke ham ek baDaa maa'rka sar aaeinge ye to dhamki hai ki vo ghair ke ghar jaaeinge ham-nashin dekhnaa hir-phir ke idhar aaeinge sabr karne ko jo kahte hain nahin aate hain kyaa mire zakhm-e-jigar aap hi bhar aaeinge kaun ummid meri aap se puuri hogi kaun armaan mere aap se bar aaeinge laakh pardon mein rahein mujh se nihaan roz-ba-roz khvaab mein vo mujhe har shab ko nazar aaeinge dar se phir us but-e-pur-fan ke hamaare naale saaf zaahir hai ki maayus-e-asar aaeinge chashm-e-binaa se jo dekheinge miraa parda-e-dil ai masihaa kai naasur nazar aaeinge koi kah do ki bas ab aur tavaqquf na karein varna ham ji se guzarne pe utar aaeinge naa-tavaani se hamaari tujhe kyaa teraa sanbhaal ham tire saamne phir sina-sipar aaeinge aazmaaeinge gham-e-hijr kaa ik aur ‘ilaaj kar ke sahraa mein kuchh ayyaam basar aaeinge rahbari khaak rah-e-'ishq mein in se hogi dil agar hazrat-e-'rahbar' kahin dhar aaeinge"

"zakhm kyaa ubhre hamaare dil mein un ke tiir ke gul khile goyaa ki khvaab-e-'ishq ki taa'bir ke paasbaan ne gham diyaa aur ham-damon ne jaan li aaj qaail ho gae ham gardish-e-taqdir ke khud likhi hai khun-e-dil se 'ishq ki har daastaan zer-e-ehsaan main nahin huun kaatib-e-taqdir ke rakh diyaa hai likhne vaale ne kaleja chiir kar hai musannif munkashif har lafz mein tahrir ke main ne jab maayus ho kar honT apne si liye phir ho kyuun mushtaaq itne tum meri taqrir ke phir vahi saudaa vahi vahshat vahi tarz-e-junun hain nishaan maujud saare 'ishq ki taasir ke justuju-e-did mein phirte hain sar-gardaa mudaam har qadam par hain muqaabil aap ki tasvir ke be-kason maa'sum ki mushkil-kushaai kijiye chhuTnaa chakkar se hai gar aasmaan-e-pir ke khidmat-e-har-mustahiq vo kaar-gar tadbir hai qufl khul jaate hain jis se bandish-e-taqdir ke dekhte hain dusron ki aankh ke til mein bhi 'aib be-khabar hain lekin apni aankh ke shahtir ke tum faraaez-mansabi anjaam do 'rahbar' faqat mat paDo jhagDe mein tum taqdir-o-tadbir ke"

"haalat jo yahi ai dil-e-naashaad rahegi basti tire armaanon ki aabaad rahegi is husn-parasti kaa yahi hashr hai honaa kul umr miri ishq mein barbaad rahegi miT jaaeinge duniyaa se bhi ham diid ke guzre gar ai but-e-kaafir yahi be-daad rahegi kis ji se bhulaaungaa tujhe ai rukh-e-jaanaan taa-roz-e-abad mujh ko tiri yaad rahegi ik umr-e-asiri hi sahi jism mein ai ruuh daaim to na ye qaid ki miaad rahegi lab tak nahin aaegaa tire naam bhi meraa par dil mein lagaataar miri yaad rahegi ik dasht-e-junun se dil-e-vahshi ko nikaalaa 'rahbar' ye tiri raahbari yaad rahegi"

"tujhe gar paas-e-ghairat ai sitamgar ho nahin saktaa to dil bhi shaaki-e-taazir-e-khanjar ho nahin saktaa main tark-e-baada-noshi ke liye muddat se koshaan huun magar ye kaam puuraa qabl-e-mahshar ho nahin saktaa bulaa kar baat puchhein ru-ba-ru apne to ro denaa dalaael kaa asar kuchh is se behtar ho nahin saktaa shikaayat tujh se kyaa saaqi ki hai taakhir kaa aadi sitam duniyaa mein lekin is se baDh kar ho nahin saktaa sukun-o-zabt ki to ham-nashin main intihaa kar duun magar mujh ko vo yusuf ab mayassar ho nahin saktaa pilaae jaa ki main madhosh ho jaaun to tu maane ki mai-noshi mein koi mujh se baDh kar ho nahin saktaa sukhan-saazi mein laazim hai kamaal-e-ilm-o-fan honaa mahz tuk-bandiyon se koi shaaer ho nahin saktaa hunar-mandon ki har majlis se ye aavaaz aati hai ki naadaan kaa koi duniyaa mein 'rahbar' ho nahin saktaa"

"kaanon ko hai bhaai hui taqrir kisi ki aankhon mein samaai hui tasvir kisi ki kuchh 'ishq mein chalti nahin tadbir kisi ki sar phoD jo rah jaae hai taqdir kisi ki har zarre mein hai jalva har ik qatre mein hai aab hai arsh pe chhaai hui tanvir kisi ki andaaz buton ke nahin aate hain nazar mein rahti hai nigaahon mein jo tasvir kisi ki khat paDh ke kahin aur bigaD baiThe na yaarab yaad aai hai abru dam-e-tahrir kisi ki ye girya-o-zaari dil-e-betaab kahaan tak rusvaa kahin ho jaae na taqsir kisi ki ik muntazir-e-did ki pathraa gaiin aankhein taakhir kisi ki hui taa'zir kisi ki main fakhr se kahtaa huun mujhe tum se hai ulfat baDhti hai tire naam se tauqir kisi ki rukh pher magar sar na hile dekh ki zaalim aTki hai tiri zulf mein taqdir kisi ki mehmaan hai koi din ke, chale jaaeinge 'rahbar' baiTheinge nahin daab ke jaagir kisi ki"

"main khud hi khvaab-e-ishq ki taabir ho gayaa goyaa har ik bashar tiri tasvir ho gayaa apne kiye ko aa ke zaraa dekh tir-gar tar khun-e-dil se daman-e-nakhchir ho gayaa phir pesh aa gayaa vahi dilchasp haadisa dil phir kisi ke daam mein taskhir ho gayaa ye vaz-e-aashiqaan ye andaaz-e-ehtiraam aakhir miraa khayaal use dil-gir ho gayaa aasudgi nasib salimuttaba huun main mujh ko gharib-khaana hi kashmir ho gayaa vaabasta mujh se honaa hai khud vajh-e-aafiyat divaana teraa vaali-e-taqdir ho gayaa tafrid khud zariya-e-jaah-o-jalaal hai main teraa ho ke saahab-e-tauqir ho gayaa to khuub jaantaa hai ki main kaun thaa kabhi aur dekh ab ki kyaa falak-e-pir ho gayaa honaa thaa hashr-e-hasrat-o-hirmaan agar yahi 'rahbar' zah-e-nasib ki tu piir ho gayaa"

"aavaara saa galiyon mein jo main ghuum rahaa huun zaahir hai tiri diid se mahrum rahaa huun phir aankhein bichhaae hue huun raah mein us ki phir har kisi rah-rav ke qadam chuum rahaa huun ye hai miri bedaari-e-qalbi ki hi ik vaza har-chand tiri bazm mein main jhuum rahaa huun ghaddaari-e-ulfat to nahin hai miraa sheva is jurm ke hi khyaal se maasum rahaa huun khush-qismati-e-ahl-e-junun hai miraa hissa aasaaish-e-duniyaavi se mahrum rahaa huun main baargah-e-husn se maayus na aataa gham hai vale taqdir mein maghmum rahaa huun huun kyaa ki jo vo qadr bhi karte miri 'rahbar' ik harf huun aur harf bhi mauhum rahaa huun"

"tasvir-e-ru-e-yaar dikhaanaa basant kaa aTkheliyon se dil ko lubhaanaa basant kaa har samt sabza-zaar bichhaanaa basant kaa phulon mein rang-o-bu ko luTaanaa basant kaa rashk-e-jinaan chaman ko banaanaa basant kaa har har kali mein rang dikhaanaa basant kaa paighaam-e-lutf-e-khaas sunaanaa basant kaa dariyaa-e-faiz-e-aam bahaanaa basant kaa qudrat ki barkatein hain khazaana basant kaa kyaa khuub kyaa ajiib zamaana basant kaa dil ko bahut aziiz hai aanaa basant kaa 'rahbar' ki zindagi mein samaanaa basant kaa"

"kahin se ghair jo pahlu mein aae baiThe hain isi liye vo hamein yuun bhulaae baiThe hain zaraa samajh ke karo ham se apne gham kaa bayaan ham ek umr ke sadme uThaae baiThe hain kabhi khayaal mein apne mujhe nahin laae vo muddaton se mire dil mein aae baiThe hain kahaan se loge vo surat vo kam-sini kaa jamaal ham apne gosha-e-dil mein chhupaae baiThe hain khudaa kaa shukr hai un ko khayaal to aayaa ki vo kisi ki nazar mein samaae baiThe hain dharaa hi kyaa hai mohabbat mein be-kasi ke sivaa ham apne aap muqaddar banaae baiThe hain nigaah-e-naaz ke taalib hain rahguzar mein tiri isi firaaq mein dhuni ramaae baiThe hain kisi ko dekh liyaa thaa kahin pe naadaan ne tabhi se khud ko ye hazrat lubhaae baiThe hain"

"hairaan huun dil kaa haal chhupaaun kahaan kahaan sab jaan gae baat banaaun kahaan kahaan ik chiiz zakhm-e-dil hai dikhaaun kahaan kahaan ik baat soz-e-dil hai sunaaun kahaan kahaan do chaar hon maqaam to tirath bhi kar bane har jaa jo tu rahe to main jaaun kahaan kahaan har shai mein har bashar mein nazar aa rahaa hai tu sajde mein apne sar ko jhukaaun kahaan kahaan sahraa sahi nasib mein par kyaa meri saat ik musht-e-khaak khaak uDaaun kahaan kahaan mahfil mein mai-kade mein ki bazm-e-raqib mein batlaa ki tujh se aankh churaaun kahaan kahaan ik dasht-e-laa-hisaab mein khoyaa gayaa hai dil 'rahbar' ab us ko DhunDne jaaun kahaan kahaan"

"phir dil ne kahaa pyaar kiyaa jaae kisi ko jaise bhi ho hamvaar kiyaa jaae kisi ko yuun yaad lagaataar kiyaa jaae kisi ko aamaada-e-izhaar kiyaa jaae kisi ko kam-hausla hai koi mohabbat mein to phir kyuun be-kaar giraan-baar kiyaa jaae kisi ko maashuq ki marzi mein hi aashiq ki razaa hai mashhur khataa-vaar kiyaa jaae kisi ko dil us kaa jigar us kaa hai jaan us ki ham us ke kis baat se inkaar kiyaa jaae kisi ko saaqi ki inaayat hai to mai-kash ko hai kyaa uzr aasuda o sarshaar kiyaa jaae kisi ko ik kaif thaa saaghar mein to ham ban gae kaifi sharminda na be-kaar kiyaa jaae kisi ko hai be-kasi be-gunah to phir kyuun mere sarkaar rusvaa sar-e-darbaar kiyaa jaae kisi ko samjhaayaa bahut ham ne pe 'rahbar' ko ye zid hai sharminda-e-kirdaar kiyaa jaae kisi ko"

"ab jo ham ziist mein bezaar nazar aate hain har taraf apne kharidaar nazar aate hain vo hamein makhzan-e-asraar nazar aate hain ham unhein aashiq-e-bezaar nazar aate hain ham ko mai-khvaar hi mai-khvaar nazar aate hain sab mai-e-ishq se sarshaar nazar aate hain bad-zani zulm-o-sitam hajv-e-sanam rusvaai ishq mein to baDe aazaar nazar aate hain sab kaa dil lete hain aur apnaa nahin dete hain aap ham ko baDe hoshyaar nazar aate hain khatm mujh par hi nahin ishq masihaa mere mujh ko to aap bhi bimaar nazar aate hain ab jo rusvaai pe meri unhein dard aayaa hai baaryaabi ke kuchh aasaar nazar aate hain dasht-paimaai se jab aabla-paa sotaa huun khvaab mein aap guhar-baar nazar aate hain ek vo hain ki zamaane mein hai shohra jin kaa ek ham mulk pe jo baar nazar aate hain kuDe-karkaT kaa milegaa na vilaayat mein nishaan hind mein har taraf ambaar nazar aate hain kis se shikva karun 'rahbar' ki sabhi ab to mujhe mere dilbar ke talabgaar nazar aate hain"

"jiye jaa rahaa huun tujhe yaad kar ke tasavvur ki duniyaa ko aabaad kar ke pashemaan hain ham arz-e-rudaad kar ke karam hi kiyaa tum ne be-daad kar ke mujhe is ki mutlaq shikaayat nahin hai sitam par sitam laao ijaad kar ke kahaan rahiye apnon se kar ke kinaaraa milaa kyaa hai ghairon se fariyaad kar ke hamein vaasta aise sayyaad se hai ki jo said rakhtaa hai aazaad kar ke buraa kar rahe hain tiraa naam le kar khataa kar rahe hain tujhe yaad kar ke mohabbat si shai us ne mujh ko ataa ki ki khush khush chalun umr barbaad kar ke jo chaaho shumaar apnaa ahl-e-sukhan mein paDho sher 'rahbar' ko ustaad kar ke"

"gila-shikva kahaan rahtaa hai dil ham-saaz hotaa hai mohabbat mein to har ik jurm nazar-andaaz hotaa hai labon par qufl aankhon mein lihaaz-e-naaz hotaa hai mohabbat karne vaalon kaa 'ajab andaaz hotaa hai ishaare kaam karte hain mohabbat mein nigaahon ke nigaahon se hi baaham inkishaaf-e-raaz hotaa hai guzarti hai jo us par sab gavaaraa kartaa hai khush khush jafaaon se tumhaari dil kahaan naaraaz hotaa hai har ik se ham to be-shak karte hain talqin ulfat ki baDaa taqdir vaalaa hi koi ham-saaz hotaa hai sukun-e-qalb haasil hai pareshaan main nahin dilbar jo tum se duur hotaa hai vahi naa-saaz hotaa hai main huun shaaki o naazaan to faqat is rasm-e-duniyaa se vahi ghammaaz ho jaataa hai jo hamraaz hotaa hai nahin hai gar ye duniyaa bhi haqiqat se hi vaabasta to kyuun dil is ki jaanib maail-e-parvaaz hotaa hai baDi tabdiliyaan hoti hain ulfat un se hone par zamir-e-khud-gharz kaa saaz-e-be-aavaaz hotaa hai samajhte hain hamin hain hukmaraan is saare 'aalam ke nazar mein jab hamaari vo hasin andaaz hotaa hai nazar aataa hai har su jalvaa-e-anvar mein gharq 'aalam dil-e-pur-kaif behis dar-haqiqat baaz hotaa hai judaa-gaana magar andaaz hotaa hai har 'aashiq kaa machaataa hai koi ghul koi be-aavaaz hotaa hai safar manzil-ba-manzil tai kiyaa jaataa hai ulfat kaa baDi muddat mein sar vo baargaah-e-naaz hotaa hai vahi hai kaamraan 'aashiq jo us ko paar kar jaae dilon ke darmiyaan jo ik jahaan-e-raaz hotaa hai baDhaa aur un se vaaqif ho ki aazaar-e-gham-e-furqat dui ke farsh kaa ehsaas be-andaaz hotaa hai tanaasukh hai musalsal ibtadaa-e-aafrinash mein hayaat-e-jaavedaan mein kaun dakhl-andaaz hotaa hai na ham-pesha na ham-khaana na ham-pyaala na ham-bistar vahi apnaa hai 'rahbar' jo bhi ham-aavaaz hotaa hai"

"kuchh na puchho ru-ba-ru jaa kar kisi ke kyaa huaa TikTiki bandhne na paai thi ki dil chaltaa huaa le gai dil ko kisi ki ik nigaah-e-avvalin main kisi ke husn par yak-baargi shaidaa huaa us lab-e-shirin pe meraa ek baar aayaa jo naam main ye samjhaa khushtari pahlu-e-qismat vaa huaa haal-e-hijraan puchhte kyaa ho ki surat dekh lo saaf zaahir hai mariz-e-gham gayaa-guzraa huaa huun saraapaa majma-e-ummid-o-yaas o intizaar dhire dhire chal rahaa hai yak-nafas ruktaa huaa raah kyaa sujhe mujhe duniyaa miri taarik hai hai kisi zulf-e-siyah mein dil miraa uljhaa huaa aql kaa thaa pher apni jo unhein samjhaa thaa ghair vo to bilkul jaan-e-jaan hain raaz ye ifshaa huaa tum miri taqdir mein ho aur phir kyaa chaahiye kaun saa matlab rahaa phir jo nahin puuraa huaa mujh ko samjhaayaa nahin naaseh udhar mat jaaiyo phir kahoge ''luT gae ham, dil hamaaraa kyaa huaa'' ham to hain maddaah us ke ham ko sab manzur hai jo huaa us ne kiyaa, jo kuchh huaa achchhaa huaa un ko paane se gharaz thi kuchh na thaa duniyaa se bair mil gae vo ham ko duniyaa hi mein aur achchhaa huaa aashiqi rahbar se sikho sar karo manzil ba-khair us kaa hai ye raasta achchhi tarah dekhaa huaa"