Ghazal

"huaa ik din mein ham se ghair achchhaa paDaa dar par kisi kaa pair achchhaa kahaa hai main ne jo dekhaa sunaa hai jo tum samjho buraa to khair achchhaa mohabbat ham se munh dekhe ki yaaro ho dil khoTaa to munh kaa bair achchhaa hamaare ru-ba-ru laao to us ko kaheinge ham haram se dair achchhaa miTaa kar chal diye vo naqsh-e-paa bhi hamein ghairon pe chhoDaa khair achchhaa musibat mein huaa koi na apnaa agar hamdard ho to ghair achchhaa vafaa ko bhi tiri vo jaur samjhe 'kanval' tu ne kamaayaa bair achchhaa"

"kyaa ho gayaa hai tujh ko mire dil sambhal sambhal aise to paanv rakhte hain ghaafil sambhal sambhal laayaa hai khinch tum ko jahaan zauq-e-mai-kashi lagti nahin ye dard ki mahfil sambhal sambhal ik umr paa ke khatm na ho jaae teraa pyaar hone lagi hai aarzu shaamil sambhal sambhal Dubegi raah-e-shauq mein le kar tujhe bhi saath manzil hai teri raah mein haail sambhal sambhal jis naakhudaa ko tu ne banaayaa thaa ham-safar thaamaa hai us ne daaman-e-saahil sambhal-sambhal toDe hain jis ko paane ki khaatir hazaar dil manzil nahin hai dhokaa hai ghaafil sambhal sambhal qurbaan-gaah-e-gulshan-e-hasti mein ai 'kanval' baiThe hain phul-phul mein qaatil sambhal-sambhal"

"ubhar aayaa rukh par hayaa kaa nagina jabin par na dekhaa thaa aisaa pasina chali aa rahi hai hasinon ki Toli zamin par hai qaus-e-quzah kaa qarina mire haath aa hi chalaa thaa kinaaraa lagaa Dubne mere dil kaa safina kasak soi rahti hai barson kabhi to jo jaage to jaage mahina mahina bhalaa kaun jaane vo aaein na aaein mire paas rahne hi do jaam-o-minaa kabhi tum ne dekhi hain pur-khaar raahein jo kahte ho ulfat ko phulon kaa ziina uDaa li jo chori se gaalon ki chuTki to bole 'kanval' bhi hai kitnaa kamina"

"nazar milne se pahle hi nazaaraa mil gayaa mujh ko ki tanhaa Duub jaane kaa sahaaraa mil gayaa mujh ko hayaat-o-marg ki manzil hui hai pyaar mein aasaan kinaare se kahin pahle kinaaraa mil gayaa mujh ko chubhan bhi saath laai hain uDaa kar nikhat-e-gul mein havaaon se pataa apnaa tumhaaraa mil gayaa mujh ko tasavvur aaj pahunchaa de mujhe aisi bulandi par ki tere khaas jalvon kaa ishaara mil gayaa mujh ko jhuki palkon ki pahnaai mein raqsaan hai bahaar-e-gul 'kanval' pal mein chaman saare kaa saaraa mil gayaa mujh ko"

"ik lahr uThi gham ki dil mein ummid kaa daaman chhuT gayaa ro ro ke armaan kahte hain dil TuuT gayaa dil TuuT gayaa gar naach rahe hain mor to kyaa kartaa hai papihaa shor to kyaa main janm jali fariyaad karun miraa piritam mujh se ruuTh gayaa barbaadi-e-dil kaa afsaana ham kis se kahein aur kaise kahein jab sunne vaalaa koi nahin jab dil hi apnaa TuuT gayaa zakhmon pe mire jo hanste hain duniyaa vaale gham us kaa nahin ai kaash buraa ho is dil kaa jo bhedi ban kar luuT gayaa"

"na to aaghaaz na anjaam pe ronaa aayaa apni diqqat ki har ik shaam pe ronaa aayaa ahl-e-mahfil ko hui shama ke jalne ki khushi mujh ko parvaane ke anjaam pe ronaa aayaa dil se ubhraa to nigaahon ke dariche se giraa ashk bante hue har jaam pe ronaa aayaa vaqt-e-rukhsat jo nigaahon ne tiri mujh ko diyaa yaas-o-ummid ke paighaam pe ronaa aayaa ham gharibon ki bhalaa subh kahaan shaam kahaan subh par ashk bahe shaam pe ronaa aayaa meri taqdir mein dar dar kaa bhaTaknaa thaa 'kanval' husn-e-aaghaaz ke anjaam pe ronaa aayaa"

"dekhnaa husn-e-talab kyaa maangne aayaa huun main ik mohabbat ki nazar bas pyaar kaa bhukaa huun main apni hasti ki khabar hai jaantaa huun kyaa huun main ek musht-e-khaak huun simTaa huaa sahraa huun main jis ke ik jalve ne divaana banaayaa hai mujhe us but-e-bedaad-gar ko DhunDhtaa phirtaa huun main aap ne apnaa liyaa to vaasta duniyaa se kyaa meri duniyaa aap hain aur aap ki duniyaa huun main ghair to kahte raheinge khair jaane dijiye Thiik kahte hain buraa huun kyaa kahun achchhaa huun main raat din jo aatish-e-furqat mein jaltaa huun 'kanval' khuub un ki bevafaai kaa mazaa letaa huun main"

"hai tamannaa koi na koi aas zindagi hai bahut udaas udaas kyon na gham ko gale lagaaun main kis ko aai hai shaadmaani raas manzilon ke qarib-tar hai vo ishq mein kho chukaa jo hosh-o-havaas kyaa karun aise doston ko main dost-daari ki jin mein bu hai na baas khair ho zabt-e-ishq ki yaarab ik chubhan si hai aaj dil ke paas meri divaangi hi kaam aai aaj pahnaa hai zindagi ne libaas ai 'kanval' maut se bhi bad-tar hai ziist jo ho ba-qaid-e-khauf-o-hiraas"

"uTh jaae darmiyaan se jo parda hijaab kaa paDh luun kitaab-e-husn se mazmun khvaab kaa apni nazar bhi Daal de saaqi sharaab mein dekhe koi to us ko ho dhokaa gulaab kaa zaahir pe kar naqaab to baatin pe kar nazar matlub hai nazaaraa jo us be-naqaab kaa us par tamaam khul gae arz-o-samaa ke raaz hamraaz ho gayaa jo tumhaari janaab kaa husn-o-jamaal-e-ishq se tharraa gai fazaa jaise gayaa ho chaunk vajud aaftaab kaa zau paae jis se ishq vo jalve bikher de fitrat mein rang bharnaa hai maqsad shabaab kaa allah re tamtamaate se chehre ki aab-o-taab phikaa paDe hai dekh ke rang aaftaab kaa aariz ke zer-o-bam pe nazar jam ke rah gai meri nazar mein khaak thaa shoala itaab kaa khaadim ke arz-e-haal pe kartaa hai sau savaal laDnaa hai laa-javaab se ik laa-javaab kaa rindon mein ek rind 'kanval' bhi hai dosto aashiq hai aise daur mein husn-e-sharaab kaa"

"shama ki lau se khelte dekhe hain main ne parvaane do ik to maut se khel rahaa hai ik kahtaa hai jaane do mere badan par tum barsaao pyaar ki shabnam husn ki aag yuun ghul-mil kar ek nazar se ham paDh lein afsaane do jin par jaan luTaa di main ne vo hi mujh se barham hain rone par paabandi hai to qahqaha ek lagaane do tum ne pilaai jitni pilaai dekho hain pyaase rind abhi saaqi-gari se haath na khincho sab ki duaa lo aane do mai se main tauba kar lungaa ye lo meri tauba hai pahle mere haathon mein apni aankhon ke mai-khaane do us kaa kaam hai kahtaa rahnaa apnaa kaam hai sun lenaa vaaiz bhi apnaa hai 'kanval' tum vaaz use farmaane do"

"yuun na piine mein basar umr ki har shaam karo shauq-e-rindi hai to saaqi se nazar aam karo phir na aaeinge nazar aise muqaddas chehre jo baqaa bakhshein unhein duniyaa mein vo kaam karo hai kudurat se to phir bhiik se Thokar achchhi apni badnaami se achchhaa hai miraa naam karo but hain das biis magar chaahne vaalaa dil ek ek ik kar ke mohabbat se unhein raam karo chheD do zikr kisi nargis-e-mastaana kaa saamne mere na tum zikr-e-mai-o-jaam karo tum ko fursat ho agar banne-sanvarne se nadim ishq farmaane se behtar hai ki aaraam karo jaisaa gum-sum hai 'kanval' choT hai gahri khaai aaj tum us ko rulaa do to baDaa kaam karo"