Ghazal

"musalsal ro rahaa huun phir bhi kyon rone se Dartaa huun jise paayaa nahin ab tak use khone se Dartaa huun bahut zarkhez hai dil ki zamin maalum hai lekin vafaa ke biij is miTTi mein phir bone se Dartaa huun sunahraa khvaab ban kar ik azaab aankhon pe utraa thaa zamaana ho gayaa par aaj bhi sone se Dartaa huun main jis kashti mein baiThaa us ko saahil ne Duboyaa hai kisi shaane pe apnaa bojh ab Dhone se Dartaa huun mujhe jis ne bhi apnaayaa vo mujh se kho gayaa 'kaashif' tire nazdik rah kar bhi tiraa hone se Dartaa huun"

"maqtal se baar baar guzaaraa gayaa hamein khanjar se pahle khauf se maaraa gayaa hamein in'aam baT rahaa thaa mohabbat mein sabr kaa majnun se thoDaa pahle pukaaraa gayaa hamein farhaad thak ke baiTh gayaa thaa jahaan kabhi bilkul usi jagah pe utaaraa gayaa hamein raajaa kaa beTaa raajaa nahin bantaa bante ham bas is liye kahaani mein maaraa gayaa hamein pahle karaa liyaa gayaa iqraar maut kaa phir zindagi ke ghaaT utaaraa gayaa hamein 'kaashif' vo khud ko jiit na paae bisaat par yaa'ni ki jaan-bujh ke haaraa gayaa hamein"

"hamaari aapsi ranjish jo pahle thi so ab bhi hai magar milne ki bhi khvaahish jo pahle thi so ab bhi hai main apni zid pe qaaem huun magar us ko bataa denaa vo samjhaute ki gunjaaish jo pahle thi so ab bhi hai vo divaaron mein chunvaane kaa manzar ab nahin dikhtaa mohabbat par magar bandish jo pahle thi so ab bhi hai hazaaron Thokarein raah-e-vafaa mein khaa chukaa lekin dil-e-naadaan ki laghzish jo pahle thi so ab bhi hai sunaa kar saari ghazlon kaa zakhira thak gayaa 'kaashif' magar logon ki farmaaish jo pahle thi so ab bhi hai"

"tapte sahraa mein koi phuul khilaane ke liye itnaa betaab na ho khaak uDaane ke liye daav par jaan lagaa di use paane ke liye ab mire paas bachaa kyaa hai ganvaane ke liye vaza-daari kaa tahaffuz koi aasaan nahin kitne sar kaT gae dastaar bachaane ke liye kuchh diyaa yaa na diyaa ham ko zamaane ne magar kuchh na kuchh chhoD ke jaaeinge zamaane ke liye main ne bhi dekh liyaa pyaar bhari nazron se vo bhi par taul rahaa thaa idhar aane ke liye halke logon ko na hamraaz banaanaa 'kaashif' sukhe patte hain faqat shor machaane ke liye"

"vo garm-joshi kaa izhaar kar diyaa us ne ki barf thaa main sharar-baar kar diyaa us ne thi us ke qurb mein jaise koi masihaai chalaa gayaa hai to bimaar kar diyaa us ne bas ek iinT ghalat-fahmi ki paDi mujh se us ek iinT ko divaar kar diyaa us ne ujaaD dil pe ghaTaa ban ke is tarah barsaa sulagte dasht ko gulzaar kar diyaa us ne bahut yaqin thaa iqraar kaa magar 'kaashif' kise bataaein ki inkaar kar diyaa us ne"

"roz samjhauton ke zahraab piye jaa rahe hain kaise jiinaa thaa hamein kaise jiye jaa rahe hain dil bhi kambakht ho jaise kisi muflis kaa libaas jitnaa phahTtaa hai bas utnaa hi siiye jaa rahe hain yaad karte hain tujhe roz bhulaane ke liye jo na karnaa thaa vahi kaam kiye jaa rahe hain aane vaalaa koi tufaan hai 'sayyad-kaashif' dekh ishaaraat havaaon se diye jaa rahe hain"

"yaad tumhaari har mushkil yuun hal kar deti hai dard ki goli jaise aazaa shal kar deti hai us ki furqat kaa lamha sadiyon par bhaari hai us ki qurbat sadiyon ko bhi pal kar deti hai chhuTkaaraa mil jaataa hai is gyaani duniyaa se ik laDki hai jo mujh ko paagal kar deti hai dil na jale to pyaar ki duniyaa kaise raushan ho shama ujaalaa is duniyaa ko jal kar deti hai 'kaashif' mujh par tab hoti hai baarish ghazlon ki jab vo apni zulfon ko baadal kar deti hai"

"bhale aadhaa adhuraa ji rahaa hai ye kyaa kam hai divaana ji rahaa hai kabhi fursat mile to dekh aakar tiraa bimaar achchhaa ji rahaa hai jise martaa huaa chhoDaa thaa tum ne mire andar vo laDkaa ji rahaa hai koi us ek lamhe mein maraa thaa koi vo ek lamha ji rahaa hai sabhi ko maut kaa khaTkaa hai lekin jise aataa hai jiinaa ji rahaa hai use tanhaa na samjhaa jaae 'kaashif' mohabbat mein jo tanhaa ji rahaa hai"

"mohabbat phir mohabbat phir mohabbat phir mohabbat hai jahaan ye silsila TuuTaa samajh lenaa qayaamat hai amaa sikho zaraa ham se mohabbat kaise karte hain use jis se mohabbat hai hamein us se mohabbat hai ye titli phuul khushbu kyaa koi saani nahin us kaa tumhein kaise bataaun main vo kitni khubsurat hai yahi ik baat ab donon ki peshaani pe likkhi hai mujhe teri zarurat hai mujhe teri zarurat hai mohabbat naam ke us shakhs ko ham se koi puchhe vafaa poshaak aur saada mizaaji jis ki rangat hai khudaa ne anginat chehre banaae honge duniyaa mein miri aankhon mein 'kaashif' aaj tak bas ek surat hai"

"apne hisse ki zamin sar pe uThaae hue log kitne mazbut hain miTTi ke banaae hue log main chalaa jaaungaa bas itnaa bataa de mujh ko kaise jiite hain tire dar se uThaae hue log raaste bhar miri ham-safari kaa dam bharte rahe apni manzil pe pahunchte hi paraae hue log tum mujhe niind mein taa'bir bataayaa na karo ruuTh jaate hain mire khvaab mein aae hue log"

"bah gai yaad us ki paani mein ab bachaa kyaa hai zindagaani mein aap ne ghaur se paDhaa hi nahin ham bhi maujud the kahaani mein haal maazi banaae baiThe hain ham rivaayat ki paasbaani mein mamlikat mein rahein tumhaari ham tum raho dil ki raajdhaani mein kaash tum se milein kisi din yuun jaise miltaa hai paani paani mein aap aaein gharib-khaane par jaan haazir hai mezbaani mein saikDon sher bhi hain naa-kaafi zindagi teri tarjumaani mein"

"tujh ko buraa lagegaa magar sach yahi hai dost duniyaa tire baghair bhi achchhi lagi hai dost main jis jagah nahin thaa vahaan bhi milaa tujhe khud ko zaraa sanbhaal ye divaangi hai dost kar ke puraani baat koi faaeda nahin maalum hai mujhe tiri duniyaa nai hai dost le ab tiri gali ko rah-e-aam kar diyaa vo dosti thi aur ye miri dushmani hai dost bojhal hai teri aankh tujhe sonaa chaahiye chhoTi hai raat meri kahaani baDi hai dost 'kaashif' ghazal se lafz-e-khasaara nikaal de ye koi kaarobaar nahin shaaeri hai dost"

"har jagah khud ko DhunDhtaa huun main ek muddat se laapata huun main tu kabhi soch bhi nahin saktaa kis qadar tujh ko sochtaa huun main khvaab aataa hai jab bhi jiine kaa apni aankhon ko chumtaa huun main baiTh jaataa hai dil raqibon kaa jab tire saath baiThtaa huun main tu musallat hai soch par meri tere lahje mein boltaa huun main teraa chehra dikhaai detaa hai jab bhi aaina dekhtaa huun main jang kaisi anaa se hai 'kaashif' jittaa huun na haartaa huun main"

"usi ke naam se har kaam kaa aaghaaz kartaa huun jabin hai khaak par so arsh tak parvaaz kartaa huun mire dushman bhi meri is adaa par daad dete hain main is andaaz se un ko nazar-andaaz kartaa huun mujhe ik raaz se parda uThaanaa jab bhi hotaa hai kisi ko raazdaari se sharik-e-raaz kartaa huun tire hi naam se milti hai vusat dil ki duniyaa ko main lamha lamha teraa zikr be-aavaaz kartaa huun ye urdu bhaai-chaara ki alam-bardaar hai 'kaashif' zabaan par apni main kuchh is liye bhi naaz kartaa huun"

"is paar main huun jhiil ke us paar aap hain lahron ke aainon mein lagaataar aap hain ai kaash vo ye puchhein tumhein kyaa pasand hai be-saakhta main kah paDun sarkaar aap hain us ki khamoshiyon ki balaaghat na puchhiye jis ke lab-e-khamosh kaa izhaar aap hain ab ehtiraam karne lage meraa saare gham kis ne bataa diyaa mire gham-khvaar aap hain kaliyon ke lab pe sajti hai muskaan aap ki har mausam-e-bahaar kaa singaar aap hain"

"khatm kaise zindagi karte ke duniyaa dekhti kis ke dar pe khud-kushi karte ke duniyaa dekhti muflisi thi aur ham the ghar ke iklaute charaagh varna aisi raushni karte ke duniyaa dekhti sard-mehri aap ki rishte mein haail ho gai varna ham vo aashiqi karte ke duniyaa dekhti khaak sahraa ki uDaate phir rahe ho tum kahaan shahr mein aavaargi karte ke duniyaa dekhti tum bhi 'kaashif' faaelaatun mein ulajh kar rah gae sidhe sidhe shaaeri karte ke duniyaa dekhti"

"kaliyon ki parvarish kaa sila paa rahe hain ham yaaro bhari-bahaar mein murjhaa rahe hain ham tere sivaa nahin hai koi lams-aashnaa baad-e-sabaa ko chhune se ghabraa rahe hain ham jab rahnumaa-e-shauq tu hi tu hai chaar-su phir kaun sochtaa hai kidhar jaa rahe hain ham ik baar us ne ham ko pukaaraa thaa naam se muddat hui par aaj bhi itraa rahe hain ham har-dil-aziz yunhi achaanak nahin hue barson isi dayaar mein rusvaa rahe hain ham jis din se tere vaada-e-fardaa pe shak huaa us din se apne aap ko jhuTlaa rahe hain ham 'kaashif' ye baat koi na jaane khudaa kare kyon itne be-qaraar nazar aa rahe hain ham"

"kahin gunaah kahin par savaab likhte hain farishte roz hamaaraa hisaab likhte hain vo likh rahe hain agar apni be-rukhi ko bajaa to ham nasib ko apne kharaab likhte hain khulaa yahin se khulaa shahr-e-shaadmaan ham par tumhaare gham ko masarrat kaa baab likhte hain hazaaron aankh mein chubhte hain khaar ki surat tumhaare chehre ko jab bhi gulaab likhte hain yahaan ke log to taabir jaante hi nahin bas apne niind mein rahne ko khvaab likhte hain fareb khaae hain khush-manzari se itne ki ab chamakti ret ke uupar saraab likhte hain hain aise log bhi shahr-e-adab mein jo 'kaashif' kitaab paDhte nahin hain kitaab likhte hain"