Ghazal

"aavaargi ne dil ki ajab kaam kar diyaa khvaabon ko bojh nindon ko ilzaam kar diyaa kuchh aansu apne pyaar ki pahchaan ban gae kuchh aansuon ne pyaar ko bad-naam kar diyaa jis ko bachaae rakhne mein ajdaad bik gae ham ne usi haveli ko nilaam kar diyaa dil ko bachaa ke rakkhaa thaa duniyaa se aaj tak le aaj ham ne ye bhi tire naam kar diyaa tum ne nazar jhukaa ke jahaan baat kaaT di ham ne vahin fasaane kaa anjaam kar diyaa"

"khud aap-apni zad mein sitam-gar bhi aaegaa tum muntazir raho ki ye manzar bhi aaegaa is ret ke nagar ko na ghabraao dekh kar aage baDho ki ek samundar bhi aaegaa khushbu kaa qaafila ye bahaaron kaa silsila pahunchaa hai shahr tak to mire ghar bhi aaegaa chalte ho mere saath to itnaa bhi soch lo raahon mein meri gham kaa samundar bhi aaegaa maqtal ko jaa rahaa huun ye 'mansur' soch kar chhinTaa koi lahu kaa to un par bhi aaegaa"

"dil mein yuun pyaar ki ik taaza kahaani mahke jaise aangan men kahin raat-ki-raani mahke main ne lafzon ko kahaan us ki taraf moDaa hai zikr aa jaae jo us kaa to kahaani mahke sar se paa tak use khushbu kaa khazaana kahiye baiThe dariyaa mein utar jaae to paani mahke gham ki sadiyon ki amaanat hai ghazal ki tahzib 'mir' ke baad usi rang mein 'faani' mahke is ko kahte hain mohabbat kaa karishma 'mansur' meri ghazlon mein miraa dushman-e-jaani mahke"

"haalaat kyaa ye tere bichhaDne se ho gae lagtaa hai jaise ham kisi mele mein kho gae aankhein baras gaiin to sukun dil ko mil gayaa baadal to sirf sukhi zaminein bhigo gae kitni kahaaniyon se milaa zindagi ko husn kitne fasaane vaqt ki chaadar mein so gae aankhon se niind ruThi to nuqsaan ye huaa mere hazaaron khvaab mire dil mein so gae 'mansur' muddaton se mujhe un ki hai talaash nafrat ke biij mere chaman mein jo bo gae"

"kuchh bhi ho ye to mire yaar nahin ho saktaa main tiraa haashiya-bardaar nahin ho saktaa dil se tum jaa to rahe ho magar itnaa sun lo ye daricha kabhi divaar nahin ho saktaa rasm-e-izhaar-e-mohabbat mein zaruri hi sahi ye tamaashaa sar-e-baazaar nahin ho saktaa vasl ki chaah karun hijr mein bhi aah bharun ye mire ishq kaa meaar nahin ho saktaa apni taarif suni hai to ye sach bhi sun le tujh se achchhaa tiraa kirdaar nahin ho saktaa"

"TuuT jaataa hai sitaaron kaa bharam raat gae jagmagaate hain tire naqsh-e-qadam raat gae kyaa bataaein jo guzarti hai hamaare dil par yaad aate hain jab apnon ke sitam raat gae gharq ho jaati hai jab niind mein saari duniyaa jaag uThte hain adibon ke qalam raat gae roz aate hain sadaa de ke chale jaate hain dil ke darvaaze pe kuchh ahl-e-karam raat gae rok leti hai tiri yaad sahaaraa ban kar Dagmagaate hain agar mere qadam raat gae jin ki ummid mein ham din ko jiyaa karte hain TuuT jaate hain vahi qaul-o-qasam raat gae jin ki qismat mein nahin din kaa ujaalaa 'mansur' un charaaghon mein jalaa karte hain ham raat gae"

"is shahr mein chalti hai havaa aur tarah ki jurm aur tarah ke hain sazaa aur tarah ki is baar to paimaana uThaayaa bhi nahin thaa is baar thi rindon ki khataa aur tarah ki ham aankhon mein aansu nahin laate hain ki ham ne paai hai viraasat mein adaa aur tarah ki is baat pe naaraaz thaa saaqi ki sar-e-bazm kyuun aai piyaalon se sadaa aur tarah ki is daur mein mafhum-e-mohabbat hai tijaarat is daur mein hoti hai vafaa aur tarah ki shabnam ki jagah aag ki baarish ho magar ham 'mansur' na maangeinge duaa aur tarah ki"

"bujhne na do charaagh-e-vafaa jaagte raho paagal hui hai ab ke havaa jaagte raho sajdon mein hai khulus to phir chaandni ke saath utregaa aanganon mein khudaa jaagte raho alfaaz so na jaaein kitaabon ko oDh kar daanishvaraan-e-qaum zaraa jaagte raho kaisaa ajiib shor hai basti mein aaj-kal har ghar se aa rahi hai sadaa jaagte raho pahle to us ki yaad ne sone nahin diyaa phir us ki aahaTon ne kahaa jaagte raho phulon mein khushbuon mein sitaaron mein chaand mein kholegaa koi band-e-qabaa jaagte raho tum bhi suno ki shahr-e-khamoshaan mein raat din sannaaTe de rahe hain sadaa jaagte raho jab bhi qalam ko mere kabhi aaiin jhapkiyaan aankhon ne aansuon se likhaa jaagte raho 'mansur' ratjage to muqaddar hain aap kaa jab tak jale sukhan kaa diyaa jaagte raho"

"tishnagi dil ki bujhaanaa to khabar kar denaa ashk aankhon mein chhupaanaa to khabar kar denaa ham ne kuchh giit likhe hain jo sunaanaa hain tumhein tum kabhi bazm sajaanaa to khabar kar denaa haadse raah-e-mohabbat kaa muqaddar Thahre jab hamein dil se bhulaanaa to khabar kar denaa jin kitaabon mein chhupaae hain mire khat tum ne un kitaabon ko jalaanaa to khabar kar denaa aaj begaana samajhte ho to samjho lekin jab sataae ye zamaana to khabar kar denaa main zarur aaungaa 'mansur' tumhaari khaatir tum jo maqtal ko sajaanaa to khabar kar denaa"

"duniyaa samajh rahi hai ki patthar uchhaal aae ham apni pyaas jaa ke samundar mein Daal aae jo phaans chubh rahi hai dilon mein vo tu nikaal jo paanv mein chubhi thi use ham nikaal aae kuchh is tarah se zikr-e-tabaahi sunaaiye aankhon mein khuun aae na shishe mein baal aae samjho ki zindagi ki vahin shaam ho gai kirdaar bechne kaa jahaan bhi savaal aae guzro dayaar-e-fikr se 'mansur' is tarah khud par zavaal aae na fan par zavaal aae"

"main huun khaamosh magar bol rahaa hai mujh mein aisaa lagtaa hai koi aur chhupaa hai mujh mein mujh se dilli ki nahin dil ki kahaani suniye shahr to ye bhi kai baar luTaa hai mujh mein tujh ko chaahat hai vafaa ki to mujhe ghaur se paDh vo kitaabon mein kahaan hai jo likhaa hai mujh mein muskuraataa huaa maqtal se guzar aayaa huun zindagi teri koi khaas adaa hai mujh mein ye alag baat ki alfaaz hain mere lekin sach to bas ye hai ki teri hi sadaa hai mujh mein mere sheron se bikhar sakte hain us ke gesu teraa andaaz bhi ai baad-e-sabaa hai mujh mein laakh khaamosh sahi saari fazaaein 'mansur' bolne vaalaa magar bol rahaa hai mujh mein"

"gulshan mein ye kamaal tujhe dekh kar huaa phulon kaa rang laal tujhe dekh kar huaa muddat ke baad aaj mile hain to jaan-e-man dil ko bahut malaal tujhe dekh kar huaa aao ham aaj chaand kaa qarzaa utaar dein taaron ko ye khayaal tujhe dekh kar huaa khushbu se kis zabaan mein baatein kareinge log mahfil mein ye savaal tujhe dekh kar huaa ashkon se jab likheinge ghazal tab sunaaeinge is dil kaa jo bhi haal tujhe dekh kar huaa"

"aankhon se mohabbat ke ishaare nikal aae barsaat ke mausam mein sitaare nikal aae thaa tujh se bichhaD jaane kaa ehsaas magar ab jiine ke liye aur sahaare nikal aae main ne to yunhi zikr-e-vafaa chheD diyaa thaa be-saakhta kyuun ashk tumhaare nikal aae jab main ne safine mein tiraa naam liyaa hai tufaan ki baahon se kinaare nikal aae ham jaan to bachaa laate magar apnaa muqaddar is bhiiD mein kuchh dost hamaare nikal aae jugnu inhein samjhaa thaa magar kyaa kahun 'mansur' muTThi ko jo kholaa to sharaare nikal aae"