Ghazal

"tujhe bhi jaanchte apnaa bhi imtihaan karte kahin charaagh jalaate kahin dhuaan karte kai the jalva-e-naayaab tujh se pahle bhi kis aasre pe tiraa naqsh jaavedaan karte safina Duub rahaa thaa to kyuun na yaad aayaa tiri talab tire armaan ko baadbaan karte mohabbatein bhi tiri hain shikaayatein bhi tiri yaqin tujh pe na hotaa to kyuun gumaan karte havaa thi tez jalaate rahe dilon mein charaagh kaTi hai umr lahu apnaa raaegaan karte vo be-jhahat kaa safar thaa savaad-e-shaam na subh kahaan pe rukte kahaan yaad-e-raftagaan karte dayaar-e-khvaab mein Thahre hisaar-e-gul mein rahe magar ye gham hi rahaa khud ko shaadmaan karte"

"fusun-e-harf le gayaa tilism-e-khvaab le gayaa varaq-varaq usi kaa thaa vahi kitaab le gayaa abhi nigah jhuki na thi ki main ne honT rakh diye savaal vo na kar sakaa magar javaab le gayaa mujhe pata thaa raah mein charaagh jal na paaegaa vahaan gayaa to apne saath maahtaab le gayaa miri azal ki tishnagi bujhaa gayaa vo narm-dil nashaat-e-aab de gayaa gham-e-saraab le gayaa thaa dekhne mein saada-ru magar baDaa zahin thaa mujhe gunaahgaar kar ke vo savaab le gayaa nigaah-e-imtiyaaz kaa shikaar main huaa 'imaam' yahaan vo khaar de gayaa vahaan gulaab le gayaa"

"koson duur kinaaraa hogaa kashti hogi dariyaa hogaa paas tumhein ho tum hi bataao koi mujh saa tanhaa hogaa aao aur qarib aa jaao vaqt bhi rasta taktaa hogaa tum se hasin to aur bhi honge lekin koi tum saa hogaa ab to kuchh bhi yaad nahin hai ham ne tum ko chaahaa hogaa ham ne garebaan chaak kiyaa thaa ham ko hi khud siinaa hogaa jab ham teraa naam na leinge vo bhi ek zamaanaa hogaa vo bhi ek haqiqat hogi jis kaa naam fasaana hogaa kal ki fikr kahaan tak kiije aur buraa ab kitnaa hogaa haan vo 'imaam' ik rusvaa shaaer tum ne us ko dekhaa hogaa"

"pas-ghubaar-e-havas raat Dhalti rahti hai nashe mein chuur pighalti machalti rahti hai khabar yahi hai ki aaghosh-e-hijr mein pahron tumhaari yaad bhi pahlu badalti rahti hai ye main ne dekhaa hai aksar phaTi puraani hayaat sar-e-daricha-e-shab haath malti rahti hai qafas se ham bhi nikalne ko kab se hain be-taab magar vo saaat-e-aakhir jo Talti rahti hai vo rang rang bahaaraan hai khultaa rahtaa hai vo shaakh shaakh samar-var hai phalti rahti hai hai ek kaar-e-ziyaan shahr shahr dar-badari magar yahi ki tabi'at bahalti rahti hai"

"taaron se bhari raahguzar le ke gai hai ye subh charaaghon kaa nagar le ke gai hai tum ko to pata hogaa ki hamraah tumhin the duniyaa mire khvaabon ko kidhar le ke gai hai pyaase the to paani ko pukaaraa thaa hamin ne naddi idhar aai hai to ghar le ke gai hai ik manzil-e-be-maqsad o be-naam ki khvaahish kaanTon ki savaari pe safar le ke gai hai be-baal-o-pari ab bhi sar-e-dasht hai mahfuz aandhi to faqat barg o samar le ke gai hai shaayad ki ab aae tiri qurbat ki nai fasl is baar duaa baab-e-asar le ke gai hai chamkegaa abhi zevar-e-shahzaadi-e-mahtaab us tak vo mire shab ki khabar le ke gai hai"

"shama ki lau tez itni thi dhuaan honaa hi thaa faaede ke kaam mein kuchh to ziyaan honaa hi thaa kis ko khush aati hamaari chhat ki saaya-afgani ghar banaayaa thaa to phir be-khaanamaan honaa hi thaa ham natije ke liye taa-zindagi baiThe rahe ye kahaan samjhe ki pahle imtihaan honaa hi thaa vaadi-e-gul se nikalnaa ek majburi sahi shahr-e-naa-pursaan mein ham ko raaegaan honaa hi thaa"

"harf-e-dil naa-rasaa hai tire shahr mein har sadaa be-sadaa hai tire shahr mein koi khushbu ki jhankaar suntaa nahin kaun saa gul khilaa hai tire shahr mein kab dhanak so gai kab sitaare bujhe koi kab sochtaa hai tire shahr mein ab chanaaron pe bhi aag khilne lagi zakhm lau de rahaa hai tire shahr mein jitne patte the sab hi havaa de gae kis pe takiya rahaa hai tire shahr mein ek dard-e-judaai kaa gham kyaa karein kis maraz ki davaa hai tire shahr mein ab kisi shahr ki chaah baaqi nahin dil kuchh aisaa dukhaa hai tire shahr mein"

"sar-e-ihaata-e-gham raat bhar sanvarnaa thaa tiri judaai mein kaar-e-hunar bhi karnaa thaa ufuq qarib thaa himmat ki surkh-rui kaa lahu mein Duub ke dariyaa ko paar utarnaa thaa hamein thi kaun si sajde ki aarzu tum se magar duaa mein kabhi ham ko yaad karnaa thaa agar main barg-e-sahar huun to tum ko thoDi der misaal-e-qatra-e-shabnam yahaan Thaharnaa thaa javaab kaa to pata thaa hamein magar phir bhi lab-e-savaal milaa thaa savaal karnaa thaa vo log saahil-e-shab par bikhar gae kaise unhein to aaina-e-subh mein sanvarnaa thaa"

"main jaantaa huun vo nazdik o duur meraa thaa bichhaD gayaa jo main us se qusur meraa thaa jo paanv aae the ghar tak mire vo us ke the vo dil baDhaa thaa jo us ke huzur meraa thaa baDaa ghurur thaa donon ko ham-navaai par nigaah us ki thi lekin surur meraa thaa vo aankh meri thi jo us ke saamne nam thi khamosh vo thaa ki yaum-e-nushur meraa thaa kahaa ye sab ne ki jo vaar the usi par the magar ye kyaa ki badan chuur chuur meraa thaa"

"us ki aankhon mein tamannaa-e-sahar rakh denaa sina-e-shab mein kisi baat kaa Dar rakh denaa aaj guzregaa isi samt se vo mahr-e-badan dil ke raste mein zaraa chand shajar rakh denaa ye na kahnaa ki andheraa hai bahut raahon mein us se milnaa to hatheli pe qamar rakh denaa us ko ashaar sunaanaa to karaamaat ke saath apne TuuTe hue lafzon mein asar rakh denaa vaardaatein to kai shahr mein guzri hongi aaj akhbaar mein meri bhi khabar rakh denaa jis varaq par hai hadis-e-lab-o-rukhsaar raqam us varaq par koi barg-e-gul-e-tar rakh denaa ek mahtaab darakhshaan hai sar-e-baam-e-khayaal meri aankhon mein bhi nairang-e-nazar rakh denaa laala-e-sang se taraashe vo koi paikar-e-sang dast-e-sannaa mein ik ye bhi hunar rakh denaa"

"chupke chupke ye kaam kartaa jaa kaam sab kaa tamaam kartaa jaa ham ko badnaam kar zamaane mein kuchh zamaane mein naam kartaa jaa yaad ki shaah-raah-e-simin par ai saman-bar khiraam kartaa jaa ai ki teraa mizaaj shabnam saa barg-e-dil par qayaam kartaa jaa ashk aankhon mein le ke rukhsat ho meraa marnaa haraam kartaa jaa bastiyon kaa ujaDnaa basnaa kyaa be-jhijak qatl-e-aam kartaa jaa daastaan-go tiri kahaani mein ramz kiyaa hai kalaam kartaa jaa chaar chhai sher kaam ke kah le kuchh to 'mazhar--imaam' kartaa jaa"

"saaneha ye bhi ik roz kar jaaungaa vaqt ki paalki se utar jaaungaa apne TuuTe hue khvaab ki kirchiyaan teri aasuda aankhon mein bhar jaaungaa raushni ke safine bulaate rahein saahil-e-shab se ho kar guzar jaaungaa ajnabi vaadiyaan koi manzil na ghar raaste mein kahin bhi utar jaaungaa mere dushman ke dil mein jo barson se hai vo khalaa bhi main ik roz bhar jaaungaa doston se mulaaqaat ki shaam hai ye sazaa kaaT kar apne ghar jaaungaa"

"ham yahi soch rahe the ki samandar na rahe mauja-e-dil ne kahaa uTh ke shanaavar na rahe us ne himmat jo baDhaai to rakhaa ye bhi lihaaz koi buzdil na bane koi dilaavar na rahe us ne is tarh utaari mire gham ki tasvir rang mahfuz to rah jaaein pa manzar na rahe us ne kis naaz se bakhshi hai mujhe jaa-e-panaah yuun ki divaar salaamat ho magar ghar na rahe ab ye saazish hai ki likkhe na koi qissa-e-dil lafz rah jaaein magar koi sukhanvar na rahe apne bigDe hue chehron ko bhulaa dein sab log jashn-e-aaina mane haathon mein patthar na rahe ab ke aandhi bhi chali jab to saliqe se chali yuun ki rah jaae shajar shaakh-e-samar-var na rahe"

"kai saraab mile tishnagi ke raste mein rukaavaTein hain bahut raushni ke raste mein hamaaraa aap kaa sar phoDnaa muqaddar hai sanam khaDe hain abhi aadmi ke raste mein hai us kaa saath to lab par yahi duaa hai ki phir na aae aur koi zindagi ke raste mein vahaan milaa bhi to apnaa hi aashnaa saa ye khaDe the der se ham raushni ke raste mein nai hai fikr magar lafz to puraane hain qadaamatein hain vahin taazgi ke raste mein"

"nae makaan mein aqide ki koi jaa hi nahin khudaa to hai pa kahin banda-e-khudaa hi nahin bharosa yuun to bahut thaa magar duaa ke liye jo haath ham ne uThaayaa to vo uThaa hi nahin har ek shakhs yahaan apne-aap mein gum hai kisi se haath milaane kaa faaeda hi nahin lahu-luhaan hai jo bhi udhar se aayaa hai magar ye main ki jo us raah tak gayaa hi nahin dayaar-e-khvaab hai aao yahin qayaam karein yahaan se yuun bhi nikalne kaa raasta hi nahin"

"chaand shaakhon ki miinaa se Dhaltaa huaa dard bachche ki surat machaltaa huaa yaad ki bel aankhon pe chaDhti hui barg-e-taaza gulaabon mein paltaa huaa aatish-e-jism par baagh khilte hue ek ghar tez baarish mein jaltaa huaa sakht hote hue aabshaaron ke lab barf ki tarah mausam pighaltaa huaa ek aandhi makaanon mein palti hui ek parinda fazaa mein sambhaltaa huaa"

"ajiib vaaqia thaa us ko apne ghar laanaa kabhi charaagh uThaanaa kabhi qamar laanaa bayaan-e-ijz mein alfaaz-e-mo'atabar laanaa baDaa kamaal duaaon mein hai asar laanaa bahut hai aaj tamannaa uDaan bharne ki qafas se jaa ke hamaare shikasta par laanaa thake hue hain sabhi paaemaal raahon par kahin se DhunD ke phir taaza rah-guzar laanaa vo shokh rang kaa shaidaa hai ye khayaal rahe qarib aanaa to khud ko lahu mein tar laanaa bas ek kaam huaa ham se zindagi mein 'imaam' ayaagh-e-umr sharaab-e-ziyaan se bhar laanaa"

"hamin hain vo ki jinhein baam-o-dar se raghbat thi ki dar-ba-dar bhi agar the to ghar se raghbat thi ham apne haal-e-digar-gun ki ab khabar kyaa dein khabar yahi hai ki ik be-khabar se raghbat thi jabin pe khaak-e-nadaamat sajaae phirte hain ki raqs-e-shoala-e-sarv-o-sharar se raghbat thi shikasta-paa hi nahin ham shikasta-khvaab bhi hain ki qaafile se fazaa-e-safar se raghbat thi ab ek manzil-e-aakhir ke muntazir hain ham vo din bhi the ki kisi rahguzar se raghbat thi dhuli dhulaai hui zindagi ko kyaa maalum ki ik chakor ko daagh-e-qamar se raghbat thi"

"kis samt jaa rahaa hai zamaana kahaa na jaae uktaa gae hain log fasaana kahaa na jaae apnaa makaan ujaaD ke sahraaon ki taraf vo shakhs kyuun huaa hai ravaana kahaa na jaae lamhon ki tarah guzri hain sadiyaan to baar-haa ik pal banaa hai kaise zamaana kahaa na jaae shoale bane hain lafz to kaanTaa hui zabaan ab kyaa karein jo teraa fasaana kahaa na jaae hai aankh ufuq pe barf ki surat jami hui shab hogi kab sahar kaa nishaana kahaa na jaae kahne ko ye ghazal hai magar kyaa ghazal jise nauha kahaa na jaae taraana kahaa na jaae"

"bharaa huaa tiri yaadon kaa jaam kitnaa thaa sahar ke vaqt taqaazaa-e-shaam kitnaa thaa rukh-e-zavaal pe rang-e-davaam kitnaa thaa ki ghaT ke bhi miraa maah-e-tamaam kitnaa thaa thaa tere naaz ko kitnaa miri anaa kaa khayaal miraa ghurur bhi teraa ghulaam kitnaa thaa jo pau phaTi to har ik daastaan tamaam hui ajab ki un ke liye ehtimaam kitnaa thaa unhin ko yaad kiyaa jab to kuchh na yaad aayaa vo log jin kaa zamaane mein naam kitnaa thaa abhi shajar se judaai ke din na aae the pakaa huaa thaa vo phal phir bhi khaam kitnaa thaa vahaan to koi na thaa ek apne gham ke sivaa mire makaan pe magar izhdihaam kitnaa thaa"

"vo raushni hai ki aankhon ko kuchh sujhaai na de sukut vo ki dhamaaka bhi ab sunaai na de pahunch gayaa huun zamaan o makaan ke malbe tak miri anaa mujhe ilzaam-e-naa-rasaai na de agar kahin hai to dil chiir kar dikhaa mujh ko tu apni zaat kaa irfaan de khudaai na de azal ke TuTte rishton ki is kashaakash mein pukaar aisi adaa se mujhe sunaai na de nikal chukaa huun main apni kamaan se aage taalluqaat-e-guzishta ki ab duhaai na de"

"haath uThte hi kaTaa chaliye yahaan se chaliye kyaa duaa kaisi duaa chaliye yahaan se chaliye baaz hai koi daricha na koi dar hai khulaa koi jalva na adaa chaliye yahaan se chalein us ke ghar par bhi vahi shahr-e-khamoshaan kaa samaan koi aahaT na sadaa chaliye yahaan se chaliye khvaab khushbu-e-talab rang-e-havas naaz-e-vafaa saaraa sarmaaya gayaa chaliye yahaan se chaliye koi saaya na shajar koi tamannaa na umang uD gai sar se ridaa chaliye yahaan se chaliye is chakaa-chaund mein sikkon ki parakh kyaa hogi koi khoTaa na kharaa chaliye yahaan se chaliye doston hi ke qabile mein ye kohraam nahin dushmanon ne bhi kahaa chaliye yahaan se chaliye"

"zalzale sab dil ke andar ho gae haadse rumaan-parvar ho gae kashtiyon ki qimatein baDhne lagin jitne sahraa the samundar ho gae dhuup mein pahle pighal jaate the log ab ke kyaa guzri ki patthar ho gae vo nigaahein kyaa phirin ham se ki ham apni hi aankhon mein kam-tar ho gae tum ki har dil mein tumhaaraa ghar huaa ham ki apne ghar mein be-ghar ho gae"

"hai bhare darakhton ke baavajud ban tanhaa roz-o-shab ke hangaame phir bhi anjuman tanhaa ratjagon ke vo saathi kis jahaan mein baste hain kyaa hamin tak aaegi subh ki kiran tanhaa zulf ki hasin raatein kis pe saya-afgan hain mere ghar tak aai hai bu-e-yaasaman tanhaa teri yaad ne uTh kar mujh se kal ye puchhaa thaa apne gham ke sahraa mein jaa sakoge tan-tanhaa kuchh kami na thi dil ki kucha-e-mohabbat mein ek ham hi aae the le ke jaan-o-tan tanhaa haae ye shab-e-vaa'da dil kaa haal kyaa kahiye hajla-e-urusi mein jis tarah dulhan tanhaa thi khudaa ki shirkat bhi varna bojh nafrat kaa kis tarah uThaa paae shaikh-o-barhaman tanhaa"