Ghazal

"zarurat niinv ki hoti hai dar se baam se pahle mohabbat ruuh karti hai sadaa ajsaam se pahle mukammal ho ye chaahat bhi na ho kohraam bhi koi khudaa ham ko mile manzil yahaan ayyaam se pahle dayaar-e-ghair mein ham ko sataati yaad maazi ki taDaptaa dil miraa kunj-e-qafas mein shaam se pahle na kaanTon ki hukumat ho na khanjar ho kisi ke haath tamanna hai nazaaraa ho yahi anjaam se pahle taraashaa thaa rubaa'i ko bahut logon ne pahle bhi na thi is mein kabhi zinat magar khayyaam se pahle nikal kar jab chali vo to use maan ne hidaayat di ki vaapas lauTnaa beTi to ghar par shaam se pahle huun nasl-e-'mir' se mujh ko sukhan ke hain adab maa'lum sadaa luun naam 'ghaalib' kaa kisi bhi naam se pahle dhaDaktaa dil hamaaraa hai na qaasid ab talak aaya mohabbat miT na jaae ye tire paighaam se pahle mujhe dushman na samjho tum main sachchaa dost huun 'minaa' zaraa kuchh puchh to lete khayaal-e-khaam se pahle"

"jo luT chukaa hai ab vo sammaan DhunDhti hai nannhi kali chaman mein muskaan DhunDhti hai kaanTon ke vaaste vo gul-daan DhunDhti hai naadaan hai jahaan mein insaan DhunDhti hai bebas hai zindagi aur gardish mein bhi sitaare ab maut kaa vo apne parvaan DhunDhti hai DhunDhe nahin vo hiiraa DhunDhe nahin vo moti jiine kaa bas jahaan mein saamaan DhunDhti hai jazbaat hi nahin kuchh jab shaa'iri mein teri 'minaa' kalaam mein kyaa arkaan DhunDhti hai"

"raah-e-ulfat se pareshaan kidhar jaataa hai apni manzil se bhi anjaan kidhar jaataa hai jhuuT se haar ke naadaan kidhar jaataa hai maar ke apnaa tu imaan kidhar jaataa hai bik rahaa huun sar-e-baazaar tiri sharton par de ke mujh ko tu ye nuqsaan kidhar jaataa hai teri yaadon kaa uThaa thaa jo mire siine se dekhnaa hai ki vo tufaan kidhar jaataa hai main isi soch mein uljhi huun baDi muddat se baa'd marne ke ye insaan kidhar jaataa hai mai-kada bhi hai teraa ghar bhi sanam-khaane bhi aazmaanaa hai ki ab dhyaan kidhar jaataa hai nekiyaan chhoD ke jis ne jo kamaayaa 'minaa' dekhiye le ke vo saamaan kidhar jaataa hai"

"mohabbat mein milaa mujh ko hamesha gham kaa nazraana kahein kyaa gham hi detaa hai mire hamdam kaa nazraana chhanTi jo tirgi aai sahar qudrat bhi muskaai diyaa hai bhor ne har phuul ko shabnam kaa nazraana bahaaron ke kahaan din hain hamaari zindagi mein ab hamein haasil huaa hai dard ke mausam kaa nazraana hamaari har ghazal mein nuur phailaa hai tumhaaraa hi khushi kaa yaa kaho is ko gham-e-pur-nam kaa nazraana kisi se puchh kar dekho yahi 'minaa' kahegaa vo hamesha baanTte rahte hain ham marham kaa nazraana"

"aashiqon ki bhiiD mein bhi saaf pahchaane gae sham' jab raushan hui marne ko parvaane gae shodh karne ke liye jab log pahunche chaand par ham bhi mangal tak tirangaa yaar lahraane gae 'ishq mein is hausle ki daad ham ko aap dein jab unhon ne chaand maangaa aasmaan laane gae yuun shahidon vaalaa jazba bhi hamaare dil mein thaa vaqt jab aaya khud apnaa shish kaTvaane gae khvaab ham ne yuun to dekhe aasmaan se bhi baDe par hamesha hi zamin ke naam se jaane gae dil se apne thaa vo muflis ham samajh paae nahin khud tamaasha hi bane jo haath phailaane gae 'ishq mein naakaam honaa hi faqat taqdir thi ham jahaan pahunche hamaare saath viraane gae dard hai 'minaa' milaa aisaa davaa jis ki nahin DhunDhne phir bhi davaa ham roz maikhaane gae"

"tumhaare husn mein ab chaand si cham-cham nahin hoti tumhaari paayalon mein pahle si chham-chham nahin hoti kabhi bhi dard ke sur mein hasin sargam hai naa-mumkin kabhi sho'lon ki zad mein makhmali shabnam nahin hoti na jaane kitne mujh ko zakhm ulfat mein mile lekin kisi bhi ranj-o-gham se aankh meri nam nahin hoti siyaasi pech-o-kham toDo banaa lo desh ko jannat vijay haasil kabhi shamshir se jaanam nahin hoti ham un ki yaad ke dipak jalaate roz hain 'minaa' hamaare dil mein un ke pyaar ki lau kam nahin hoti"

"khojtaa phirtaa huun par miltaa nahin dil kaa pata koi aa kar to bataa de mujh ko manzil kaa pata roz-o-shab chalti havaa dekho mukhaalif hai magar bhuul sakti hi nahin ghazlein to mahfil kaa pata zindagi kaa bhi safar aasaan to hotaa hi nahin hausle mere hi deinge mujh ko manzil kaa pata hasratein dil mein machalne lag gaiin didaar ki teri aankhon se milaa ulfat ke haasil kaa pata us ki majburi to koi bhi samajhtaa hi nahin ab to rakhtaa hi nahin koi bhi saail kaa pata ziist ke majdhaar mein 'minaa' ki kashti hai abhi kyaa kareinge DhunDh kar ab ham bhi saahil kaa pata"

"tumhaaraa dil jo churaa le vo scene thoDi hai ghazal hamaari ye taaza-tarin thoDi hai uThaaein kaise tire naaz ye bhi batlaa de hamaare dil mein faqat tu makin thoDi hai kahaan talak na lage us ko bad-nazar sab ki hamaare jaisaa vo pardaa-nashin thoDi hai vo ham ko jaan se zaaid 'aziz hai lekin hamaari baat kaa us ko yaqin thoDi hai samajh sake jo buraai bhalaai ko jag ki nazar kisi ki bhi itni mahin thoDi hai use bhi paDti hai aaraam ki yahaan haajat huzur maan hai vo koi machine thoDi hai mile jo daad hamein aap se kabhi 'minaa' hamaari shaa'iri itni zahin thoDi hai"