Ghazal

"aap ko gardish-e-ayyaam se Dar lagtaa hai aur hamein 'ishq ke anjaam se Dar lagtaa hai chashm-e-saaqi ke ishaare mein nihaan kyaa shai thi hasrat-e-baada-e-gulfaam se Dar lagtaa hai zer-e-lab un ke tabassum se sukun maang to luun apni hi jurat-e-naakaam se Dar lagtaa hai naam jo aaTh-pahr vird-e-zabaan rahtaa thaa ab ye vahshat hai usi naam se Dar lagtaa hai hazrat-e-khizar se thi raahbari ki khvaahish ab usi khvaahish-e-naakaam se Dar lagtaa hai manzilein 'ishq ki be-khauf-o-khatar tai kiin hain ab ye 'aalam hai ki har gaam se Dar lagtaa hai kyuun vazifa sahar-o-shaam kiyaa tark 'safir' kyuun khyaal-e-sahr-o-shaam se Dar lagtaa hai"

"tire divaane izhaar-e-mohabbat kar nahin sakte mohabbat kar ke tauhin-e-mohabbat kar nahin sakte taalluq khaas hai dil ko khayaal-e-ranj-o-raahat se kisi ko ham sharik-e-ranj-o-raahat kar nahin sakte jo shaidaa hain mohabbat ke jo divaane hain ulfat ke vo apne dushmanon se bhi adaavat kar nahin sakte javaan hain jin ke pahlu mein khayaal-e-paas khuddaari zarurat mein bhi izhaar-e-zarurat kar nahin sakte kiyaa imaan taaza qaamat-e-dildaar ne aisaa 'safir' ab ham bhi inkaar-e-qayaamat kar nahin sakte"

"ulfat ho to ulfat ke sahaare bhi bahut hain aankhon mein mohabbat ke ishaare bhi bahut hain himmat hai to maayus na ho Dubne vaale tufaan hain maujon ke sahaare bhi bahut hain ai jalva-e-rangin ke ziyaa dekhne vaalo hon aankh agar un ke nazaare bhi bahut hain apnon ne to meaar-e-vafaa hi na bataayaa is raah mein ehsaan tumhaare bhi bahut hain ji bhar ke zaraa dekh to luun duur se gul-rang saaqi mujhe itne hi sahaare bhi bahut hain us bazm ki ranginiyaan hain diid ke qaabil ik chaand agar hai to sitaare bhi bahut hain hai kaun 'safir' aisaa jo ban jaae sahaaraa dil toDne vaale to hamaare bhi bahut hain"

"na ho marzi khudaa ki to kisi se kuchh nahin hotaa jo chaahe aadmi to aadmi se kuchh nahin hotaa kahaan ke dost kaise aqrabaa jab vaqt paDtaa hai musibat mein kisi ki dosti se kuchh nahin hotaa amal ki zindagaani dar-haqiqat zindagaani hai jiye jaao to khaali zindagi se kuchh nahin hotaa ajal aaegi jaan jaaegi ik saaat-muayyan par aziz-o-aqribaa ki pairvi se kuchh nahin hotaa adab ke qadr-daan bazm-e-adab se uThte jaate hain lo rakkho shaairi ab shaairi se kuchh nahin hotaa miri haalat ye kuchh makhsus dil bechain hain lekin ye mushkil hai kisi ki bekali se kuchh nahin hotaa 'safir' is zindagi mein vaqt bhi tevar badaltaa na ghabraao kisi ki dushmani se kuchh nahin hotaa"

"un ke jalve sahar-o-shaam tak aa pahunche hain mere aaghaaz ab anjaam tak aa pahunche hain hazrat-e-khizr pareshaan na ho aaraam karein ham bhi ab manzil-e-aaraam tak aa pahunche hain tohmat-e-ishq mein ham aaj akele to nahin vo bhi ab markaz-e-ilzaam tak aa pahunche hain mai-kasho muzda-e-masti ki janaab-e-vaaiz baDh ke ab tazkira-e-jaam tak aa pahunche hain us ko meraaj-e-vafaa kyuun na kahun jab aksar bil-iraada vo mire naam tak aa pahunche hain ye miraa zabt ki main apni jagah huun mohtaat dar-haqiqat mujhe paighaam tak aa pahunche hain dekh kar tang-dili bazm mein saaqi ki 'safir' rind bhi jurat-e-naakaam tak aa pahunche hain"

"hijr mein dil kaa daagh jaltaa hai be-kasi kaa charaagh jaltaa hai dil jalaate ho sard-mehri se is tarah bhi charaagh jaltaa hai meri aankhon mein un kaa jalva hai aaine mein charaagh jaltaa hai dam hai aankhon mein nabzein Duubi hain dhimaa dhimaa charaagh jaltaa hai shola-e-aah ye nahin hai 'safir' hasraton kaa charaagh jaltaa hai"

"dil ki maayus tamannaaon ko mar jaane do dard ko aakhiri manzil se guzar jaane do main ne kab saaghar-o-sahbaa se kiyaa hai inkaar nashsha-e-baada-e-hasti to utar jaane do jis ki ai ahl-e-chaman ki hai lahu se taamir ab vo shiraaza-e-gulshan na bikhar jaane do chaar tinkon ki bhi taamir hai koi taamir fasl-e-gul aaegi rakh leinge bikhar jaane do lazzat-e-gham se taDapne mein maza aataa hai lazzat-e-gham se tabiat miri bhar jaane do inqalaab aaegaa koi ki bahaar aaegi khaal-o-khad chehra-e-giti ke nikhar jaane do ham se badle hue tevar hain zamaane ke 'safir' us ne dekhi hai hamaari bhi nazar jaane do"

"paiham udaasiyon se bayaabaan hai zindagi dil mein bahaar ho to gulistaan hai zindagi ai intihaa-e-kashmakash-e-shaikh-o-barhman hindu hai zindagi na musalmaan hai zindagi be-chainiyon mein gharq hai sarmaaya-e-hayaat taabir-haa-e-khvaab-e-pareshaan hai zindagi hai maut ikhtitaam pareshaaniyon kaa naam jab tak ye zindagi hai pareshaan hai zindagi ghaafil nahin to kyuun nahin anjaam par nazar har lahza har-nafas jo gurezaan hai zindagi hain mukhtalif fasaana-e-hasti ki surkhiyaan pinhaan kahin kahin pe numaayaan hai zindagi nazzaara-e-jamaal se ghash huun main ai 'safir' behosh mujh ko dekh ke hairaan hai zindagi"

"baDi ibrat ki manzil hai zamin gor-e-gharibaan ki yahaan apni haqiqat par nazar paDti hai insaan ki yahi dhun thi kahin meraa dil-e-gum-gashta mil jaae isi vahshat mein barson khaak chhaani ku-e-jaanaan ki jahaan nabzein rukin dil sard ho do hichkiyaan aaiin samajh liije ki manzil aa gai gor-e-gharibaan ki na jaaegaa mere dil se khayaal-e-abru-e-dil-bar ki teghon hi ke saae mein to hai jannat musalmaan ki fanaa-e-ishq ho kar zinda-e-jaaved hotaa hai miTaa kar dekhiye hasti nahin miTti hai insaan ki yahaan rone se ho maqsud haasil ghair-mumkin hai chalo ab shamein bhi bujhne lagin gor-e-gharibaan ki 'safir' ik khvaab thi ye chand roza zindagi apni ajal se mil gai taabir is khvaab-e-pareshaan ki"

"ye lau kaisi hai jo ik saans bhi maddham nahin hoti bhulaane par bhi zaalim yaad us ki kam nahin hoti ye matlab-aashnaa duniyaa ye zaalim bevafaa duniyaa sharik-e-aish kar liije sharik-e-gham nahin hoti adam ke jaane vaale qaafile din-raat chalte hain magar is anjuman ki dilkashi kuchh kam nahin hoti na puchh ai ham-nashin rudaad-haa-e-shaam-e-gham ham se qayaamat ki sahar hoti hai shaam-e-gham nahin hoti bhulaayaa hai mujhe tu ne tiri barham-mizaaji ne magar bedard teri yaad phir bhi kam nahin hoti nahin vaaqif tu ai dil aatish-e-soz-e-mohabbat se ye daulat jis qadar aati hai ghar mein kam nahin hoti 'safir' ab tak to rudaad-e-mohabbat khaam hai teri abhi to aankh bhi fart-e-alam se nam nahin hoti"