Ghazal

"qadmon mein kal paDaa thaa 'adu mere saamne kahtaa hai aaj kuchh nahin tu mere saamne himmat to dekh meri ki DaT kar khaDaa huun main bikhraa hai jabki meraa lahu mere saamne ye aankhein shauq-e-did mein be-nur ho chalin nur-e-nigaah aa kabhi tu mere saamne saaqi tiri nigaah se be-khud ho jaaungaa yunhi paDaa rahegaa subu mere saamne yaaro sitamgari ki bhi tab intihaa hui thaamaa jab us ne dast-e-‘adu mere saamne"

"jis baat kaa kare hai dil iqraar subh-o-shaam lab par musalsal us kaa hai inkaar subh-o-shaam ham yaad se tiri hain khabar-daar subh-o-shaam dil phir bhi hai tiraa hi talabgaar subh-o-shaam chalti nahin hai saans nikalti nahin hai jaan apne liye to ziist hai aazaar subh-o-shaam chhaayaa hai ham pe koi 'ajab saa junun-e-yaar karte hain apne aap se guftaar subh-o-shaam gheraa hai mujh ko zo'f ne 'ahd-e-shabaab mein rahtaa huun muddaton se main bimaar subh-o-shaam aankhon ke gird halqon kaa mere sabab na puchh rahtaa huun gham mein us ke main bedaar subh-o-shaam hotaa hai vajh is ki 'mudassir' mu'aashra rahtaa nahin koi yunhi bezaar subh-o-shaam"

"huaa jo khatm miraa sim-o-zar gae ahbaab isi sabab mire dil se utar gae ahbaab yuun kaaT di miri shah-rag mujhe khabar na hui baDe hunar se miraa qatl kar gae ahbaab kabhi thaa vaqt ki thi dosti 'aziz az-jaan guzar gai vo sadi vo guzar gae ahbaab unhein nikaal do dil se rakho na soch mein bhi 'mudassir' aise hi samjho ki mar gae ahbaab"

"Dasne se jin ke saanp bhi jaae hai jaan se zahrile is qadar hain kuchh insaan zabaan se banti nahin banaae miri khaandaan se guzre hai kyaa har ek isi imtihaan se kaise kare yaqin kisi aur par vo gul khatra jise ho shaam-o-sahar baaghbaan se lab kholne se pahle karo khuub ghaur tum phir tiir lauTtaa nahin niklaa kamaan se khinchi hai main ne apni khushi yuun nasib se farhaad jaise nahr nikaale chaTaan se kirdaar mein 'amal nazar aataa nahin tire kuchh bhi badal na paaegaa apne bayaan se koi khushi bhi lauT kar aae kabhi yahaan nikle kabhi to gham ki nahusat makaan se haathon se apne dafn kiyaa hai unhein bhi yaar hote the jo qarib kabhi apni jaan se duniyaa ghulaam-e-'aql na samjhi ye masala mazhab pare hai 'ishq-o-vafaa kaa gumaan se shaayad ki de sukun 'mudassir' hamein lahad ham thak gae hain roz nae imtihaan se"

"kabhi milte the 'mudassir' ba-junun-e-jazbaat hain ravaa rabt magar ab ke badun-e-jazbaat jis ke gaare mein hi shaamil huaa fuqdaan-e-yaqin gir hi jaataa hai phir us ghar kaa sutun-e-jazbaat be-asar hai varaq-e-dil pe ye tahrir miri raushnaai mein jo shaamil na ho khun-e-jazbaat aagahi se hain haqiqat ki vo aankhein mahrum jin pe ho parda-e-auhaam-o-fusun-e-jazbaat ek muddat se kinaare nahin lagne deti misl-e-tufaan hai ik mauj darun-e-jazbaat"

"hai daaimi ye javaani na zindagaani hai bahaar gar hai chaman mein khizaan bhi aani hai nazar mein jin ke baraabar hain khaar ho ki ho gul unhin ko muzhda-e-manzil ki shaad-maani hai huun shash-jihaat se baahar ki justuju mein magan zamin kaa huun makin soch laa-makaani hai dil-o-dimaagh pe koi asar na chhoDe gar to vaa'iz aap ki taqrir be-ma'aani hai tamaam shahr pe jaadu kare miri ye ghazal radif qaafiye ke saath yuun nibhaani hai yahi hai falsafa-e-zindagi mire nazdik ghamon mein lipTi khushi asl zindagaani hai"

"udhaD jaae jo ik bakhiya to haiat hi badal jaae libaas-e-rishta-haa-e-khun ki vaq'at hi badal jaae musavvar hai vo aisaa jis ki har takhliq hai shahkaar zaraa saa 'uzv yaan se vaan ho murat hi badal jaae uThaae rukh se aanchal to siyaahi shab ki chhaT jaae haTaae zulf to mah ki bhi qismat hi badal jaae khulein gar qissa-haa-e-khalvat-e-murshid muridon par nigaahon se vo gir jaaein 'aqidat hi badal jaae 'ajab hai kaifiyat apni 'mudassir' muztarib hai dil mile koi to phir andar ki haalat hi badal jaae"

"labon se koi jab bhi kam boltaa hai to phir chashm-e-pur-nam se gham boltaa hai hai is vaaste meri aavaaz mein dard tire hijr kaa is mein gham boltaa hai kabhi baatein karte jo thaktaa nahin thaa tire baa'd vo shakhs kam boltaa hai na de but-kade mein sadaaein use tu ai dil kyaa koi bhi sanam boltaa hai tire naam kaa vird itnaa kiyaa hai jahaan tujh ko meraa dharam boltaa hai sabab haal-e-khasta kaa puchhe jo koi tiraa naam palkon kaa nam boltaa hai 'mudassir' khamoshi se sahtaa thaa har zulm magar dard us kaa qalam boltaa hai"

"khabar kise thi ki aisaa bhi imtihaan hogaa jo harz-e-jaan hai banaa vo vabaal-e-jaan hogaa main is liye nahin kahtaa kisi se apne raaz ki raaz-daan kaa bhi koi to raaz-daan hogaa kabhi to degaa vo us gul talak rasaai hamein kabhi to ham pe bhi gulchin vo mehrbaan hogaa farefta hai hami par ye sham'-e-mahfil bhi hue na ham to na ye zauq aur samaan hogaa muraad-e-dil jo 'mudassir' abhi na bar aai to is taDap kaa abhi aur imtihaan hogaa"

"nasib-e-khasta ki me'raaj-o-'id chaahtaa huun main apne chaand ki ik baar diid chaahtaa huun tamaam zakhm-e-dil ab ho gae puraane se ai mehrbaan koi ghaav jadid chaahtaa huun mariz-e-'ishq ko jo kheinch laae marghaT se mire khudaa koi aisi umiid chaahtaa huun use sunaaun ki vo zulm phir kabhi na kare sitam pe shaikh ji aisi va'id chaahtaa huun hai ik nigaah kaa teri mujhe to ab bhi khumaar tiraa karam koi aisaa mazid chaahtaa huun bahut sataayaa hai makhluq ne tiri yaa-rab sukun ab pae-hazrat-farid chaahtaa huun"