Ghazal

"faqat yunhi to nahin naaz-aafrin hai vo miri nigaah se dekho bahut hasin hai vo hai misl-e-uqda miri zaat se vo paivasta jahaan-jahaan main nahin huun vahin vahin hai vo tum us ke rang-e-rukh-o-lab ki baat karte ho khud apni aatish-e-tevar se aatishin hai vo kabhi na sard huaa meri zaat kaa dozakh kisi ne sach hi kahaa hai jahannamin hai vo hai is asar se hi khun-rez chashm-e-naaz us ki ki muddaton se ragon mein panah-guzin hai vo vo kaise aaina-e-inhimaak mein aae ki lamha bhar ko bhi mujh se judaa nahin hai vo jab us ko dekh ke aataa hai yaad rab mujh ko to kyon kahun ki harif-e-khudaa-o-din hai vo vo jis tarah nazar-andaaz kar rahaa hai mujhe to lag rahaa hai ki ghaafil zaraa nahin hai vo miTaa chukaa huun sabhi naqsh us ke qadmon ke magar ye vahm hai ab bhi yahin kahin hai vo"

"mire kirdaar ke raushan havaale aap rakh liije mujhe de kar khushi mere ye naale aap rakh liije mire ashkon se tar ye chand auraaq-e-tamanna hain ye mujh se to nahin jaate sambhaale aap rakh liije agar majnun hamein rahnaa hai to lailaa bhi koi ho masaafat ham rakhein paanv ke chhaale aap rakh liije hamaare naam se hi faal kaa aaghaaz kijegaa parinda jo bhi phir qura nikaale aap rakh lijiye hamein jal jaane hi diije ki ham jal kar hi raushan hain andhere ham sameTeinge ujaale aap rakh liije ye duniyaa ki chamak ye dard-e-dil ye be-khudi meri na jaane kab mujhe apnaa banaa le aap rakh lijiye mujhe sach kahne diije meri fitrat kaa taqaazaa hai zabaan par mohr aur honTon pe taale aap rakh liije"

"aaqibat naa-shanaas huun aur huun gham ye hai be-libaas huun aur huun tu zamaana-shanaas thaa aur thaa main mohabbat-shanaas huun aur huun tu bahut duur thaa aur aaj nahin main tire aas-paas huun aur huun log maayus ho ke jaa bhi chuke aur main kab se udaas huun aur huun lahar hotaa to ban ke miT jaataa main kinaare ki ghaas huun aur huun saaraa mazmun kaun paDhtaa hai main to bas iqtibaas huun aur huun mere hone ki suratein kyaa hain main faqat apnaa maas huun aur huun bandagi mujh ko raas ho ki na ho main khudaai ko raas huun aur huun mujh pe ik bojhaa hai doi meri apne hone ki pyaas huun aur huun"

"aakhiri vaar kar rahaa huun main apnaa inkaar kar rahaa huun mein aaD apne hi jism ki le kar ruuh ko taar kar rahaa huun main apne dukh baanT kar zamaane mein kitnaa isaar kar rahaa huun main hai mohabbat bhi kaar-e-fan ki jise dil se har baar kar rahaa huun main kis mahaarat se is Daraame mein apnaa kirdaar kar rahaa huun main tiir khaane se us ke is fan mein us ko fankaar kar rahaa huun main kuchh to bimaar hai vo pahle se aur bimaar kar rahaa huun main dost ahbaab kyon khajil hain aaj zikr-e-aghyaar kar rahaa huun main main agar jaa chukaa to phir kis se ab bhi takraar kar rahaa huun main apni naakaami ki duaa kar ke marzi shab kar rahaa huun main khud hi taamir kar ke but apnaa khud hi mismaar kar rahaa huun main ik na ik shai har umr mein ab bhi be-sarokaar kar rahaa huun main koi to mujh se haar kar jiite sab se hi haar kar rahaa huun main jaane kis ahd ke liye 'raashid' us ko tayyaar kar rahaa huun main"

"hai aaj mujh par itaab aisaa ki jiit kar haar chun rahaa huun main apne har samt duur tak sirf khaar hi khaar chun rahaa huun hon khvaab zinda to zehn-e-insaan un ki taabir maangtaa hai main is liye apne saare khvaabon ko bain-S-divaar chun rahaa huun adu se main be-khabar nahin huun javaab main bhi zarur dungaa main us kaa har vaar jhel kar sab se kaargar vaar chun rahaa huun ye meraa manshur to nahin hai main apne dushman ko bhi sazaa duun mire ilaahi main kyon qalam chhoD kar ye hathiyaar chun rahaa huun main ahl-e-maghrib kaa muntazir huun khudaa unhein kaamyaab kar de vo jald marham talaash kar lein main apne bimaar chun rahaa huun ye raah-e-haq par jo gaamzan hain lagaa chuke hain saron ki baazi jo sar salaamat rakhe hue hain unhin ko sardaar chun rahaa huun mire numu se jo ye taghayyur hai mujh mein ye bhi kamaal-e-rab hai main rab ki azmat ke hi tanaazur mein koi shahkaar chun rahaa huun hai koi boli lagaane vaalaa kharid le jo zamir meraa main ek hi khush-nasib taajir huun jo kharidaar chun rahaa huun abhi ishaaraa huaa hai mujh ko ki saath mere hon chand rufaqaa so vaapsi kaa hai dar khulaa hai main bas vafaadaar chun rahaa huun"

"teri chaahat mein kami kaise gavaaraa kar lein ishq rozi to nahin hai ki guzaaraa kar lein manfaat chaahe to ulfat ko tijaarat na banaa jaante bujhte ham kaise khasaaraa kar lein tu havaaon ke jhapTTe mein na aayaa ho kahin do ghaDi Thahar jaa teraa bhi utaaraa kar lein tere vaadon pe yaqin ho to usi aas se ham jism ko raakh karein ruuh ko paara kar lein ghair se bhi vo mukhaatab hain to ummid si hai baat ham se na sahi zikr hamaaraa kar lein kaise bardaasht karein ghair ki tujh par tanqid khud bhi shaaki hon to khud se bhi kinaaraa kar lein ham se ghaafil nahin rahte kabhi tufaan ki kahin Dubte Dubte tinke ko sahaaraa kar lein hui matruk-e-vafaa aam hui bul-havasi aql kahti hai ki ham bhi koi chaara kar lein"

"tiri yaadon kaa mahshar khinchte hain chalo phir din kaa chakkar khinchte hain saveraa aan baiThaa hai saron par uTho phir shab ki chaadar khinchte hain hamaari pyaas misl-e-dasht-o-sahraa ham aankhon se samundar khinchte hain yahaan har su samaan hai jashn kaa saa magar ham gham baraabar khinchte hain tiri mai ki nahin ye baat saaqi hamein apne hi tevar khinchte hain hamein kab raas khushki ke jazire chal uTh jaa dost langar khinchte hain"

"kabhi nazr-e-mashq-e-sukhan kiyaa kabhi aansuon mein bahaa diyaa ki hamaare sar gham-e-aagahi kaa jo qarz thaa so chukaa diyaa main huun mah-e-vaqt kaa ham-nasab main tulu-e-sahar kaa huun sabab main charaagh-e-aakhir-e-shab nahin ki na khud bujhaa to bujhaa diyaa main haqiqaton kaa asiir huun hai tilism-e-khvaab-o-khayaal tu tiri raushni hai dhuaan dhuaan miri tirgi bhi diyaa diyaa main hi rabt-e-vahm-o-gumaan huun tiri manzilon kaa nishaan huun koi sang-e-raah to huun nahin jise Thokaron se haTaa diyaa miri daastaan mein khushi-o-ranj ke moD bhi to ajiib the kabhi qahqahon mein bhi ashk the kabhi fart-e-gham ne hansaa diyaa"

"ye pathraae hue dil kab kudurat se nikalte hain ye vo insaan hain jo patthar ki murat se nikalte hain mujhe milne se matlab aur vo matlab se miltaa hai yahaan sab apni apni hi zarurat se nikalte hain ye sach hai vaapsi tak nuur chehre par nahin rahtaa ham apne ghar se yuun to khubsurat se nikalte hain zarurat be-gharaz rishte bhi aksar phunk deti hai chalo be-laus ho kar is zarurat se nikalte hain tiri tasvir bhi akkaas aakhir kyaa utaareinge kahaan ye 'aks gahre teri surat se nikalte hain hamaari maut par bhi gar Drama chalte rahnaa hai to is kirdaar se baahar mahurat se nikalte hain"

"ye bhi mumkin hai use tujh se sarokaar na ho dil kisi aur hi uljhan mein giraftaar na ho mujh ko khush-haal vo paa kar kahin be-zaar na ho kah do tum taale-e-khvaabida se bedaar na ho ham-rikaab aap hain girne kaa hai phir khauf kise lutf tab hai ki koi raah bhi hamvaar na ho tere bismil ki duaaein bhi tire haq mein hain arsh kis taur se phir teraa madad-gaar na ho kaun kahtaa hai mujhe izn-e-rihaai mil jaae ye sazaa us ko sunaa tujh se jise pyaar na ho un kaa ye zauq-e-masihaai salaamat hai to dil kaise mumkin ho ki zinda to ho bimaar na ho aaj apnon ki taraf se jo nahin pursish-e-gham dekhnaa ye bhi kahin saazish-e-aghyaar na ho"