Ghazal

"tasavvur kahkashaan hotaa nahin hai to ab mujh se bayaan hotaa nahin hai taDap meri jabin ki baDh gai hai magar tu aastaan hotaa nahin hai miri qismat mein hai jaltaa sitaara bikhar ke jo dhuaan hotaa nahin hai miri saanson mein tu aTkaa huaa hai tabiat mein ravaan hotaa nahin hai khushi ab bhi mujhe hoti hai lekin vo pahlaa saa samaan hotaa nahin hai vo dariyaa hai jahaan ik baar guzre vo rasta be-nishaan hotaa nahin hai main us ke saath chalti jaa rahi huun jo meraa kaarvaan hotaa nahin hai tujhe ashkon mein main kaise bahaa duun tu mujh se raaegaan hotaa nahin hai mire lafzon mein hai zaahir magar tu nigaahon se ayaan hotaa nahin hai"

"jo ashk aankhon mein tham gae hain tire tasavvur mein jam gae hain jo tu masihaa banaa hai meraa kidhar na jaane ye gham gae hain khaDe hain paaon pe apne ham to jahaan sahaare the kam gae hain jo teri mahfil mein hanste aae vo le ke aankhon ko nam gae hain kabhi na lauTaayaa us ne khaali jo le ke daaman ye ham gae hain"

"maqaam-e-girya-o-zaari nahin hai takallum ishq pe bhaari nahin hai ye sochein us se mil kar khil uThi hain koi ilhaam to jaari nahin hai tumhaari muskuraahaT mein chhupi si kahaani hai magar saari nahin hai tire lahje se aksar phuTti thi vo khushbu aaj bhi haari nahin hai sukut-e-shab ki kyaa batlaaein tum ko ki us se shai koi bhaari nahin hai"

"duniyaa ki aab-o-taab se aage chale gae ham ishq ke azaab se aage chale gae aankhon ne likh liye hain fasaane umiid ke aansu fasil-e-aab se aage chale gae us ne qubuliyat ki sanad jab se di mujhe sab harf is kitaab se aage chale gae jab khushbuon ke dar pe hui raushni to ham gulshan ke har gulaab se aage chale gae khaamoshiyon ki jab se samajhne lage zabaan lafzon ke iztiraab se aage chale gae aankhein chamak uThi hain jo raushan khayaal se divaangi ke khvaab se aage chale gae"

"khayaal-e-hijr mein ab jo bhi saaneha hogaa vahi to phir se nayaa ek silsila hogaa kise khabar thi ki is raushni ki chaadar mein hamaaraa ishq mein phulon se raabta hogaa amir-e-shahr ko paighaam mil bhi jaae to gharib-e-shahr kaa koi na aasraa hogaa nae ufuq se gurezaan na ho mire hamdam puraani soch se ab ye na faisla hogaa khudaa kaa shukr duaaein jo rang laai hain likhungi lafz main jo bhi vo barmalaa hogaa suneinge log ye jab bhi miri kahaani ko hisaar-e-zaat ke qaidi kaa maajraa hogaa ajiib haal hai andar ki khalfashaari kaa kise khabar thi ki aisaa ye haadisa hogaa"

"dil ki dahliz talak khud ko rasaai degaa miraa lahja mire sheron mein sunaai degaa meraa honaa hai huaa jis ki badaulat mumkin ab vo chehra miri aankhon mein dikhaai degaa main ne aankhon se tujhe duur kiyaa thaa lekin ye na sochaa thaa khudaa aisi judaai degaa aur zarkhez karegaa ye mire lafzon ko hijr yaktaa hai to yaktaa hi kamaai degaa dekh kar dasht ke tevar main yahi sochti huun ishq abhi aur mujhe aabla-paai degaa main ne us dil ko dhaDakne se hai rokaa varna tu samajhtaa hai tujhe koi duhaai degaa"

"vaqt be-vaqt dilbari karnaa tum se sikhaa hai bas yahi karnaa teri aankhon ko tere chehre ko bhar ke aankhon mein raushni karnaa us se puchhun vafaa kaa jo matlab mujh se kahtaa hai shaairi karnaa dar-ba-dar ho ke chaand ne jaanaa kaisaa lagtaa hai chaandni karnaa kitnaa mushkil hai dekho jiine mein saans lene ko zindagi karnaa"

"baDe naazuk se jazbon se mohabbat main ne paali thi phir apne qimti lafzon ki us mein jaan Daali thi na-jaane kaun se mazhab se divaane kaa rishta thaa ki us ne apni hi tanhaa si ik basti basaa li thi gulon saa chaand saa taaron saa ham bhi shor karte the ki kis darja mohabbat ham ne sar pe hi uThaa li thi kabhi sochaa hai tum ne bhi main chup kyon ho gai aakhir ki main ne sabr se apni zabaan dil mein dabaa li thi kahin vo aakhiri lamha tiri uljhan na ban jaae so tujh se apni aankhon ki nami main ne chhupaa li thi"

"ab mujh se udaasi tiri dekhi nahin jaati ye dard-shanaasi tiri dekhi nahin jaati khilte hue phulon ki tarah teri hansi hai surat ye khafaa si tiri dekhi nahin jaati ikhlaas ke jazbon se sajaa rishta hamaaraa taklif zaraa si tiri dekhi nahin jaati lagtaa hai ki viraan si har chiiz hui hai badli ye udaasi tiri dekhi nahin jaati puure hon tire khvaab mire dil ki duaa hai ummid ye pyaasi tiri dekhi nahin jaati"