Ghazal

"safar mein mushkilein aaein to jurat aur baDhti hai koi jab raasta roke to himmat aur baDhti hai bujhaane ko havaa ke saath gar baarish bhi aa jaae charaagh-e-be-haqiqat ki haqiqat aur baDhti hai miri kamzoriyon par jab koi tanqid kartaa hai vo dushman kyuun na ho us se mohabbat aur baDhti hai zarurat mein azizon ki agar kuchh kaam aa jaao raqam bhi Duub jaati hai adaavat aur baDhti hai agar bikne pe aa jaao to ghaT jaate hain daam aksar na bikne kaa iraada ho to qimat aur baDhti hai"

"nindon kaa bojh palkon pe Dhonaa paDaa mujhe aankhon ke iltimaas pe sonaa paDaa mujhe taa-umr apne kaandhon pe be-gor be-kafan apni anaa ki laash ko Dhonaa paDaa mujhe kam-zarf naa-khudaaon ke ehsaan se bach gayaa haalaan ki kashtiyon ko Dubonaa paDaa mujhe vo meri bebasi pe kuchh itnaa hansaa 'navaaz' hansne ke ehtiraam mein ronaa paDaa mujhe"

"sahraa sahraa chikhtaa phirtaa huun main ho ke dariyaa kis qadar pyaasaa huun main jaan kar gungaa huun aur bahraa huun main is liye is shahr mein zinda huun main is ko manzil jaante hain raahbar itifaaqan jis jagah Thahraa huun main qaid huun main vusaton ke baavajud vo miraa saahil hai aur dariyaa huun main us ne rasman jab bhi puchhaa meraa haal main ne tanzan kah diyaa achchhaa huun main vo shajar tanhaa shajar chaupaal kaa us shajar kaa aakhiri pattaa huun main"

"koi mujh mein hai main kisi mein huun main andheraa huun raushni mein huun tere gham mein huun main khushi mein huun dhuup mein aur chaandni mein huun maut jis se najaat deti hai qaid aisi hi zindagi mein huun kyuun mire dost mujh se bachte hain aisaa lagtaa hai muflisi mein huun mere aib-o-hunar chhupein kaise main 'navaaz' apni shaairi mein huun"

"dharti par jab khuun bahtaa hai baadal rone lagtaa hai dekh ke shahron ki viraani jangal rone lagtaa hai laakh kare vo zabt kaa daavaa vaqt-e-rukhsat sab be-kaar aankhein chaahein roein na roein kaajal rone lagtaa hai beTi ki zid ke aage maan chup ho jaati hai lekin nange sar ki mahrumi par aanchal rone lagtaa hai khushbu khushbu lipTe rahnaa saanpon ki majburi hai varna apni be-qadri par sandal rone lagtaa hai tujh se bichhaD kar ghair ke aage roe hon to ham mujrim dil kaa kyaa hai dil paagal hai paagal rone lagtaa hai"

"zakhm kaa marham dard kaa apne darmaan bech ke aae hain ham lamhon kaa saudaa kar ke sadiyaan bech ke aae hain bikne par jab aa hi gae the unche mol to bikte ham ham ko hamaare rahbar lekin arzaan bech ke aae hain meinh kyuun barse khushk zamin par kaise ho maqbul-e-duaa jab khud baarish maangne vaale nadiyaan bech ke aae hain bhuuk ki ye shiddat bhi aakhir kyaa se kyaa kar deti hai majburan kal bachchon ki ham guDiyaan bech ke aae hain"

"be-kaar jab duaa hai davaa kyaa karegi aaj aise mein zindagi bhi vafaa kyaa karegi aaj ye daur sakht-o-talkh kalaami kaa daur hai lahjon ki narm tarz-e-adaa kyaa karegi aaj kal tak bahut ghurur mein phirti thi zindagi ab maut saamne hai bataa kyaa karegi aaj zabt-e-gham-e-firaaq ki dil mein kahaan sakat zaalim ke ruThne ki adaa kyaa karegi aaj"

"le ke maazi ko jo haal aayaa to dil kaanp gayaa jab kabhi un kaa khayaal aayaa to dil kaanp gayaa aisaa toDaa thaa mohabbat mein kisi ne dil ko jab kisi shishe mein baal aayaa to dil kaanp gayaa sar-bulandi pe to maghrur the ham bhi lekin chaDhte suraj pe zavaal aayaa to dil kaanp gayaa bad nazar uThne hi vaali thi kisi ki jaanib apni beTi kaa khayaal aayaa to dil kaanp gayaa"

"musaafir bhi safar mein imtihaan dene se Darte hain mohabbat kyaa kareinge vo jo jaan dene se Darte hain tiri yaadon ke mausam bhi tujhe rusvaa nahin karte sulagte hain dil-o-jaan aur dhuaan dene se Darte hain sharik-e-zindagi hai e'tibaar-e-zindagi varna makaan maalik kiraae par makaan dene se Darte hain buzurgon ki koi suntaa nahin hai is zamaane mein baDe chhoTon ke baare mein zabaan dene se Darte hain mire qaatil ki mere ghar se hi imdaad hoti hai mire bhaai mire haq mein bayaan dene se Darte hain"

"do-chaar kyaa hain saare zamaane ke baavajud ham miT nahin sakeinge miTaane ke baavajud ye raaz kaash baad-e-mukhaalif tu jaan le kyuun jal rahe hain tere bujhaane ke baavajud ab bhi bahut ghurur hai ik haath par use ik haath haadse mein ganvaane ke baavajud buzdil thaa mustahiq thaa main mujh ko sazaa mili bakhshaa na us ne haath uThaane ke baavajud khvaabon ke shauq mein kahin aankhein ganvaa na dein ham so rahe hain niind na aane ke baavajud"

"zabaan vaalon se ik be-zabaan puchhtaa hai makin kahaan gae khaali makaan puchhtaa hai khudaa yahaan bhi ta'assub vahaan bhi hai ki nahin karachi vaalon se hindostaan puchhtaa hai mujhe ye dhuup ye barsaat kyuun sataati hai ye baat mujh se miraa saaebaan puchhtaa hai mizaaj puchhne vaalon se khairiyat teri tiraa mariz tiraa nim-jaan puchhtaa hai hamaare baare mein kuchh puchhtaa nahin koi koi nasab to koi khaandaan puchhtaa hai"

"vo rulaa kar hans na paayaa der tak jab main ro kar muskuraayaa der tak bhulnaa chaahaa kabhi us ko agar aur bhi vo yaad aayaa der tak khud-ba-khud be-saakhta main hans paDaa us ne is darja rulaayaa der tak bhuke bachchon ki tasalli ke liye maan ne phir paani pakaayaa der tak gungunaataa jaa rahaa thaa ik faqir dhuup rahti hai na saayaa der tak kal andheri raat mein meri tarah ek jugnu jagmagaayaa der tak"

"vo bevafaa hai use bevafaa kahun kaise buraa zarur hai lekin buraa kahun kaise jo kashtiyon ko Dubotaa hai laa ke saahil par tumhi bataao use naakhudaa kahun kaise ye aur baat bure ko buraa nahin kahtaa buraa buraa hai bure ko bhalaa kahun kaise vo meri saanson mein dil mein nazar mein ghazlon mein main apne-aap se is ko judaa kahun kaise jo tujh se kahnaa hai duniyaa se vo chhupaanaa hai agar ghazal na kahun to bataa kahun kaise havaa ki shah pe jalaataa hai ghar gharibon ke 'navaaz' aise diye ko diyaa kahun kaise"

"manzil pe na pahunche use rasta nahin kahte do chaar qadam chalne ko chalnaa nahin kahte ik ham hain ki ghairon ko bhi kah dete hain apnaa ik tum ho ki apnon ko bhi apnaa nahin kahte kam-himmati khatra hai samundar ke safar mein tufaan ko ham dosto khatra nahin kahte ban jaae agar baat to sab kahte hain kyaa kyaa aur baat bigaD jaae to kyaa kyaa nahin kahte"

"tere aane ki jab khabar mahke teri khushbu se saaraa ghar mahke shaam mahke tire tasavvur se shaam ke baad phir sahar mahke raat bhar sochtaa rahaa tujh ko zehn-o-dil mere raat bhar mahke yaad aae to dil munavvar ho diid ho jaae to nazar mahke vo ghaDi-do-ghaDi jahaan baiThe vo zamin mahke vo shajar mahke"

"ji ke dekhaa hai mar ke dekheinge ye tamaasha bhi kar ke dekheinge raas aataa nahin simaTnaa jab sochte hain bikhar ke dekheinge apne jalve vo aazmaaeinge hausle ham nazar ke dekheinge ham-safar raaston mein kyaa ruknaa manzilon se guzar ke dekheinge naa-khudaai ki aaj gahraai kashtiyon se utar ke dekheinge"

"tegh apni jagah daar apni jagah aur haqiqat kaa izhaar apni jagah ab khanDar hai khanDar hi kaho dosto shish-mahlon ke aasaar apni jagah tuur par laakh muusaa se ho guftugu arsh-e-aazam pe didaar apni jagah avvalan haq ne takhliq jis ko kiyaa sab ke baad us kaa izhaar apni jagah mukhtasar ye bataa sar-ba-kaf kaun thaa jiit apni jagah haar apni jagah bhaai se bhaai ke kuchh taqaaze bhi hain sahn ke beach ki divaar apni jagah"

"khud ko kitnaa chhoTaa karnaa paDtaa hai beTe se samjhauta karnaa paDtaa hai jab aulaadein naalaaeq ho jaati hain apne uupar ghussa karnaa paDtaa hai sachchaai ko apnaanaa aasaan nahin duniyaa bhar se jhagDaa karnaa paDtaa hai jab saare ke saare hi be-parda hon aise mein khud parda karnaa paDtaa hai pyaason ki basti mein shoale bhaDkaa kar phir paani ko mahngaa karnaa paDtaa hai hans kar apne chehre ki har silvaT par shishe ko sharminda karnaa paDtaa hai"

"jashn-e-gham-e-hayaat manaane nahin diyaa is muflisi ne zahr bhi khaane nahin diyaa ham ne jo saada-lauhi mein khaayaa koi fareb phir vo fareb auron ko khaane nahin diyaa aandhi ne raushni ki himaayat to ki bahut lekin koi charaagh jalaane nahin diyaa ik-aadh ghar to jal gayaa par shahr bach gayaa ab ke diye kaa saath havaa ne nahin diyaa raazi thaa main bhi aur miraa dushman bhi sulh par kuchh doston ne haath milaane nahin diyaa"

"dil dhaDaktaa hai to aati hain sadaaein teri meri saanson mein mahakne lagin saansein teri chaand khud mahv-e-tamaashaa thaa falak par us dam jab sitaaron ne utaarin thiin balaaein teri sher to roz hi kahte hain ghazal ke lekin aa kabhi baiTh ke tujh se karein baatein teri zehn-o-dil tere tasavvur se ghire rahte hain mujh ko baahon mein liye rahti hain yaadein teri kyuun miraa naam mire sher likhe hain in mein chughliyaan karti hain mujh se ye kitaabein teri be-khabar oT se tu jhaank rahaa ho ham ko aur ham chupke se tasvir banaa lein teri"