Ghazal

"haris-e-khvaahish-e-laal-o-guhar nahin hui main mohabbaton mein talabgaar-e-zar nahin hui main tiraa khayaal rahaa dil ki dhaDkanon ke qarin so tere gham se kabhi be-khabar nahin hui main sajaayaa khud ko vafaa ke singhaar se main ne isi sabab se kabhi be-hunar nahin hui main kisi ko kaise bataati main manzilon kaa pata jab apne saath sharik-e-safar nahin hui main khudaa-e-husn-azal ne mujhe navaazaa hai khumaar-e-ishq se sarf-e-nazar nahin hui main hai us kaa daavaa ki main us ki zindagi huun 'naaz' vo kyaa karegaa kisi din agar nahin hui main"

"main us mein aks-e-talab apnaa DhunDhti hi rahi magar vo chashm-e-mohabbat ki ajnabi hi rahi vo ik charaagh jo us lams ne jalaayaa thaa mire badan mein sadaa us ki raushni hi rahi qaraar paayaa nahin tere qurb mein bhi magar tujhe ganvaa ke bhi is dil mein be-kali hi rahi go mukhtasar the bahut tere vasl ke lamhe tamaam umr tire gham se dosti hi rahi khudaa nahin to magar umr bhar mohabbat mein tire huzur jabin-e-vafaa jhuki hi rahi"

"chaman saa dasht taa-hadd-e-nazar kitnaa hasin hai tu meraa ham-qadam hai to safar kitnaa hasin hai miri jaanib lapakti manzilon se puchh lenaa kisi ke saath chalne kaa hunar kitnaa hasin hai vo mere saamne baiThaa huaa hai meraa ho kar duaa-e-nim-shab kaa ye asar kitnaa hasin hai zahe qismat ki saaye daar bhi hai baa samar bhi mire sar par mohabbat kaa shajar kitnaa hasin hai ajab khvaab aashnaa aankhein hui hain vasl ki shab khuli hai aankh to rang-e-sahar kitnaa hasin hai main hansti khelti huun jis ke khvaab naa-rasaa mein miraa ehsaas hasrat hai magar kitnaa hasin hai nahin hai 'naaz' kam jannat se meraa aashiyaana mohabbat se muzayyan meraa ghar kitnaa hasin hai"

"dil-o-nigaah ki hairat main rah gae hain ham khumaar-e-khvaab ki lazzat mein rah gae hain ham churaa ke le gai duniyaa-e-pur-fareb us ko aur apni saada tabiat mein rah gae hain ham hamein to khinch rahaa thaa safar tiri jaanib bas is jahaan ki rivaayat mein rah gae hain ham vo dekhtaa hai ki jaise na ham ko dekhaa ho is aaine ki sharaarat mein rah gae hain ham hamein talaash rahaa thaa visaal kaa lamha kisi ke hijr ki saaat mein rah gae hain ham havaa ke saath kahaan tak gulaab jaa sakte bikhar ke raah-e-mohabbat mein rah gae hain ham vo apne khvaab ke hamraah jaa chukaa hai naaz akele apni haqiqat mein rah gae hain ham"

"kuchh is adaa se hamein gham-gusaar milte hain hazaar zakhm pas-e-e'tibaar milte hain shab-e-firaaq ki vahshat na puchhiye ham se ham apne hijr se divaana-vaar milte hain ye shahr-e-zakhm-faroshaan hai haae kyaa kiije ki paa-e-gul bhi yahaan khaar khaar milte hain vo jin ki kokh mein shauq-e-khirad panaptaa hai vo valvale bhi junun kaa shikaar milte hain sajaa ke rakhte hain jin ko chamak ki khvaahish mein vo aaine bhi hamein daagh-daar milte hain hamein unhi se tavaqqo hai 'naaz' manzil ki jo raaste hamein ban kar ghubaar milte hain"

"pahle dukh dard kai dil mein sambhaale main ne phir kiyaa khud ko tire gham ke havaale main ne kyuun khule tujh pe safar mein thi aziyat kaisi kab dikhaae hain tujhe ruuh ke chhaale main ne tu ne har gaam jo bakhshe hain andhere mujh ko un andheron mein tire khvaab ujaale main ne teri tasvir mire paas thi yaani tu thaa din tire hijr ke is khvaab mein Taale main ne tere gham se kiyaa duniyaa ke ghamon kaa chaara yaani ik khaar se sab khaar nikaale main ne shahr vaalon ne inhein abr-e-karam samjhaa naaz apne aansu jo havaaon mein uchhaale main ne"

"kisi bhi samt koi dil-kushaa manzar nahin miltaa vafaa ke shahr mein ehsaas kaa paikar nahin miltaa ye kaisaa aks hai jo aaine ke saath rah kar bhi kabhi baahar nahin rahtaa kabhi andar nahin miltaa hujum-e-gham-gusaaraan yuun to hai har gaam par lekin jise ham DhunDte hain 'naaz' vo aksar nahin miltaa"

"tiraa nasib banun teri chaahaton mein rahun tamaam umr mohabbat ki vahshaton mein rahun khumaar hasrat-e-didaar mein rahun har dam savaad-e-ishq yunhi teri shiddaton mein rahun ye zindagi ki haraarat tire sabab se hai main lamha lamha junun ki tamaazaton mein rahun ye ehtimaam-e-shab-o-roz ho miri khaatir tire khayaal ki rangin khalvaton mein rahun sanvaarti hain sadaa jis ki chaahatein mujh ko miri duaa hai ki main us ki hasraton mein rahun ai abr-e-vasl baras aur khul ke mujh pe baras main bhigi bhigi havaa ki sharaaraton mein rahun sharik-e-shauq-e-safar hai agar vo meraa 'naaz' main kyuun na mausam-e-gul ki bashaaraton mein rahun"

"chhupaaein kis tarah aankhein chamak mohabbat ki in aainon mein hai har dam jhalak mohabbat ki dhaDak rahi hai koi yaad surkh phulon mein jhapak rahi hai dilon mein palak mohabbat ki ajiib rang kisi ki nazar se chhiTke hain badan mein phail rahi hai dhanak mohabbat ki har ek shaakh pe khilne lage bahaar mein phuul har ek dil mein uThi hai kasak mohabbat ki dikhaai detaa hai ik aks chaand taaron mein sajaataa rahtaa hai raahein falak mohabbat ki hasin hote hain din khvaab se lapeTe hue gulaab karti hain raatein mahak mohabbat ki kai dinon se mujhe 'naaz' aisaa lagtaa hai qaraar le gai jaise lapak mohabbat ki"

"har ik mausam ki niyyat jaanti hain havaa ke Dar se shaakhein kaanpti hain koi un kaa bhi aa kar haath roke vo yaadein jo dilon ko kaaTti hain mujhe hai bad-du'aa shaayad kisi ki miri aankhon se nindein bhaagti hain badan mein sarsaraati hai khamoshi ragon mein vahshatein si naachti hain 'ajab si kaifiyat hai bebasi ki main so jaaun to aankhein jaagti hain janaazon par janaaze uTh rahe hain sabhi maaon ki ruhein kaanpti hain"

"tujh ko sochun main su-ba-su ho kar main to bas rah gai huun tu ho kar ye tire lams kaa karishma hai phail jaati huun rang-o-bu ho kar tu na ho to main baanjh miTTi huun raakh ho jaaun be-numu ho kar hai tiri qaid mein hi aazaadi Dhaanp le mujh ko chaar su ho kar aaina huun tire vajud kaa main aa kabhi dekh ru-ba-ru ho kar 'naaz' ke lab pe har ghaDi raqsaan tu hi rahtaa hai guftugu ho kar"

"be-khabar hote hoe bhi baa-khabar lagte ho tum duur rah kar bhi mujhe nazdik-tar lagte ho tum kyuun na aauun saj sanvar kar main tumhaare saamne khush-adaa lagte ho mujh ko khush-nazar lagte ho tum tum ne lams-e-mo'tabar se bakhsh di vo raushni mujh ko meri aarzuon ki sahar lagte ho tum jis ke saae mein amaan milti hai meri ziist ko mujh ko jalti dhuup mein aisaa shajar lagte ho tum kyuun tumhaare saath chalne par na aamaada ho dil khushbu-e-ehsaas mere ham-safar lagte ho tum 'naaz' tum par naaz karti hai mohabbat ki qasam zindagi bhar ki duaaon kaa asar lagte ho tum"