Ghazal

"gae dinon ke dariche sajaane lagte hain ham apne haal ko maazi banaane lagte hain khulus-o-mehr-o-mohabbat ki qadr khatm hui hayaat-e-nau mein ye sikke puraane lagte hain vo kaun hai jo unhein khelne nahin detaa vo kam-sini mein jo rozi kamaane lagte hain main teri zulf ke saae mein ruk to jaaun magar tire jamaal ke shoale jalaane lagte hain zamaane baad tu aayaa hai lamha bhar to Thahar ki aate-aate ye lamha zamaane lagte hain jinhon ne qaumi tashakhkhus ko paaemaal kiyaa maaashre ko vo unche gharaane lagte hain hamein vo ghair samajhtaa hai to gila kaisaa ki ibtidaa mein ghalat bhi nishaane lagte hain ye ishq-bel kabhi sukhti nahin 'nusrat' visaal-rut mein isi ko fasaane lagte hain"

"dil-jhil mein pheinkaa hai tiri yaad ne patthar sar se na guzar jaae koi mauj ubhar kar ye phuul se rukh sarv se qad chaand se paikar halchal si machaa dete hain jazbaat ke andar kuchh aur sitam aur sitam ai gham-e-dauraan khulte hain baDi der mein insaan ke jauhar tu paas bhi itnaa ki tujhe dekh na paaun tu duur bhi itnaa ki miri soch se baahar main kaun si manzil ke liye garm-e-safar huun chaltaa nahin koi bhi mire naqsh-e-qadam par ik tu ki tiraa ek hi rishta hai jahaan mein ik main ki mire sainkaDon rishte hain zamin par insaan kaa safar su-e-qamar khuub hai lekin fitne na uThaae ye kahin chaand mein jaa kar ai subh-e-tarab aa miri aankhon mein samaa jaa maghmum na kar jaaein tujhe shaam ke manzar kab tak vo kiraae ke makaanon mein raheinge 'nusrat' jo banaa sakte nahin apne liye ghar"

"yaas hi se kabhi guzar pyaare muntazir hain dil-o-nazar pyaare phuul khilte gae mohabbat ke tu ne dekhaa jidhar-jidhar pyaare gauhar-e-dil ki qadr kyaa karte ye hasin log kam-nazar pyaare do qadam saath kyaa chale ham tum baat pahunchi nagar-nagar pyaare main to khud hi fareb-khurda huun tu miri justuju na kar pyaare ban gae log saahab-e-daulat jins-e-imaan ko bech kar pyaare yuun to ahbaab aur bhi hain bahut tujh se baDh kar nahin magar pyaare tang-dasti mein dekhnaa 'nusrat' bik na jaae kahin hunar pyaare"

"yaad kaa rog mat lagaa pyaare ahd-e-maazi ko bhuul jaa pyaare ji bahaltaa nahin tasavvur se tu kabhi saamne bhi aa pyaare naam ke rah gae hain duniyaa mein dost ahbaab aqrabaa pyaare ye bhi ik tarz-e-gham-gusaari hai tu miraa hausla baDhaa pyaare shisha-e-dil ko toDne vaale tu ne achchhaa nahin kiyaa pyaare jazba-e-shauq mar na jaae kahin ehtiyaatan hi ruuTh jaa pyaare peD se gir ke zard patton ne bhar diyaa farsh kaa khalaa pyaare teraa gham bhi gham-e-zamaana bhi gham bhi khaalis nahin rahaa pyaare aas ke diip to jalaa 'nusrat' shaam kaa vaqt ho chalaa pyaare"

"main ne har gaam pe dhoke khaae mujh ko chehre nahin paDhne aae phir tiri yaad kaa suraj chamkaa phir gurezaan hue mujh se saae main ne khushiyon pe kiye hain mahmul justuju mein jo tiri gham paae jin ke qad misraa-e-mauzun Thahre bas vahi jaan-e-ghazal kahlaae zabt-e-izhaar ko tarse 'nusrat' khuun jazbaat kaa hotaa jaae"

"sahraa ki tarah shahr-e-vafaa hai ki nahin hai har saahib-e-dil aabla-paa hai ki nahin hai pahchaante hain log tire naam se mujh ko ab teraa pataa meraa pataa hai ki nahin hai taskin ke lamhaat ko tarsi hui duniyaa haalaat se har chand khafaa hai ki nahin hai naamus-e-vatan luTne vaalon ke liye bhi yaa-rab koi aain-e-sazaa hai ki nahin hai is zulf ke saae mein ye ehsaas jalaae hanste hue sahraa pe ghaTaa hai ki nahin hai jis husn kaa partav miri taqdir badal de vo mere liye zill-e-humaa hai ki nahin hai 'nusrat' main isi fikr mein rahtaa huun pareshaan insaan ko haqiqat mein fanaa hai ki nahin hai"

"mahbub-e-nazar aap ke chehre ki ziyaa hai matlub-e-jabin aap kaa naqsh-e-kaf-e-paa hai ham ne tire jalve kaa jise aks kahaa hai logon ne use phuul kaa unvaan diyaa hai hanste hue taaron kaa galaa ghonT diyaa hai suraj ki shuaaon ne baDaa zulm kiyaa hai martaa hai to mar jaae koi meri balaa se mujh ko mire maahaul ne ye dars diyaa hai aankhon mein hain aansu ki andheraa hai pur-afshaan jis chehre ko dekhaa vahi dhundlaa saa lagaa hai"

"apne haalaat ke dhaagon se buni hai main ne aaj ik taaza ghazal aur kahi hai main ne kis zarurat ko dabaaun kise puuraa kar luun apni tankhvaah kai baar gini hai main ne chhoTe logon ko baDaa kahnaa paDaa hai aksar ek taklif kai baar sahi hai main ne zindagi ne mujhe siine se lagaa rakkhaa hai jaan jis din se hatheli pe dhari hai main ne main to jaisaa bhi huun sab log mujhe jaante hain tere baare mein bhi ik baat suni hai main ne apne 'aibon ko 'ayaan kar ke khajil huun lekin ye jasaarat bhi agar ki hai to ki hai main ne mere she'ron mein dhaDaktaa hai mire 'ahd kaa dil shaa'iri ki hai ki taarikh likhi hai main ne ek se dusraa insaan judaa hai 'nusrat' har jabin pe nai tahrir paDhi hai main ne"

"sune-sune daar-o-rasan batlaate hain sach kahne se log bahut katraate hain aansu ban jaate hain gham kahlaate hain vo jazbe jo dil hi mein mar jaate hain ye hai baat judaa vo ham se kah na sake varna khvaab to gunge ko bhi aate hain jis ki jaanib aankh uThaanaa mushkil ho ham us sachchaai par qalam uThaate hain har farmaaish aainda par Taaltaa huun bachche mujh se jhuuT bahut bulvaate hain dil teri qurbat mein bhi afsurda hai kyaa shaakhon par bhi ghunche kumhlaate hain dida-o-dil donon kyon ik saath bujhe mehr-o-maah ikaTThe kab gahnaate hain saae phal aur phulon ke badle 'nusrat' sochiye ham ashjaar ko kyaa lauTaate hain"

"faasle na baDh jaaein faasle ghaTaane se aao soch lein pahle raabte baDhaane se 'arsh kaanp jaataa thaa ek dil dukhaane se vo zamaana achchhaa thaa aaj ke zamaane se khvaahishein nahin martin khvaahishein dabaane se amn ho nahin saktaa goliyaan chalaane se dekh-bhaal kar chalnaa laazmi sahi lekin tajrabe nahin hote Thokarein na khaane se ek zulm kartaa hai ek zulm sahtaa hai aap kaa ta'alluq hai kaun se gharaane se kitne zakhm chhilte hain kitne phuul khilte hain gaah tere aane se gaah tere jaane se kaar-zaar-e-hasti mein apnaa dakhl itnaa hai hans diye hansaane se ro diye rulaane se chhoTe chhoTe shahron par kyon na iktifaa kar lein khetiyaan ujaDti hain bastiyaan basaane se zakhm bhi lagaate ho phuul bhi khilaate ho kitne kaam lete ho ek muskuraane se aur bhi sanvartaa hai aur bhi nikhartaa hai jalva-e-rukh-e-jaanaan dekhne dikhaane se jab talak na TuuTe the khair-o-shar ke paimaane vo zamaana achchhaa thaa aaj ke zamaane se har taraf charaaghaan ho tab kahin ujaalaa ho aur ham gurezaan hain ik diyaa jalaane se chaand aasmaan kaa ho yaa zamin kaa 'nusrat' kaun baaz aataa hai ungliyaan uThaane se"