Ghazal

"zindagi jo kah na paai rah gai maut vo saari kahaani kah gai raat bhar us kaa fasaana likh ke ham itnaa roe sab kitaabat bah gai hichkiyon mein dab gayaa us kaa savaal jaise ik dastak adhuri rah gai qurb ke sadme huun yaa duuri kaa gham jitnaa sahnaa thaa mohabbat sah gai jab bhi 'aazar' dil se nikli koi baat dil ki gahraai mein tah-dar-tah gai"

"baaz bhi aao yaad aane se kyaa milegaa hamein sataane se khun-e-dil se diye jalaae hain ho ke guzro gharib-khaane se kaisi be-raunaqi hai mahfil mein ek is ke yahaan na aane se dar-e-dil vaa kiyaa to vo aae kaun aataa hai yuun bulaane se tujh se bichhDe to kab ye sochaa thaa is qadar honge be-Thikaane se ham to hairaan hain ki kyuun ham par zulm hai aur har bahaane se rahne vaalaa hi jab na ho 'aazar' faaeda kyaa hai ghar sajaane se"

"muntazir aankhon mein jamtaa khuun kaa dariyaa dekhte tum nahin aate to saari umr rasta dekhte vusat-e-kaun-o-makaan is regzaar-e-dil mein hai aarzu hai tum bhi aa kar dil kaa sahraa dekhte apne marne ki khabar ik din uDaate kaash ham chaahne vaalon kaa apne phir tamaashaa dekhte sar pe suraj aa gayaa phir bhi na kholi ham ne aankh subh uThte bhi to aakhir kis kaa chehra dekhte is jahaan-e-rang-o-bu mein dekhne ko kyaa rahaa tujh ko dekhaa aur in aankhon se ham kyaa dekhte tere gaalon ke muqaabil dil mein hasrat rah gai ek din to ham shafaq kaa rang gahraa dekhte saare chehre dekh Daale saari duniyaa chhaan li justuju ab tak yahi hai koi tum saa dekhte saare lamhe yaad aate jo guzaare tere saath jangalon mein aag ko jab ham dahaktaa dekhte kyaa pataa siina jalaa deti hamaaraa gham ki aag ham jo apni tarah 'aazar' us ko tanhaa dekhte"

"'ajib jumbish-e-lab hai khitaab bhi na kare savaal kar ke mujhe laa-javaab bhi na kare vo mere qurb mein duuri ki chaashni rakkhe mire liye miraa jiinaa 'azaab bhi na kare kabhi kabhi mujhe sairaab kar ke khush kar de hamesha gumrah-e-sehr-e-saraab bhi na kare 'ajib barzakh-e-ulfat mein mujh ko rakkhaa hai ki vo khafaa bhi rahe aur itaab bhi na kare vo intizaar dikhaae is ehtiyaat ke saath ki meri aankhon ko mahrum-e-khvaab bhi na kare vo raat bhar kuchh is andaaz se kare baatein mujhe jagaae bhi nindein kharaab bhi na kare har ek she'r mein 'aazar' nuqush hain us ke magar vo khud ko kabhi be-naqaab bhi na kare"

"maalum hai vo mujh se khafaa hai bhi nahin bhi mere liye honTon pe duaa hai bhi nahin bhi muddat hui is raah se guzre hue us ko aankhon mein vo naqsh-e-kaf-e-paa hai bhi nahin bhi munh khol ke bolaa nahin jaataa ki shifaa de us paas mire dil ki davaa hai bhi nahin bhi kahte the kabhi ham ki khudaa hai to kahaan hai ab soch rahe hain ki khudaa hai bhi nahin bhi rakkhe bhi nazar bazm mein dekhe bhi nahin vo auron se ye andaaz judaa hai bhi nahin bhi go ziist hai miTti hui saanson kaa tasalsul qiston mein ye jiine ki sazaa hai bhi nahin bhi yaa dil mein kabhi yaa kabhi saDkon pe mileinge ham khaana-kharaabon kaa pataa hai bhi nahin bhi ham se jo banaa sab ke liye ham ne kiyaa hai maalum hai neki kaa sila hai bhi nahin bhi vo mom bhi hai mere liye sang bhi 'aazar' kahte hain ki is dil mein vafaa hai bhi nahin bhi"

"chaahat tumhaari siine pe kyaa gul katar gai kis khush-saliqagi se jigar chaak kar gai rakkhi thi jo sambhaal ke tu ne salaamti vo tere baad kis ko pataa kis ke ghar gai jo zindagi sameT ke rakkhi thi aaj tak ik lamha-e-khafif mein yaksar bikhar gai bhaTke hue the aise ki gard-e-safar ko ham muD muD ke dekhte rahe manzil guzar gai ik umr dhuup mein jo pali thi vo kashmakash saaya ghane darakht kaa dekhaa to Dar gai hairat hai kuchh pataa na chalaa kaise zindagi jaisi guzarni thi miri vaisi guzar gai ochhon ki taba 'aazar'-e-khush-khu se puchhiye juun hi havaa-e-vaqt lagi bas aphar gai"

"marte nahin ab ishq mein yuun to aatish-e-furqat ab bhi vahi hai taur junun ke badle lekin soz-e-mohabbat ab bhi vahi hai umr ki is manzil par bhi ham tujh par jaan nichhaavar kar dein go vo garmi khuun mein nahin hai dil mein qayaamat ab bhi vahi hai tum kyaa jaano jiinaa marnaa ham ne kin sharton par sikhaa aaj bhi aise log hain jin mein shauq-e-shahaadat ab bhi vahi hai kaise kaise marhale guzre jin mein us ne saath diyaa thaa bhuul gae ham lekin us ki ham pe inaayat ab bhi vahi hai kitne koh-e-giraan kaaTe hain kitne sanam taraashe 'aazar' shauq-e-zuhur ki har patthar mein raqsaan vahshat ab bhi vahi hai"

"subh-e-qayaamat jin honTon pe dilaase dekhe kyaa lab-e-dariyaa un jaise bhi pyaase dekhe kaun vafaa ki manzil se is shaan se guzraa chaak-e-qabaa dekhe jo koi balaa se dekhe haathon mein mizaan labon par hukm-e-qazaa hai haakim-e-shahr bhi aksar ham ne khudaa se dekhe dekhne vaale yuun to bahut dekhe hain lekin mar jaaun jo koi teri adaa se dekhe jin ko zom thaa band-e-mizha ki mazbuti par un aankhon se bahte hue dariyaa se dekhe jin haathon se baTti khairaatein dekhi thiin in aankhon se un haathon mein kaase dekhe is shahr-e-naa-pursaan mein ham ne to 'aazar' chehre gulon se dekhe dil sahraa se dekhe"

"hayaat di to use gham kaa silsila bhi kiyaa qazaa ke saath qadar ko miri sazaa bhi kiyaa usi ne dar-ba-dari ko nai talaash bhi di buraa to us ne kyaa hi magar bhalaa bhi kiyaa baghair maange hi denaa hai shaan-e-maulaai miraa vaqaar bhi rakkhaa mujhe ataa bhi kiyaa tazaad us ki mohabbat kaa main hi jaantaa huun jalaayaa dhuup mein aanchal kaa aasraa bhi kiyaa ajiib tarah ki hai shaan-e-dilbari 'aazar' ki mujh se khush bhi rahaa aur mujhe khafaa bhi kiyaa"

"husn ho ishq kaa khugar mujhe rahne dete tum ho manzar pas-e-manzar mujhe rahne dete mujh se tahzib-e-riyaa-kaar ki tazin kyuun ki naa-taraashida thaa patthar mujhe rahne dete main ne kab chaahaa ki qaid-e-dar-o-divaar mile main to aavaara huun beghar mujhe rahne dete vaqt o haalaat se khvaahish thi faqat chand hi roz qaid-e-lamhaat se baahar mujhe rahne dete main ne asnaam taraashe to bigaaDaa kyaa thaa tum baraahim the 'aazar' mujhe rahne dete"