baarish sharaab-e-arsh hai ye soch kar 'adam' — Abdul Hamid Adam

saaqi mujhe sharaab ki tohmat nahin pasand
mujh ko tiri nigaah kaa ilzaam chaahiye

taklif miT gai magar ehsaas rah gayaa
khush huun ki kuchh na kuchh to mire paas rah gayaa

sirf ik qadam uThaa thaa ghalat raah-e-shauq mein
manzil tamaam umr mujhe DhunDhti rahi

kahte hain umr-e-rafta kabhi lauTti nahin
jaa mai-kade se meri javaani uThaa ke laa

jin se insaan ko pahunchti hai hamesha taklif
un kaa daavaa hai ki vo asl khudaa vaale hain

ai gham-e-zindagi na ho naaraaz
mujh ko aadat hai muskuraane ki

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

miri baaton se ab aazurda na honaa saaqi
is ghaDi aql miri mujh se judaa phirti hai

hain ab is fikr mein Duube hue ham
use kaise lage rote hue ham

vo baat soch ke main jis ko muddaton jiitaa
bichhaDte vaqt bataane ki kyaa zarurat thi

kahaan sochaa thaa main ne bazm-aaraai se pahle
ye meri aakhiri mahfil hai tanhaai se pahle