jab tire nain muskuraate hain — Abdul Hamid Adam

zindagi zor hai ravaani kaa
kyaa thamegaa bahaav paani kaa

ijaazat ho to main tasdiq kar luun teri zulfon se
sunaa hai zindagi ik khub-surat daam hai saaqi

savaal kar ke main khud hi bahut pashemaan huun
javaab de ke mujhe aur sharmsaar na kar

marne vaale to khair hain bebas
jiine vaale kamaal karte hain

mai-kada hai yahaan sukun se baiTh
koi aafat idhar nahin aati

saaqi mujhe sharaab ki tohmat nahin pasand
mujh ko tiri nigaah kaa ilzaam chaahiye

jhaankte raat ke garebaan se
ham ne sau aaftaab dekhe hain

shor din ko nahin sone detaa
shab ko sannaaTaa jagaa detaa hai

raushni ho rahi hai kuchh mahsus
kyaa shab aakhir tamaam ko pahunchi

aadhi se ziyaada shab-e-gham kaaT chukaa huun
ab bhi agar aa jaao to ye raat baDi hai

ai soz-e-jaan-gudaaz abhi main javaan huun
ai dard-e-laa-ilaaj ye umr-e-shabaab hai

us ko sochun to dhyaan mein mere
khushbu aati hai pahli baarish ki