jamhuriyat kaa dars agar chaahte hain aap — Ajiz Matvi

aaghaaz-e-mohabbat mein 'aajiz' rukti na thi mauj-e-ashk-e-ravaan
anjaam ab in khushk aankhon se ik ashk nikalnaa mushkil hai

mahv-e-hairat huun kharaash-e-dast-e-gham ko dekh kar
zakhm chehre par hain yaa hai aaina TuuTaa huaa

hasratein aa aa ke jama ho rahi hain dil ke paas
kaarvaan goyaa pahunchne vaalaa hai manzil ke paas

hotaa hai mahsus ye 'aajiz' shaayad us ne dastak di
tez havaa ke jhonke jab darvaaze se Takraate hain

muntazir huun main kafan baandh ke sar se 'aajiz'
saamne se koi khanjar nahin aayaa ab tak

insaan haadsaat se kitnaa qarib hai
tu bhi zaraa nikal ke kabhi apne ghar se dekh

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

uThaa sakte nahin jab chuum kar hi chhoDnaa achchhaa
mohabbat kaa ye patthar is dafa bhaari ziyaada hai

gulaabon ke honTon pe lab rakh rahaa huun
use der tak sochnaa chaahtaa huun

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

tiri abru hai mehraab-e-mohabbat
namaaz-e-ishq mere par hui farz