mujhe haasil kamaal-e-guftugu hai — Akhtar Saeedi

zakhm-e-nigaah zakhm-e-hunar zakhm-e-dil ke baad
ik aur zakhm tujh se bichhaD kar milaa mujhe

kabhi khayaal ki surat kabhi sabaa ki tarah
vo kaun hai jo mire saath saath chaltaa hai

ravaan-davaan hai zindagi charaagh ke baghair bhi
hai mere ghar mein raushni charaagh ke baghair bhi

jab tishnagi baDhi to masihaa na thaa koi
jab pyaas bujh gai to samundar milaa mujhe

yahi ik mashghala hai zindagi kaa
taaaqub kar rahaa huun raushni kaa

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

maarka garm to ho lene do khun-rezi kaa
pahle shamshir ke niche hamin jaa baiTheinge