ghar-baar chhoD kar vo faqiron se jaa mile — Anjum Barabankvi

ghair to aansu pochheinge
dhokaa deinge apne log

ye baadshaah nahin hai faqir hai suraj
hamesha raat ki jholi se din nikaaltaa hai

mujhe sone ki qimat mat bataao
main miTTi huun miri azmat bahut hai

jo doston ki mohabbat se ji nahin bhartaa
to aastin mein do-chaar saanp paal ke rakh

jis baat kaa matlab khushbu hai har gaanv ke kachche raste par
us baat kaa matlab badlegaa jab pakki saDak aa jaaegi

zaraa mahfuz raston se guzarnaa
tumhaari shahr mein shohrat bahut hai

vaada muaavze kaa na kartaa agar khudaa
khairaat bhi sakhi se na milti faqir ko

din-daar log rab ko manaane mein mast hain
darvesh apne naachne gaane mein mast hain

safar ho shaah kaa yaa qaafila faqiron kaa
shajar mizaaj samajhte hain raahgiron kaa

do-shaala shaal kashmiri amiron ko mubaarak ho
galim-e-kohna mein jaaDaa faqiron kaa basar hogaa

baazi-gaah-e-daar-o-rasan mein mai-kada-e-fikr-o-fan mein
ham rindon se raunaq hai ham durveshon se mele hain

jis din se apnaa tarz-e-faqiraana chhuT gayaa
shaahi to mil gai dil-e-shaahaana chhuT gayaa