kar rahaa huun tujhe khushi se basar — Anjum Saleemi

dard se bhartaa rahaa zaat ke khaali-pan ko
thoDaa thoDaa yunhi bharpur kiyaa main ne mujhe

kaisi hoti hain udaasi ki jaDein
aa dikhaaun tujhe dil ke reshe

kisi tarah se nazar mutmain nahin hoti
har ek shai ko dobaara badal ke dekhtaa huun

Thiik se yaad bhi nahin ab to
ishq ne mujh mein kab qayaam kiyaa

barham hain mujh pe is liye donon taraf ke log
divaar uTh gai thi to dar kyuun banaayaa hai

patthar mein kaun jonk lagaaegaa mere dost
dil hai to mubtalaa bhi kahin honaa chaahiye

kam-umri mein sunet hain
mar jaate hain achchhe log

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

tum khush raho hamaari duaa hai tamaam-umr
apni to khair jaisi bhi guzri guzar gai

ziist aur maut kaa aakhir ye fasaana kyaa hai
umr kyuun hasb-e-zarurat nahin di jaa sakti

aur thoDaa saa bikhar jaaun yahi Thaani hai
zindagi main ne abhi haar kahaan maani hai