bahut iraada kiyaa koi kaam karne kaa — Anwar Shuoor

aadmi ke liye ronaa hai baDi baat 'shuur'
hans to sakte hain sab insaan hansi mein kyaa hai

miri hayaat hai bas raat ke andhere tak
mujhe havaa se bachaae rakho savere tak

divaar-e-zindaan ke pichhe
jurm-e-mohabbat mein baiThaa huun

kabhi rotaa thaa us ko yaad kar ke
ab aksar be-sabab rone lagaa huun

go mujhe ehsaas-e-tanhaai rahaa shiddat ke saath
kaaT di aadhi sadi ek ajnabi aurat ke saath

'shuur' sirf iraade se kuchh nahin hotaa
amal hai shart iraade sabhi ke hote hain

ham ne iraada tark-e-tamannaa kaa jab kiyaa
teraa khayaal ai dil-e-naakaam aa gayaa

vahaan se hai miri himmat ki ibtidaa vallaah
jo intihaa hai tire sabr aazmaane ki

pukhta agar hai 'azm to socho na dosto
chhoTi si naav aur samundar vishaal hai

izhaar-e-muddaaa kaa iraada thaa aaj kuchh
tevar tumhaare dekh ke khaamosh ho gayaa

anaa ki qaid se nikle muqaabla to kare
vo meraa saath nibhaane kaa hausla to kare

tum ham-safar hue to hui zindagi aziiz
mujh mein to zindagi kaa koi hausla na thaa