zindagi ke sab sahaare aap ke — Armaan Jodhpuri

kaam ho to kaam karnaa vaqt ho to shaa'iri
naukri apni jagah hai shaa'iri apni jagah

mo'jiza aur bhalaa is se baDaa kyaa hogaa
dard is dil mein hai girte hain tumhaare aansu

hai mere dil ko anaa is qadar 'aziz ki vo
taDapne bhi nahin detaa hai aah bhar ke mujhe

pyaasi bahut thiin hasratein lo aaj mar gaiin
baarish kaa intizaar thaa vo bhi nahin rahaa

jis ke dam se thi jism ki raunaq
us udaasi ke haath piile hue

duriyaan tum ne hi baDhaai thiin
ham to apni jagah pe Thahre hain

kam-umri mein sunet hain
mar jaate hain achchhe log

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

kuchh aise phuul bhi guzre hain meri nazron se
jo khil ke bhi na samajh paae zindagi kyaa hai

ye main thaa yaa mire andar kaa khauf thaa jis ne
tamaam umar di tanhaai ki sazaa mujh ko

zindagi kuchh to bharam rakh le vafaadaari kaa
tujh ko mar mar ke shab-o-roz sanvaaraa hai bahut