zhaala-baari bhi rahi dhuup bhi thi baarish bhi — Asad Awan

khud-bakhud chhoD gae hain to chalo Thiik huaa
itne ahbaab kahaan ham se sanbhaale jaate

nit-nayaa tu ne zamaane mein kharidaa badlaa
tere kahne pe kahaan ham ne aqida badlaa

umr-bhar maan ki nasihat pe zamaane mein 'asad'
faatima-zehraa ke bachchon se vafaadaari ki

is mohabbat ne hamein joD diyaa aapas mein
varna ham donon kaa ik jaisaa aqida to na thaa

koi to dekhe miri bebasi mohabbat mein
main aap apni jahaan mein hansi uDaataa phirun

guzar na jaae ye mausam basant kaa mausam
banafsha phuul khile har taraf zamin ke liye

mere khvaabon ke jharokon ko sajaate rahiye
na sahi vasl magar yaad to aate rahiye

jaada jaada chhoD jaao apni yaadon ke nuqush
aane vaale kaarvaan ke rahnumaa ban kar chalo

is raaste mein jab koi saaya na paaegaa
ye aakhiri darakht bahut yaad aaegaa

jaate hue kamre ki kisi chiiz ko chhu de
main yaad karungaa ki tire haath lage the

lamhaat-e-vasl yaad jo aae shab-e-firaaq
yak-lakht surkh ho gae aariz be-ikhtiyaar

yaad-e-jaanaan utar ke aai hai
shab ke ziine se chaandni ki tarah