Dubtaa huun to mujhe haath kai milte hain — Asim Tanha

gumaan kahtaa hai meraa ki ek din mujh par
tiri vafaa tiri chaahat kaa maan barsegaa

kahin suraj nazar aataa nahin hai
hukumat shahr mein ab dhund ki hai

tumhaare ghar ke raste ki udaasi khatm ho jaae
mujhe ghar tak bulaane se tumhein kyaa farq paDtaa hai

jo manzilon ke nishaanaat de rahi hain tumhein
hamaari guunj bhi shaamil hai in sadaaon mein

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

ashk-e-hasrat hai aaj tufaan-khez
kashti-e-chashm ki tabaahi hai

duniyaa se haT ke ik nai duniyaa banaa sakein
kuchh ahl-e-aarzu isi hasrat mein mar gae

dil-lagi mein hasrat-e-dil kuchh nikal jaati to hai
bose le lete hain ham do-chaar hanste bolte

vahi manzilein vahi dasht o dar tire dil-zadon ke hain raahbar
vahi aarzu vahi justuju vahi raah-e-pur-khatar-e-junun

ab shahr-e-aarzu mein vo raanaaiyaan kahaan
hain gul-kade niDhaal baDi tez dhuup hai