in se vaabasta hai miraa bachpan — Bashir Mehtaab

zindagi fan nahin madaari kaa
paaniyon se diye nahin jalte

hasin yaadein vo bachpan ki kahin dil se na kho jaaein
main apne aashiyaane mein khilaune ab bhi rakhtaa huun

ik bevafaa ke pyaar mein had se guzar gae
kaafir ke pyaar ne hamein kaafir banaa diyaa

apni kamar se aap hi baandhe safar tamaam
phir yuun huaa ki main kabhi apnaa nahin banaa

yuun mohabbat ko umr-bhar paDhnaa
zindagi imtihaan ho jaise

tum mire paas jab nahin hote
dhaDkanein ehtijaaj karti hain

main baDaa ho gayaa huun magar bachpanaa
mere dil se kabhi bhi gayaa hi nahin

vo arz-e-gham pe miri un kaa ehtimaam-e-sukut
tamaam shorish-e-tafsil-e-vaaqiaat gai

ek muddat se khamoshi kaa hai pahra har-su
jaane kis or gae shor machaane vaale

chupke se sah rahaa huun sitam tere bevafaa
meri khataa to jab ho ki chuun kar rahaa huun main

na kisi aah ki aavaaz na zanjir kaa shor
aaj kyaa ho gayaa zindaan mein ki zindaan chup hai

zaruri to nahin ye ki hilein lab
ye khaamoshi bhi to ik guftugu hai