hazaar tark-e-vafaa kaa khayaal ho lekin — Farigh Bukhari

kitne shikve gile hain pahle hi
raah mein faasle hain pahle hi

jitne the tere mahke hue aanchalon ke rang
sab titliyon ne aur dhanak ne uDaa liye

safar mein koi kisi ke liye Thahartaa nahin
na muD ke dekhaa kabhi saahilon ko dariyaa ne

pukaaraa jab mujhe tanhaai ne to yaad aayaa
ki apne saath bahut mukhtasar rahaa huun main

do dariyaa bhi jab aapas mein milte hain
donon apni apni pyaas bujhaate hain

jalte mausam mein koi faarigh nazar aataa nahin
Dubtaa jaataa hai har ik peD apni chhaanv mein

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

kahaan milegi misaal meri sitamgari ki
ki main gulaabon ke zakhm kaanTon se si rahaa huun

tujh se bichhDun to koi phuul na mahke mujh mein
dekh kyaa karb hai kyaa zaat ki sachchaai hai

ham jaison ne jaan ganvaai paagal the
duniyaa jaisi kal thi bilkul vaisi hai

maan ke khulus jaisaa thaa mausam bahaar kaa
fasl-e-khizaan hai sar-phiri aulaad ki tarah