kyaa jaane kyaa sabab hai ki ji chaahtaa hai aaj — Hafeez Merathi

haae vo naghma jis kaa mughanni
gaataa jaae rotaa jaae

shisha TuuTe ghul mach jaae
dil TuuTe aavaaz na aae

vo vaqt kaa jahaaz thaa kartaa lihaaz kyaa
main doston se haath milaane mein rah gayaa

raat ko raat kah diyaa main ne
sunte hi baukhlaa gai duniyaa

ik ajnabi ke haath mein de kar hamaaraa haath
lo saath chhoDne lagaa aakhir ye saal bhi

abhi se hosh uDe maslahat-paraston ke
abhi main bazm mein aayaa abhi kahaan bolaa

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

gulaabon ke honTon pe lab rakh rahaa huun
use der tak sochnaa chaahtaa huun

dil ki baazi haar ke roe ho to ye bhi sun rakkho
aur abhi tum pyaar karoge aur abhi pachhtaaoge

kyaa tumhein ahd-e-mohabbat ke vo lamhe yaad hain
jab nigaahein bolti thiin aur ham khaamosh the