har sadaa se bach ke vo ehsaas-e-tanhaai mein hai — Hayat Lakhnavi

khudaa ke vaaste mohr-e-sukut toD bhi de
tamaam shahr tiri guftugu kaa pyaasaa hai

ab dilon mein koi gunjaaish nahin milti 'hayaat'
bas kitaabon mein likkhaa harf-e-vafaa rah jaaegaa

silsila khvaabon kaa sab yunhi dharaa rah jaaegaa
ek din bistar pe koi jaagtaa rah jaaegaa

ye jazba-e-talab to miraa mar na jaaegaa
tum bhi agar miloge to ji bhar na jaaegaa

muddaaa ham apnaa kaaghaz par raqam kar jaaeinge
vaqt ke haathon mein apnaa faislaa rah jaaegaa

chehre ko tere dekh ke khaamosh ho gayaa
aisaa nahin savaal tiraa laa-javaab thaa

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

sardi mein din sard milaa
har mausam bedard milaa

saae gali mein jaagte rahte hain raat bhar
tanhaaiyon ki oT se jhaankaa na kar mujhe

ham apne shahr se ho kar udaas aae the
tumhaare shahr se ho kar udaas jaanaa thaa