ham bahut duur nikal aae hain chalte chalte — Iqbal Azeem

junun ko hosh kahaan ehtimaam-e-ghaarat kaa
fasaad jo bhi jahaan mein huaa khirad se huaa

manzil to khush-nasibon mein taqsim ho chuki
kuchh khush-khayaal log abhi tak safar mein hain

jab ghar ki aag bujhi to kuchh saamaan bachaa thaa jalne se
so vo bhi un ke haath lagaa jo aag bujhaane aae the

baarhaa un se na milne ki qasam khaataa huun main
aur phir ye baat qasdan bhuul bhi jaataa huun main

zamaana dekhaa hai ham ne hamaari qadr karo
ham apni aankhon mein duniyaa basaae baiThe hain

ai ahl-e-vafaa daad-e-jafaa kyuun nahin dete
soe hue zakhmon ko jagaa kyuun nahin dete

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

ghazal mein jab talak ehsaas ki shiddat na ho shaamil
faqat alfaaz ki kaarigari mahsus hoti hai

maarka garm to ho lene do khun-rezi kaa
pahle shamshir ke niche hamin jaa baiTheinge

vasl ki raat ke sivaa koi shaam
saath le kar sahar nahin aati

aakhiri baar aayaa thaa milne koi
hijr mujh ko milaa vasl ki shaam mein

phir kahin baiTh ke pi jaae ikaTThe chaae
phir koi shaam kaa pal saath guzaaraa jaae