judaa thi baam se divaar dar akelaa thaa — Javed Shaheen

samajh rahaa hai zamaana riyaa ke pichhe huun
main ek aur tarah se khudaa ke pichhe huun

thoDaa saa kahin jama bhi rakh dard kaa paani
mausam hai koi khushk saa barsaat se aage

Dubne vaalaa thaa din shaam thi hone vaali
yuun lagaa miri koi chiiz thi khone vaali

kuchh zamaane ki ravish ne sakht mujh ko kar diyaa
aur kuchh bedard main us ko bhulaane se huaa

hisaab-e-dostaan karne hi se maalum ye hogaa
khasaare mein huun yaa ab main khasaare se nikal aayaa

kis tarah be-mauj aur khaali ravaani se huaa
be-khabar dariyaa kahaan par apne paani se huaa

chand ghanTe shor o ghul ki zindagi chaaron taraf
aur phir tanhaai ki ham-saaegi chaaron taraf

logo bhalaa is shahr mein kaise jiyeinge ham jahaan
ho jurm tanhaa sochnaa lekin sazaa aavaargi

kahin aisaa na ho main duur khud apne se ho jaaun
meri hasti ke hangaamon mein kuchh tanhaaiyaan rakh do

husn tanhaa nahin haqdaar vafaa kaa 'mohsin'
ishq ne bhi kaf-e-afsos male hain barson

pahle ye sochtaa rahtaa thaa ki tanhaa ho jaaun
aaj tanhaa huun to tanhaai se Dar lagtaa hai

'kaif' kahte hain naaseh ki tanhaa raho
main khudaa to nahin huun jo yaktaa rahun