Dubne vaalaa thaa din shaam thi hone vaali — Javed Shaheen

kis tarah be-mauj aur khaali ravaani se huaa
be-khabar dariyaa kahaan par apne paani se huaa

samajh rahaa hai zamaana riyaa ke pichhe huun
main ek aur tarah se khudaa ke pichhe huun

thoDaa saa kahin jama bhi rakh dard kaa paani
mausam hai koi khushk saa barsaat se aage

kuchh zamaane ki ravish ne sakht mujh ko kar diyaa
aur kuchh bedard main us ko bhulaane se huaa

hisaab-e-dostaan karne hi se maalum ye hogaa
khasaare mein huun yaa ab main khasaare se nikal aayaa

judaa thi baam se divaar dar akelaa thaa
makin the khud mein magan aur ghar akelaa thaa

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

ghazal mein jab talak ehsaas ki shiddat na ho shaamil
faqat alfaaz ki kaarigari mahsus hoti hai

maarka garm to ho lene do khun-rezi kaa
pahle shamshir ke niche hamin jaa baiTheinge

charaag chaand shafaq shaam phuul jhiil sabaa
churaain sab ne hi kuchh kuchh shabaahatein teri

kaun samjhe ham pe kyaa guzri hai 'naqsh'
dil laraz uThtaa hai zikr-e-shaam se

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa