main ne jab pahle-pahal apnaa vatan chhoDaa thaa — Kaif Bhopali

chaahtaa huun phunk duun is shahr ko
shahr mein in kaa bhi ghar hai kyaa karun

kaise maanein ki unhein bhuul gayaa tu ai 'kaif'
un ke khat aaj hamein tere sirhaane se mile

mai-kasho aage baDho tishna-labo aage baDho
apnaa haq maangaa nahin jaataa hai chhinaa jaae hai

ham na piyeinge bhiik ki saaqi
le ye tiraa paimaana paDaa hai

kyaa koi mohabbat mein yuun bhi benaam-o-nishaan ho jaataa hai
main huun ki abhi tak zinda huun duniyaa hai ki bhuli jaati hai

mat dekh ki phirtaa huun tire hijr mein zinda
ye puchh ki jiine mein maza hai ki nahin hai

hai ajab nizaam zakaat kaa mire mulk mein mire des mein
ise kaaTtaa koi aur hai ise baanTtaa koi aur hai

vatan ko phunk rahe hain bahut se ahl-e-vatan
charaagh ghar ke hain sargarm ghar jalaane mein

koi kartaa hai jab hindostaan ki baat a 'saahil'
mujhe iqbaal kaa qaumi taraana yaad aataa hai

mahv-e-liqaa jo hain malakuti-khisaal hain
bedaar ho ke bhi nazar aate hain khvaab mein

vatan ki fikr kar naadaan musibat aane vaali hai
tiri barbaadiyon ke mashvare hain aasmaanon mein

pahlu mein mere dil ko na ai dard kar talaash
muddat hui gharib vatan se nikal gayaa