aankhon se mohabbat ke ishaare nikal aae — Mansoor Usmani

haalaat kyaa ye tere bichhaDne se ho gae
lagtaa hai jaise ham kisi mele mein kho gae

mujh se dilli ki nahin dil ki kahaani suniye
shahr to ye bhi kai baar luTaa hai mujh mein

jahaan jahaan koi urdu zabaan boltaa hai
vahin vahin miraa hindostaan boltaa hai

apni taarif suni hai to ye sach bhi sun le
tujh se achchhaa tiraa kirdaar nahin ho saktaa

pahle to us ki yaad ne sone nahin diyaa
phir us ki aahaTon ne kahaa jaagte raho

shabnam ki jagah aag ki baarish ho magar ham
'mansur' na maangeinge duaa aur tarah ki

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

thak gayaa hai dil-e-vahshi miraa fariyaad se bhi
ji bahaltaa nahin ai dost tiri yaad se bhi

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

nafrat se bachaa kar tu ulfat ko sajaa dil mein
paighaam mohabbat kaa har baar diye jaanaa