chup jo rahte hain to ye baat ghanimat jaano — Masood Tanha

bahut khaamosh rahtaa hai jo 'tanhaa'
vo mahfil mein baraabar boltaa hai

bazm-e-yaaraan mein baiThtaa huun magar
meri jaanib harif dekhte hain

shahr mein raunaqein sahi 'tanhaa'
apne gaanv se mat kinaaraa kar

dost hi khubiyaan bataate hain
dost hi khaamiyaan nikaalte hain

ye tamaashaa sar-e-baazaar nahin ho saktaa
har koi meraa kharidaar nahin ho saktaa

yaadon ke qaafile mein udaasi thi ham-rikaab
hijrat mein tere shahr se 'tanhaa' nahin gae

main baDaa ho gayaa huun magar bachpanaa
mere dil se kabhi bhi gayaa hi nahin

raat yuun dil mein tiri khoi hui yaad aai
jaise viraane mein chupke se bahaar aa jaae

main tere kahe se chup huun lekin
chup bhi to bayaan-e-muddaaa hai

ik main huun ki lahron ki tarah chain nahin hai
ik vo hai ki khaamosh samundar ki tarah hai

chupke chupke apne andar jaate hain
sahme sahme baahar aanaa paDtaa hai

kyuun chup hain vo be-baat samajh mein nahin aataa
ye rang-e-mulaaqaat samajh mein nahin aataa