maut na aai to 'alvi' — Mohammad Alvi

sadiyon se kinaare pe khaDaa suukh rahaa hai
is shahr ko dariyaa mein giraa denaa chaahiye

sardi mein din sard milaa
har mausam bedard milaa

andheraa hai kaise tiraa khat paDhun
lifaafe mein kuchh raushni bhej de

maanaa ki tu zahin bhi hai khub-ru bhi hai
tujh saa na main huaa to bhalaa kyaa buraa huaa

nazron se naaptaa hai samundar ki vusatein
saahil pe ik shakhs akelaa khaDaa huaa

aaj phir mujh se kahaa dariyaa ne
kyaa iraada hai bahaa le jaaun

tazkira soz-e-mohabbat kaa kiyaa thaa ik baar
taa-dam-e-marg zabaan se miri chhaale na gae

us but ke nahaane se huaa saaf ye paani
moti bhi sadaf mein tah-e-dariyaa nazar aayaa

muflison ki zindagi kaa zikr kyaa
muflisi ki maut bhi achchhi nahin

maut kahte hain jis ko ai 'saaghar'
zindagi ki koi kaDi hogi

maut aa jaae yaa vo aa jaaein
aaj qissa tamaam ho jaae

tujhe bhi dekh liyaa ham ne o khudaa-e-ajal
ki teraa zor chalaa bhi to ahl-e-gham pe chalaa