vasl ke din gine hain ungli par — M.S Mahawar

mar gai band lifaafe mein mohabbat meri
sirf usi ne na paDhe jis ko paDhaane the khat

tujhe itnaa to dekhaa bhi nahin hai
tujhe ham yaad jitnaa kar rahe hain

chun liyaa hai tumhein miraa mahbub
dusraa koi intikhaab nahin

kyaa karein bolti in aankhon kaa
haal dil kaa chhupaa nahin sakte

hijr kaa dukh nahin rahaa hamein ab
hai ye dukh ab koi azaab nahin

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

kahaan milegi misaal meri sitamgari ki
ki main gulaabon ke zakhm kaanTon se si rahaa huun

main tohfa le ke aayaa huun tamannaaon ke phulon kaa
luTaane ko bahaar-e-zindagaani le ke aayaa huun

sau baar chaman mahkaa sau baar bahaar aai
duniyaa ki vahi raunaq dil ki vahi tanhaai

divaana-vaar naachiye hansiye gulon ke saath
kaanTe agar milein to jigar mein chubhoiye