chup chup kyuun rahte ho 'naasir' — Nasir Kazmi

kuchh yaadgaar-e-shahr-e-sitamgar hi le chalein
aae hain is gali mein to patthar hi le chalein

vo raat kaa be-navaa musaafir vo teraa shaair vo teraa 'naasir'
tiri gali tak to ham ne dekhaa thaa phir na jaane kidhar gayaa vo

akele ghar se puchhti hai be-kasi
tiraa diyaa jalaane vaale kyaa hue

girafta-dil hain bahut aaj tere divaane
khudaa kare koi tere sivaa na pahchaane

jurm-e-ummid ki sazaa hi de
mere haq mein bhi kuchh sunaa hi de

nae kapDe badal kar jaaun kahaan aur baal banaaun kis ke liye
vo shakhs to shahr hi chhoD gayaa main baahar jaaun kis ke liye

main baDaa ho gayaa huun magar bachpanaa
mere dil se kabhi bhi gayaa hi nahin

raat yuun dil mein tiri khoi hui yaad aai
jaise viraane mein chupke se bahaar aa jaae

ham bahut pachhtaae aavaazon se rishta joD kar
shor ik lamhe kaa thaa aur zindagi bhar kaa sukut

gosha-e-dil ki khamoshi kaa tamannaai main
aur hangaame uThaa laayaa hai baazaar se tu

maqtal-e-vaqt mein khaamosh gavaahi ki tarah
dil bhi kaam aayaa hai gumnaam sipaahi ki tarah

dukaanein husn ki aage tire takhta hui hongi
jo tu baazaar mein hogaa to yusuf kab bikaa hogaa