sahar ko uThte hain vo dekh kar kaf-e-rangin — Nazm Tabatabai

dil is tarah havaa-e-mohabbat mein jal gayaa
bhaDki kahin na aag na uTThaa dhuaan kahin

banaayaa toD ke aaina aaina-khaana
na dekhi raah jo khalvat se anjuman ki taraf

nashshe mein sujhti hai mujhe duur duur ki
naddi vo saamne hai sharaab-e-tuhur ki

loTte rahte hain mujh par chaahne vaalon ke dil
varna yuun poshaak teri malgaji hoti nahin

uD ke jaati hai miri khaak idhar gaah udhar
kuchh pataa de na gai umr-e-gurezaan apnaa

bichhaD ke tujh se mujhe hai umiid milne ki
sunaa hai ruuh ko aanaa hai phir badan ki taraf

vasl ki raat ke sivaa koi shaam
saath le kar sahar nahin aati

nur-e-sahar kahaan hai agar shaam-e-gham gai
kab iltifaat thaa ki jo khu-e-sitam gai

aaj yaaron ko mubaarak ho ki subh-e-eid hai
raag hai mai hai chaman hai dilrubaa hai diid hai

jo dekhiye to zamaana hai tez-rau kitnaa
tulu-e-subh abhi hai to vaqt-e-shaam abhi

qismat ki tirgi ki kahaani na puchhiye
subh-e-vatan bhi shaam-e-gharibaan hai aaj kal

rang-e-shikasta subh-e-bahaar-e-nazaara hai
ye vaqt hai shaguftan-e-gul-haa-e-naaz kaa