azal se aaj tak sajde kiye aur ye nahin sochaa — Saba Akbarabadi

ravaan hai qaafila-e-ruh-e-iltifaat abhi
hamaari raah se haT jaae kaaenaat abhi

kaun uThaae ishq ke anjaam ki jaanib nazar
kuchh asar baaqi hain ab tak hairat-e-aaghaaz ke

musaafiraan-e-rah-e-shauq sust-e-gaam ho kyuun
qadam baDhaae hue haan qadam baDhaae hue

aap ke lab pe aur vafaa ki qasam
kyaa qasam khaai hai khudaa ki qasam

apne jalne mein kisi ko nahin karte hain sharik
raat ho jaae to ham shama bujhaa dete hain

gham-e-dauraan ko baDi chiiz samajh rakkhaa thaa
kaam jab tak na paDaa thaa gham-e-jaanaan se hamein

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

us ne do lafz mein jo baatein kahin thi mujh se
us ko main sochne baiThun to zamaane lag jaaein

soch lo kal kahin aansu na bahaane paD jaaein
khuun kaa kyaa hai ragon mein vo yunhi khaultaa hai

tire nazdik aa kar sochtaa huun
main zinda thaa ki ab zinda huaa huun

kab huun aazaad is muhit se main
sochtaa huun ki sochtaa kyon huun