kitaab-e-dars-e-majnun mushaf-e-rukhsaar-e-lailaa hai — Sahir Dehlavi

ahd-e-misaaq kaa laazim hai adab ai vaaiz
hai ye paimaan-e-vafaa rishta-e-zunnaar na toD

qulzum-e-fikr mein hai kashti-e-imaan saalim
naa-khudaa husn hai aur ishq hai langar apnaa

mil-milaa ke donon ne dil ko kar diyaa barbaad
husn ne kiyaa be-khud ishq ne kiyaa aazaad

jo laa-mazhab ho us ko millat-o-mashrab se kyaa matlab
miraa mashrab hai rindi rind ko mazhab se kyaa matlab

aate hue is tan mein na jaate hue tan se
hai jaan-e-makin ko na lagaavaT na rukaavaT

qadam hai ain hudus aur hudus ain qadam
jo tu na jalve mein aataa to main kahaan hotaa

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

na aayaa shaam bhi ghar phir ke apne
tamaashaai-e-baazaar-e-mohabbat

jaanib-e-kaaba tu kyuun le gayaa but-khaane se
mujh se divaane ko ai ishq na bahkaanaa thaa

pyaar se dushman ke vo aalam tiraa jaataa rahaa
aise lab chuse ki boson kaa mazaa jaataa rahaa

ai dil-e-shikva-sanj kyaa guzri
kis liye honT rah gae sil ke