bas ab to daaman-e-dil chhoD do bekaar ummido — Sahir Ludhianvi

le de ke apne paas faqat ik nazar to hai
kyuun dekhein zindagi ko kisi ki nazar se ham

ham jurm-e-mohabbat ki sazaa paaeinge tanhaa
jo tujh se hui ho vo khataa saath liye jaa

ham amn chaahte hain magar zulm ke khilaaf
gar jang laazmi hai to phir jang hi sahi

hazaar barq gire laakh aandhiyaan uTThein
vo phuul khil ke raheinge jo khilne vaale hain

kaun rotaa hai kisi aur ki khaatir ai dost
sab ko apni hi kisi baat pe ronaa aayaa

milti hai zindagi mein mohabbat kabhi kabhi
hoti hai dilbaron ki inaayat kabhi kabhi

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

ye to nahin ki tum saa jahaan mein hasin nahin
is dil ko kyaa karun ye bahaltaa kahin nahin

dil le ke palkein phir gaiin zulfon ki aaD mein
ulTe phiri ye fauj sar-e-shaam luuT ke

kaise aa sakti hai aisi dil-nashin duniyaa ko maut
kaun kahtaa hai ki ye sab kuchh fanaa ho jaaegaa

na samjhe ashk-fishaani ko koi maayusi
hai dil mein aag agar aankh mein bhi paani hai