ye jo taalaab hai dariyaa thaa kabhi — Sarfraz Zahid

khiDki se jhaank kar kisi ne
manzar ko vaaqia banaayaa

kunein ki samt bulaa le na koi khvaab mujhe
main apne baap kaa sab se hasin beTaa huun

sab ko qudrat thi khush-kalaami par
khaamushi mein zabaan-daraaz thaa main

dukh se do chaar saal chhoTaa huun
hijr se ek din baDaa huun

mohabbat aam saa ik vaaqia thaa
hamaare saath pesh aane se pahle

zinda ikaTThe ho rahe hain
lagtaa hai koi mar gayaa hai

miri is chashm-e-tar se abr-e-baaraan ko hai kyaa nisbat
ki vo dariyaa kaa paani aur ye khun-e-dil hai barsaati

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

chaand bhi hairaan dariyaa bhi pareshaani mein hai
aks kis kaa hai ki itni raushni paani mein hai

sab ummidein mire aashob-e-tamannaa tak thiin
bastiyaan ho gaiin gharqaab to dariyaa utraa

chaand hai paani mein yaa bhule hue chehre kaa aks
saahil-e-dariyaa pe dekho main bhi hairaani mein huun

mire khamir se ye kaaenaat uThaate hue
use ghurur bahut thaa mujhe banaate hue