har ek jism mein maujud hasht-paa ki tarah — Saud Usmani

itni siyaah-raat mein itni si raushni
ye chaand vo nahin miraa mahtaab aur hai

vo chaahtaa thaa ki dekhe mujhe bikharte hue
so us kaa jashn ba-sad-ehtimaam main ne kiyaa

kisi alaav kaa shoala bhaDak ke boltaa hai
safar kaThin hai magar ek baar aakhiri baar

barun-e-khaak faqat chand Thekre hain magar
yahaan se shahr mileinge agar khudaai hui

un se bhi meri dosti un se bhi ranjishein
siine mein ek halqa-e-ahbaab aur hai

ye to duniyaa bhi nahin hai ki kinaaraa kar le
tu kahaan jaaegaa ai dil ke sataae hue shakhs

donon ke dil mein khauf thaa maidaan-e-jang mein
donon kaa khauf faasla thaa darmiyaan kaa

leaderi chaaho to lafz-e-qaum hai mehmaan-navaaz
gap-navison ko aur ahl-e-mez ko raazi karo

Dar rahaa huun ki sar-e-shaam tiri aankhon mein
main ne jo vaqt guzaaraa hai koi dekh na le

nae manzar ke khvaabon se bhi Dar lagtaa hai un ko
puraane manzaron se jin ki aankhein kaT chuki hain

paDhtaa hai baDe shauq se vo meri kitaabein
jis baat se Dartaa huun vahi baat na paDh le

kabhi sayyaad kaa khaTkaa hai kabhi khauf-e-khizaan
bulbul ab jaan hatheli pe liye baiThi hai