teri jafaa vafaa sahi meri vafaa jafaa sahi — Sehr Ishqabadi

husn kaa har khayaal raushan hai
ishq kaa muddaaa kise maalum

guzarne ko to guzre jaa rahe hain raah-e-hasti se
magar hai kaarvaan apnaa na mir-e-kaarvaan apnaa

pahli si lazzatein nahin ab dard-e-ishq mein
kyuun dil ko main ne zulm kaa khugar banaa diyaa

aah kartaa huun to aati hai palaT kar ye sadaa
aashiqon ke vaaste baab-e-asar khultaa nahin

vo dard hai ki dard saraapaa banaa diyaa
main vo mariz huun jise iisaa bhi chhoD de

ek ham hain raat bhar karvaT badalte hi kaTi
ek vo hain din chaDhe tak jin kaa dar khultaa nahin

ye jafaaon ki sazaa hai ki tamaashaai hai tu
ye vafaaon ki sazaa hai ki pae-daar huun main

mere baa'd vafaa kaa dhokaa aur kisi se mat karnaa
gaali degi duniyaa tujh ko sar meraa jhuk jaaegaa

kuchh to majburiyaan rahi hongi
yuun koi bevafaa nahin hotaa

is qadar musalsal thiin shiddatein judaai ki
aaj pahli baar us se main ne bevafaai ki

taazgi hai sukhan-e-kuhna mein ye baad-e-vafaat
log aksar mire jiine kaa gumaan rakhte hain

apni kashti kaa hai khudaa haafiz
pichhe tufaan hai saamne girdaab